×

RUAC KUƆTH IN RƐL RƆ 1998

Yir 41

1
Kɛ bärɔw päthni, cu I-ca-mel gat Nɛ-thɛ̈n-yaa, gat Ɛli-cama raan thuɔk duëël kuäärä, min la ram kɛl kä bööth ruëëcni kua̱r, ben kɛ wutni da̱ŋ wäl kä Gɛ-dɛ̈l-yaa gat Ä-ɣi-kam kä Midh-pa. Kä mëë mi̱thkɛ ɛn wani kä Midh-pa,
2
cu I-ca-mel gat Nɛ-thɛ̈n-yaa kɛnɛ wutni da̱ŋ wäl tin tekɛ jɛ kɛɛl rɔ̱ jiɛ̈c nhial kä cukɛ Gɛ-dɛ̈l-yaa gat Ä-ɣi-kam gat Ca-pan na̱k piny kɛ thɛp. Cukɛ jɛ näk ɛn ram min ci kuäär Bɛ̈-bi-lɔn ɛ kuany ala rueec muɔ̱ɔ̱n ɛmɔ.
3
Kä cu I-ca-mel ji̱ Juda diaal tëë te kɛɛl kɛ Gɛ-dɛ̈l-yaa kä Midh-pa näk. Kä cuɛ rɛm ji̱ Kɛ̈l-da-ya tëë te thi̱n näk bä ɛn wi̱ni.
4
Kä kɛ jɛn cäŋ ɛmɔ, kɛ kɔr kä min ca Gɛ-dɛ̈l-yaa näk, kä ŋotdɛ thilɛ ram mi ci jɛ ni ŋa̱c,
5
cu wutni ti jiɛn bädäk cop. Bäkɛ kä Cɛ-kɛm, kɛnɛ Cilo kɛ Tha-mɛ-ria, ɛ ca wuɔ̱thkiɛn mut, kä ca bieynikiɛn rɛ̈t, kä cikɛ pua̱nykiɛn tëm no̱o̱ŋ kɛn muc bɛɛl kɛnɛ muc wa̱l in kur kur luaak Kuɔth Nhial.
6
Kä cu I-ca-mel gat Nɛ-thɛ̈n-yaa ben raar kä Midh-pa wëë kɛ lor, kä jälɛ kɛ wiee mëë bëë kä kɛ. Mëë cikɛ jëk, cuɛ kɛ jiök i̱, “Bia rɛc kä Gɛ-dɛ̈l-yaa gat Ä-ɣi-kam.”
7
Kä mëë cikɛ ben däär wec, cu I-ca-mel gat Nɛ-thɛ̈n-yaa kɛnɛ wutni tin tëë kɛ jɛ kɛɛl kɛ näk. Kä cu kɛ ri̱ŋkiɛn yuɔr rɛy jiɛw.
8
Duundɛ ɣöö cu wutni da̱ŋ wäl rɛydiɛn I-ca-mel jiök i̱, “/Cukɔ näk, kɛ ɣöö ta̱kɔ kɛ bɛl, kɛ lith kɛ tuari ti cakɔ tɛ̱̈ɛ̱̈ rɛy ka̱a̱kni.” Kä cuɛ kɛ päl /ken ɛ kɛ näk kɛɛl kɛ mäthnikiɛn.
9
Täämɛ ɛn pul in ci I-ca-mel ri̱ŋ nath diaal tin cɛ näk yuɔr thi̱n, ɛ pul mi di̱i̱t. Mëë lät kuäär ni Atha jɛ kɛ ɣöö bɛ rɔ ga̱ŋ pi̱w ti gaŋɛ rɔ kä Bɛ̈ca kuäär thukni duëli kuec caam. Kä cu I-ca-mel gat Nɛ-thɛ̈n-yaa jɛ thiäŋ kɛ ri̱ŋ nath tëë cɛ näk.
10
Kä inɔ cu I-ca-mel duɔth nath tëë te kä Midh-pa jak kä pɛ̈c kɛ amäni nyiee kua̱r kɛɛl kɛ nɛy diaal tëë te kä Midh-pa tin ci Nɛ-bu-dhar-dan bo̱o̱th ruëëcni dhɔaar kua̱r kɛ ka̱m Gɛ-dɛ̈l-yaa gat Ä-ɣi-kam, kä cu I-ca-mel gat Nɛ-thɛ̈n-yaa kɛ pɛc, kä cuɛ jiɛɛn kɛ kɛ wëë kui̱ këth ji̱ Am-on.
11
Duundɛ ɣöö mëë ci Yo-ɣa-nan gat Ka-re-ɛ̈k kɛnɛ bööth rɛmni diaal tëë tekɛ jɛ kɛɛl mi jiääk ɛ ci I-ca-mel gat Nɛ-thɛ̈n-yaa jɛ la̱tdɛ liŋ,
12
cukɛ nɛɛkiɛn diaal naŋ kä cukɛ wä nyiëëny kɛ I-ca-mel gat Nɛ-thɛ̈n-yaa. Cukɛ ben kä jɛ rɛy puɔ̱ɔ̱l in di̱i̱t in te kä Gib-yon.
13
Kä mëë ci naath diaal tëë te kɛɛl kɛ I-ca-mel Yo-ɣa-nan gat Ka-re-ɛ̈k kɛnɛ bööth rɛmni diaal tin te kɛɛl kɛ jɛ nɛn, cu lo̱ckiɛn tɛɛth ɛlɔ̱ŋ.
14
Kä inɔ cu naath diaal tëë ci I-ca-mel kɛ naŋ ɛla pɛ̈ɛ̈c kä Midh-pa rɔ̱ ri̱t bä kɛ kä Yo-ɣa-nan gat Ka-re-ɛ̈k.
15
Duundɛ ɣöö cu I-ca-mel gat Nɛ-thɛ̈n-yaa rɔ bar kɛ Yo-ɣa-nan. Cuɛ wä kɛ wutni da̱ŋ bädäk kä rɔ cuɛ, rɔ ma̱t ji̱ Am-on.
16
Kä ɛ jɛn cu Yo-ɣa-nan gat Ka-re-ɛ̈k kɛnɛ bööth rɛmni tëë te kɛɛl kɛ jɛ, pɛ̈ɛ̈c tëë ca naŋ pecä kä Midh-pa ɛ I-ca-mel gat Nɛ-thɛ̈n-yaa wä kän, rɛm kɛ gaat kɛ män kɛ jio̱wni kɛ kɔr kä mëë ci I-ca-mel Gɛ-dɛ̈l-yaa gat Ä-ɣi-kam näk.
17
Kä cu kɛ wä cieŋ kä Gɛ-ruth-kim-ɣam mi thiek kɛ Beth-lɛ-ɣɛm kä ɣöö bikɛ wä kä I-jëp,
18
kä dualkɛ kɛ ji̱ Kɛ̈l-da-ya, kɛ ɣöö ci I-ca-mel gat Nɛ-thɛ̈n-yaa gat Gɛ-dɛ̈l-yaa gat Ä-ɣi-kam mëë ci kuäär Bɛ̈-bi-lɔn jɛ jak kä kuäär muun näk.
Nuer Bible 1998
Nuer Bible Bible Society in South Sudan 1998, 2012
:
Tɔ̱a̱w Notethni̱