Ogẹn onyẹ hụ kị ndị-agha e che eze Babilọnụ nche gi hụn Jerimaya, ọ nọ weri ẹ shi ụsụọ, sị a, “Osolobuẹ wụ Chuku i ku ẹ n'o k'e wẹhẹni alịnị eje-ihiẹn.
Gẹdalia nwa Ahikam nwa Shafanị nọ kun ẹfan Osolobuẹ kwe wẹ lẹ ndị-agha wẹ nkwa n'o nwọnni ihiẹn k'e mẹni wẹ. Ọ sị wẹ, “Atụlẹ ni egun. Biri ni alịnị, ụnụ e we enwẹn ụnụ che okpuru eze Babilọnụ, kẹn'ọ rịnị ụnụ mma.
Mmẹ lẹ enwẹn m k'a rị Mizpa ebeni a nọkin ẹnya ụnụ ihun ndị Babilọnụ rị a bịa d'e kunrun ẹnyi. Ụnụ nwẹn, d'a ghọlụama nị akpụrụ-osisi ụnụ gi e mẹmẹ manya lẹ akpụrụ-osisi ọkọkị ụnụ lẹ olivu — ụnụ a gba manya lẹ olivu ụnụ ye ẹkpoko dọnmẹrin. Biri ni obodo ẹnyi ndị ahụn ụnụ werigụ.”
Ya kẹ Johananị nwa Karia nọ we Gẹdalia shi ụsụọ, sị a, “Nị m jẹn d'e gbu Ishmẹlụ nwa Nẹtanịa, onwọnni onyẹ k'a marịnnị. K'o k'e gbuni i, mẹ ndị Judanị ile gi ufiri i rị ebeni gbayịya, ndị Juda họdụnị a la iwi.”