Ki nyo anyun Ishmael weeriitap Netania weeriitap Elisama ne po iyoteetap kaplaitoryat, kobooto kiptaiyat age ne oo ne po laitoryat, ak piik taman che ki mi kobooto ineendet, eng' arawetap tisap, kap Gedalia weeriitap Aikam eng' Mispa; ak ki amis tugul eng' olooto eng' Mispa.
Ki ng'et anyun Ishmael weeriitap Netania, ak pichooto taman ki mi kobooto ineendet ak koep Gedalia weeriitap Aikam weeriitap Sapan eng' rotwetap chok, ak kobar, ne kiga konde laitoryatap Babilon koek pounindetap emet.
kobwa piik alage kobunu Shekem, Shiloh, ak Samaria, piik tamanwogik sisiit, che kiga konem tamnokwak ak kogereer ngoroikwak, ko kagotilgei, ak koibu kagoochinoik ak tuguuk che nyamdut eng' eunekwak, koibu kobwa kootap Kamuktaindet ne Toroor.
Ak ki wo Ishmael weeriitap Netania eng' Mispa kotorookto icheek, koriiroti eng' ooreet kowendi: ak kingo kagotuiyo ak icheek koleenji, obwa kap Gedalia weeriitap Aikam.
Ago ki piit piik tamanu eng' kwenunnywa che ki mwachi Ishmael koleenji, amebarech: amu ki tinyei tuguuk che ki kiuny eng' mbar, nganuuk, ak baale, ak mwanik, ak kumyat. Kobagaakta anyun, mata kobar icheek eng' kwenutap tupchosyekwak.
Ki inyiit anyun Ishmael weeriitap Netania keriingonooto piik che kiga kebar, keriinget ne kiga kowiirchi Ishmael muuswek tugul che po piik che kiga kobar, ki wiirchi ole neegitee Gedalia (keriingonooto ko ne kibaalei laitoryat Asa amu ki iywei Baasha laitoryatap Israel).
Ago ye kingo kas Johanan weeriitap Karea ak kiptainik tugul che po lugoosyek che ki mi kobooto ineendet, yaityet tugul ne kiga koyai Ishmael weeriitap Netania,
Kingo keer anyun piik tugul che ki mi kobooto Ishmael Johanan weeriitap Karea, ak kiptainik tugul che po lugoosyek, che ki mi kobooto ineendet, kogaskei anyun miising'.
Komut anyun Johanan weeriitap Karea ak kiptainik tugul che po lugoosyek che ki mi kobooto ineendet, piik tugul che ki ng'et eng' piik che kiga koweech ineendet eng' Ishmael weeriitap Netania, eng' Mispa, ye kingo kagobar Gedalia weeriitap Aikam, piigap lugeet, ak kwonyiik, ak lagok, ak kiptainik che kiga komut kogeny eng' Gibeon: