He he Izi kyh châ ta, Zôsia sawchapawpa Zudâh bei Zehôki abeina kô palihna liata, Ufrâti chavah kiah liata Kâkhemi khihpi liata adyuhna y ta, cha liata Babylaw bei Nebukaneza ta Izi bei Phiraoh Nekô pheisaihzy a pahniena kyh a châ:
Arâzy ky padia u la, Hy arâ pheisaihzy saih u, kiah teh u! Lakhu a khupa ta â ipa ta a duah u la, Nama aseizy chatapa ta, Adyuhna thua viahkao a ky teh u!
Kheihtazieta ma thlazohpa ta y ei ta, Hnôh amâ sypa ei hmô thlâh ha tly? Ama pasaiphazy tiahpa ta y ei ta, Rawrôhpa ta amâ râpai; Hnôh lâ rai a heih veih ei; Su to chichhihna ta a bie, Abeipa ta a tah.
Nile chavah hawhta a laipa cha Izi châ ta, Chavah ti laipa hawhta â chatlaopa cha ano a châ. Izi ta, ‘Lai aw na ta, Alei ei vao aw; Khihpizy nata ama khihsawzy Ei pahleipadia aw ei,’ a tah.
Hy arâzy saih u, tôh u la, Hy talailihzy saih u, a pathluah teh u! Pasaiphazy pua mawh ei sy: Vyhphao a chabapa Kusi mo nata Puti mozy pua ei sala, Likathaipa Ludi mo chhao pua mawh ei sy.
“Cha noh cha Pheisaihzy Abeipa Zehôvâh noh châ ta, Phuh a lana noh a châ; A khakhaipazy chô liata phuh â lana noh a châ. Pheisaihzy Abeipa Zehôvâh ta Maw lâ râh Ufrâti chavah kiah liata atheihna hlâ ha ta, Chavâta zaozi ta Izi mo cha, Lôhrâtlôna taihta palâ aw ta, Dâhphi paina taihta ama thisaih a doh aw.
Hy Izi sawchanô laihsa kôpa y, Kilia lâ khy la, sathaw thohna a kaw la teh! Thohna hluhpi hmâh ha chi ta, Châhrasala hraoleipa sai châ ei ta, Na châta tlâhna rai y vei.
“Izi râh liata phuah u la, Mikadô liata tlâh awh teh u; Mephi nata Tâpahe liata phuah u la, ‘Nama chheipâh ta a ypazy cha, Zaozi ta palâ khai ha ei ta, Chavâta â ipa ta a duah u la, A pachyh muh vy,’ tah teh u.
Abeipa ta chyhsa hluhpi chakhosa ta, Amâ pao thlu hôlô. ‘Thyu ei sih la, eima phopi lâ kua sih la, Eima pina râh lâ kua ha ei suh u, Tlybaituhpazy zaozi eimâ tyh hih,’ ama tah.
“Ei hrona reipa ta ei reih, Abeipa, a moh Pheisaihzy Abeipa ta a tah. Tlâhpizy hry liata tlâh sâh chaipa Tabaw tlâh hawhpa a vy aw ta, Tilaipi kiah liata Kâmel tlâh hawhpa â vy aw.
Hy Izi râhsawzy saih u, Seichâna lâ sie awpa ta nama hmozy a pachhuah teh u! Mephi khihpi cha roryhrapa ta y aw ta, Chyhsa pahrâ leina khih rypa a châ aw.”
Ama rao nawpa noh ama chô liata vaw tlô ha ta, Âmo hrie nawpa daihti a vaw tlô haw; Chavâta ama hry liata hlao hneipa pheisaihzy chhao, Viahchao dawpa pathawhpa hawh dei châ ei ta; Chariah hnôhchhypa ta, Â raohpa ta amâ râ khai haw; A duah thei veih ei.
A chariahpazy ta thatlôpa ta siehnao ei ta, Tho thlutuhpazy hawhta ahrei chhaota ama siehnao; Chavâta parih a râpa pyu hawhta, Ao sihpa pyu parosapa ta, Izi cha â râ syulyu haw.
A chariahpazy cha, Khawsu hlâta hluh via ei ta, Rei tiah awpa châ veih ei; Chavâta chahryh khai thei rimâ awpa a châ leipa, Izi râhmâhpa chhao ama thlu khai aw.
Pheisaihzy Abeipa, Izarei Khazohpa ta hetana heta a tah: “Moh teh u, Thebe khihpi liata Amaw khazoh, Phiraoh, Izi nata a khazohzy nata a beizy, Phiraoh nata ano a ngâtuhpazy chô liata hriena ei patlôsa aw.
“Nâ deikua cha, Hy Zakaw, Nâ chakaotuhpa y, chi leipa la, Hy Izarei, riahchhiepa ta y khah y. Pachâ teh, lâhlapi tawhta cha pachha aw na ta, Na chipathlazy cha, Ama seichâna râh tawhta ei pachha aw ei. Zakaw cha vaw kua aw ta, Sidiapa nata chhôhmohpa ta a y aw; Ahy ta hmah pachisa khao aw veih ei.
Hy nâ chakaotuhpa Zakaw, chi khah y, Ei cha ypâ mâh tâh. Ei cha to papuana phopi zydua cha, Tlokhuh ei pachhâsa aw ei; Nâ deikua cha tlokhuh cha pachhâsa aw va na. Hrie leipa ta deikua y leipa aw chi ta, Dâh dopa ta ei cha chhorei aw,” Abeipa ta a tah.