Nyuma Nebuzaradani ûrîa mûtongeeria wa akaria ba mûnene kûrekeeria Jeremia arî ntûûreene ya Rama, MWATHANI nî aarîîrie Jeremia. Jeremia aarî agwikua kûu atheeki arî amwe na atae bangî bonthe ba Jerusalemu na Juda barîa bathaamîîrue nthîgûrûûne ya Babiloni.
“Wathuura gûtigwa, ûcoke kîrî Gedalia mûtaana wa Ahikamu mûtaana wa Shafani, ûrîa ûthuuri nî mûnene wa Babiloni aa mûtongeeria wa ntûûra cia Juda, bûtûûranie nawe amwe na antû bangî. Kana wîte kûrîa ûkwona nîku gûkwagîrîte.” Tontû bûû, mûrûngamîîri wa akaria aranenkera Jeremia irio na kîewa, aramûrekeeria areeta.
Ishimaeli mûtaana wa Nethania, na Johanani mûtaana wa Karea, na Seraia mûtaana wa Tanihumethi, na ataana ba Efai ûrîa mûnetofa, na Jezania mûtaana wa Mumaakathi, amwe na asikarî baao nî beetîre ntûûreene ya Mizipa barainenkanîra kîrî Gedalia.
Ningî kinya Ayahudi bonthe barîa baarî Moabu, na barîa baatûûranagia na Aamoni, na barîa baarî Edomu, na nthîgûrûûne ingî, nî baigîrue atî mûnene wa Babiloni nî aatigarîîtie antû bamwe ba Juda, na atî nî aathuurîte Gedalia mûtaana wa Ahikamu, Ahikamu ûrîa waarî mûtaana wa Shafani, aa mûrûngamîîri wa antû bau.