1
Ya kẹ ndị ahụn ile kị ndị-agha nọ bịa — kẹ Johananị nwa Karia kẹ Jezania nwa Hoshaya, uwẹ lẹ ndị Juda hụ ile wẹ kị — kẹ ndị uku kẹ ndị-nta.
2
Wẹ nọ sị Jerimaya, “Dodo kẹ ẹnyi rị a rịọ ị, mẹ ekpere rịọnị ẹnyi Osolobuẹ wụ Chuku i; yeni ẹnyi ndị họdụnị ẹka — yụ lẹ enwẹn i a hụngụọ nị ẹnyi ebuzini ọda kẹ ẹnyi buhan mbụ.
3
Rịọ Osolobuẹ wụ Chuku i n'ọ gwa ẹnyi ebe ẹnyi jẹnkọ d'e jẹn lẹ ihiẹn ẹnyi jẹnkọ d'e mẹ.”
4
Onyẹ-amụma wụ Jerimaya nọ sị wẹ, “Ọ hụghọ mma! M k'e mẹ ekpere, rịọ Osolobuẹ wụ Chuku ụnụ ihiẹn ụnụ sị m rịọ a; a gwachanrịn m ụnụ ihiẹn ile Osolobuẹ sikọ d'a sị m gwa ụnụ, ezuemẹkọnị m ụnụ ihiẹn ọwụlẹ.”
5
Ya wẹ nọ sị Jerimaya, “Osolobuẹ ya shịagbu ẹnyi ẹri lekẹ ezigbo ọshẹri wẹ gi e dọn ẹnya omẹni ẹnyi emẹni ihiẹn Osolobuẹ wụ Chuku i gwa ẹnyi, mẹchanrịn a k'o dọn ku ẹ.
6
Kẹ ihiẹn Osolobuẹ ku a sụọghọ ẹnyi k'ọ sụọnị ẹnyi, ẹnyi jẹnkọ d'e mẹ ihiẹn Osolobuẹ wụ Chuku ẹnyi hụn ẹnyi rị nwan a sị ị rịọnị ẹnyi ku, kẹni ọ rịnị ẹnyi mma. Ẹnyi jẹnkọ d'e mẹ ihiẹn Osolobuẹ wụ Chuku ẹnyi sị ẹnyi mẹ.”
7
Hụn mẹ akpọhịn iri, Osolobuẹ nọ gwa Jerimaya oku.
8
Jerimaya nọ kpọkikomẹ wẹ ile: Johananị nwa Karia lẹ ndị ọzọ ile kị ndị-agha hụn ya lẹ wẹ wị lẹ ndị ahụn ile wẹ ile wị — kẹ ndị uku kẹ ndị-nta.
9
Ya ọ nọ sị wẹ, “Lee ni ihiẹn Osolobuẹ wụ Chuku Izrẹlụ, hụn ụnụ zi m d'a rịọnị ụnụ sị m gwa ụnụ:
10
Omẹni ụnụ e rohutọ, nọdị alịnị, m sikọ d'a gọzi ụnụ; m k'a tụn ụnụ kẹ ụlọ, etikpọkọ m ụnụ; m k'a gbọma ụnụ, ehuepụkọ m ụnụ — makẹni ọ fụka m nị m mẹ ụnụ ihiẹnni ile m mẹ ụnụ.
11
Atụzịlẹ ni egun eze Babilọnụ ụnụ rị a tụ. Atụlẹ ni egun ẹ. Makẹni, m jẹnkọ d'a nọyeni ụnụ, zụọpụha ụnụ ẹka a. Mmẹ wụ Osolobuẹ e kugụọ a.
12
M k'e mẹni ụnụ omikẹn, mẹ ya nwẹn mẹzikwọ omikẹn ụnụ — ọ nị ụnụ kinhẹn alị ụnụ.
13
“Kanị omẹni ụnụ rị a sị, ‘Ẹlẹ ẹnyi k'a nọdị alịnị,’ ụnụ rị e nupụ isi okpuru Osolobuẹ wụ Chuku ụnụ,
14
a sị, ‘Mba, alị Ijiptu kẹ ẹnyi shikọ d'e biri. Agha akpọkọ ẹnyi ihun ebẹhụ, ẹnyi anụkọ opi-agha ndị-iṅẹnrẹn, ẹgụn egbukọ ẹnyi.’
15
Gọn ni nwan ntịn ihiẹn Osolobuẹ ku, ụnụ ndị họdụ alị Juda! Osolobuẹ ihiẹn ile rị okpuru ẹ, hụn wụ Chuku Izrẹlụ sị, ‘Ụnụ bu isi-ikẹn nị ụnụ shikọ Ijiptu, jẹnmẹ ebẹhụ d'e biri,
16
agha hụ rị a tụ ụnụ egun jẹnkọ d'e kunrun ụnụ imẹ alị Ijiptu ebẹhụ; ụnwụn ahụn ụnụ rị e hueni uhue jẹnkọ d'e sọnjẹn ụnụ alị Ijiptu, ụnụ a nwụntọ ebẹhụ.
17
Agha lẹ ụnwụn lẹ eje-emu sikọ d'e gbu ndị ile shi ọnwụn jẹnmẹ Ijiptu d'e biri. Onwọnni akpụ onyẹ ohu k'a hụn isi; onwọnni onyẹ k'a gbanahịn eje-ihiẹn m zilanị wẹ.’
18
Makẹni, Osolobuẹ ihiẹn ile rị okpuru ẹ, hụn wụ Chuku Izrẹlụ, sị, ‘Ụnụ jẹn alị Ijiptu, e gi m iwe-lẹ-olulu mẹshi ụnụ ikẹn kẹ m dọn mẹ ndị Jerusalẹm. M mẹgụ ụnụ ya, ụnụ e họnrin ihiẹn wẹ bụ ọnụ lẹ ihiẹn w'a sọ lẹ ihiẹn wẹ gi a bụ ọnụ, ihiẹn ifẹnrẹn. Ẹnya ụnụ ahụnkọzị alịnị.’
19
“Ndị Juda họdụnị, Osolobuẹ a gwagụọkwọ ụnụ, sị ụnụ, ‘Ejẹnlẹ ni alị Ijiptu.’ Nyanhankwọ nị n'a gbagụọ m ụnụ mkpịnsịn-ẹka ẹnya tannị,
20
nị ụnụ e mẹfieọlẹ ọda-ọda. Makẹni ụnụ gi ẹka ụnụ zi m d'e kunrun Osolobuẹ wụ Chuku ụnụ, sị m rịọnị ụnụ Osolobuẹ wụ Chuku ụnụ; ụnụ gi ọnụ ụnụ sị, ‘Gwahụ ẹnyi ihiẹn Osolobuẹ wụ Chuku ẹnyi ku, ẹnyi k'e mẹ ẹ.’
21
M nọ nwan gwa ụnụ tannị ihiẹn o ku, kanị, ụnụ achọnị nwan nị ụnụ mẹ ihiẹn Osolobuẹ wụ Chuku ụnụ zi m d'a gwa ụnụ.
22
Gọn nị nwan ntịn; ya we ụnụ ẹnya nị omẹni ụnụ e jẹn d'e biri Ijiptu hụ ụnụ sị ụnụ jẹnkọ d'e biri, agha lẹ ụnwụn lẹ eje-emu jẹnkọ d'e gbu ụnụ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc