Annabi Yeremiya jaabi ɓe: “Booɗɗum, mi nani kadi. Mi toroto Jawmiraawo, Allah mooɗon ko ƴamɗon. Nden mi yecca on ko Jawmiraawo jaaboto, mi suuɗataa on koo ɗume.”
To on tokkake jooɗaago nder lesdi ndi'i, nden kam mi tabitinan on, mi nattintaa on, mi juboto on, mi ɗoofataa on. Ngam mi mimsitan sarru ngu mi ukkani on.
Taa kule laamiiɗo Baabila. Taa kule mo, ngam min Jawmiraawo mi ɗon wondi bee mooɗon, haa mi hisna on e juŋngo maako, mi rimɗina on. Non Jawmiraawo wi'i.
Ammaa onon luttuɓe nder Yahuuda, taa cale ɗowtanaago Jawmiraawo, Allah mooɗon e jooɗaago nder lesdi ndi'i. Taa mbi'e: Woodaa, sey min ndilla, min njooɗo haa lesdi Misra, ngam taa min meeta yi'ugo konu e nanugo luuwe konu, koo maatugo dolo. To on mbi'i bana nii, nden kam Jawmiraawo honooɓe asama, Allah Isra'iila wi'i ni'i: To on kuucitini gite mon haa lesdi Misra ngam jooɗaago ton,
Ndaa nii Jawmiraawo honooɓe asama, Allah Isra'iila wi'i: “Bana mi rufi tikkere am e ɓernuki am dow yimɓe Urusaliima, bana non ndufranmi ɓernuki am dow mooɗon, to on ndilli Misra. Mi laatinan on hulniiɓe, yimɓe kuɗan on, naaliran bee inɗe mon. On meetataa yi'ugo nokkuure nde'e boo.”
On ɗon majjina ko'e mooɗon. On neli yam haa Jawmiraawo, Allah mooɗon, on mbi'i yam: Do'ana min Jawmiraawo Allah amin. Anndin min ko o wi'ete fuu, min mbaɗan ɗum.