E bulan petto' taon jareya Isma'il ana'na Netanya kompoyya Elisama entar ka Mizpa abareng oreng kasapolo terro atemmowa ban Gedalya. Isma'il reya toronanna rato, sala settong dhari parwira tenggina karaja'an. Teppa'na kabbi padha ngakan areng-bareng,
badha oreng entar ka jadhiya, bannya'na ballung polo oreng, dhari Sikhem, Silo ban Samaria. Reng-oreng jareya la nyokor janggu'na, nyebbit kalambina, ban ari-duri badanna. Reng-oreng jareya ngeba gandum ban mennyan eatorragiya e Padalemman Socce.
Buru maso' ka dhalem kottha, Isma'il ban reng-orengnga mate'e reng-oreng jareya. Tape sapolo oreng e antarana ngoca' ka Isma'il, “Ampon ja' pate'e kaula! Kaula gi' gadhuwan gandum dhu macem, jugan mennya' jaitun, sareng maddu. Sadaja bi' kaula eerrep e lowarra kottha.” Daddi reng-oreng jareya Isma'il ta' epate'e, tape se laen epate'e kabbi, ban mayyidda epelpallagi ka dhalem somor.
Saellana jareya Isma'il laju nangkep para pottrena rato ban sakabbinna oreng se gi' badha e Mizpa se bi' Nebuzaradan esoro jaga ka Gedalya. Reng-oreng jareya bi' Isma'il etawan kabbi, pas egiba mangkat nojju ka dhaera Amon.
Saellana jareya Yokanan ban ra-parwirana makompol para parjurit, babine'an, na'-kana', ban para ponggaba karaton se etawan Isma'il saellana mate'e Gedalya.
Reng-oreng jareya laju padha tako' kabbi ka oreng Babil, polana Isma'il mate'e Gedalya se bi' rato Babil epadaddi gubennor e nagara jareya. Daddi reng-oreng jareya laju padha buru ka Messer. E tengnga jalan padha ambu e Kimham e seddi'na Betlehem.