ak kolenji maotiot Jeremia, Kisomin kele, kaswech somennyo, ak saiywech Jehovah Kamuktaindeng’ung’, achek tugul che kiging’etu; amu kiging’etu bik che ng’ering’ eng’ bik che chang’, ko u ye igeerech:
Kolenji anyun maotiot Jeremia ichek, Kaagasak; ogeero, asae Jehovah Kamuktaindeng’wong’ ko u ng’alekwok; ak kit age tugul ne wolwok Jehovah amwawok kioto; maung’enok kiy.
Kimwachi anyun ichek Jeremia kolenji, Ingoek Jehovah baoriat ne bo iman ak ko ne kiyani eng’ kwenunnyo, ngot ko magiyai ko u ng’olyot age tugul ne kaiyogunenen Jehovah Kamuktaindeng’ung’ iibwech.
Ngo ng’olyo ne mie, anan ngo ne ya, kegase it kutitab Jehovah Kamuktaindennyo, ne kiyoktochinin; si kobiit komieit eng’ achek, ye kigas it kutitab Jehovah Kamuktaindennyo.
ogas anyun ng’olyotab Jehovah, ee okwek che kiong’etu che o bo Juda; mwaei Jehovah ne bo lugosiek, Kamuktaindetab Israel, ko u ni kole, Ngot ogiiljige otokyige Misri, ak obe otebe oloto;
Igeitu noto eng’ bik tugul che tokyingei Misri kobendi kotebe oloto; begu eng’ rotwetab chok ak eng’ rubet, ak eng’ koroito: ak mami agot agenge eng’ ichek ne ng’etu anan ne chilili eng’ yaitiet ne aipchini.
Amu mwaei Jehovah ne bo lugosiek, Kamuktaindetab Israel, ko u ni kole; Ko u ye kigerong’ji neregekyuk ak neregekyuk che ng’wonen, bik che menyei Jerusalem, kerong’jinok anyun ko u noto neregekyuk che ng’wonen, ye obe Misri: ak oegu che kichubei, ak che kikwong’e ak che kisasei, ak che kichotei; ama ogeere olito kogeny.
Amu kioyachi kaberberisiet sobonwekwok; amu kioyokta awa oldab Jehovah Kamuktaindeng’wong’, ole, Saiywech Jehovah Kamuktaindennyo; ak imwawech ko u tugul che mwaei Jehovah Kamuktaindennyo, si keyai: