|
| 1 |
|
| Koan-hē lia̍t-kok, Siōng Chú ê ōe lîm-kàu sian-ti Iâ-lī-bí. |
|
| 2 |
|
| Chiam-tùi Ai-ki̍p: Koan-hē Ai-ki̍p -ông Nî-ko ê kun-tūi, in tī Iok-se-a ê kiáⁿ Iok-ngá-kèng choh Iû-tāi -ông tē-sì nî, tī Iù-hoat-la-tí-hô hô-piⁿ ê Ka-ki-bí-si hō͘ Pa-pí-lûn -ông Nî-pò͘-kah-nî-sat phah-pāi. |
|
| 3 |
|
| “Tio̍h chún-pī tōa-sòe tún-pâi, chhut-tīn kau-chiàn! |
|
| 4 |
|
| Tio̍h thò bé-oaⁿ, khiâ-bé, pâi-tūi, tì thâu-khoe, bôa chhiuⁿ, chhēng chiàn-kah!” |
|
| 5 |
|
| M̄-kú, Siōng Chú kóng, “Sī-án-chóaⁿ góa khòaⁿ-tio̍h in kiaⁿ-hiâⁿ thiat-thè? In ê ióng-sū thâi-su, piàⁿ sìⁿ-miā tô-cháu, m̄-káⁿ oa̍t-thâu; sì-chiu-ûi chhiong-móa khióng-pò͘! |
|
| 6 |
|
| Siōng gâu-cháu--ê mā cháu bōe lī, liân ióng-sū to bōe-tàng tô-thoat; tī pak-hng, Iù-hoat-la-tí-hô hô-piⁿ, in lóng poa̍h-tó peh bōe khí--lâi. |
|
| 7 |
|
| Chit-ê chhin-chhiūⁿ Nî-lô-hô tiòng-móa, chhin-chhiūⁿ kang-hô giâ-éng chhèng-koân--ê sī sím-mi̍h-lâng? |
|
| 8 |
|
| Sī Ai-ki̍p! I chhin-chhiūⁿ Nî-lô-hô tiòng-móa, chhin-chhiūⁿ kang-hô giâ-éng chhèng-koân; i kóng, ‘Góa beh tiòng-móa, beh im-móa choân-tōe; góa beh húi-hoāi siâⁿ-tìn, siau-bia̍t hia ê chū-bîn.’ |
|
| 9 |
|
| Chiàn-bé, chhiong ah! Chiàn-chhia, tu̍t-kek! Giâ tún-pâi ê Kó͘-si̍t kap Hut ê ióng-sū, khui-keng ê Lū-tí-a kun-peng, chhiong--chhut-khì!” |
|
| 10 |
|
| Chit-ji̍t sī Chì-koân Siōng Chú — Bān-kun ê Thóng-sòe pò-siû ê ji̍t, I beh hêng-hoa̍t te̍k-jîn. To-kiàm ōe thun-chia̍h, chia̍h kah pá, ōe lim huih, lim kah boán-chiok; tī pak-hng Iù-hoat-la-tí-hô hô-piⁿ, ū chè-mi̍h beh hiàn hō͘ Chì-koân Siōng Chú — Bān-kun ê Thóng-sòe. |
|
| 11 |
|
| Ai-ki̍p -lâng ah, tio̍h khì Ki-lia̍t chhē jú-hiuⁿ! Lín chia̍h chiah chōe io̍h-á lóng bô-hāu, bōe-tàng kā lín i-hó. |
|
| 12 |
|
| Lia̍t-kok ū thiaⁿ-tio̍h lí siū ê lêng-jio̍k; choân-tōe chhiong-móa lí ai-khàu ê siaⁿ; ióng-sū kap ióng-sū sio-lòng, nn̄g ê chòe-chi̍t-ē poa̍h-tó. |
|
| 13 |
|
| Ē-bīn sī koan-hē Pa-pí-lûn -ông Nî-pò͘-kah-nî-sat kong-táⁿ Ai-ki̍p, Siōng Chú tùi sian-ti Iâ-lī-bí só͘ kóng ê ōe. |
|
| 14 |
|
| Tio̍h tī Ai-ki̍p pò-iông, tī Bi̍t-toa̍t soan-pò͘, tī Bēng-húi-su kap Tap-pí-le̍k soan-pò͘, kóng, “Tio̍h pâi-tīn, chún-pī chok-chiàn! Chiàn-cheng ōe thun-bia̍t lín it-chhè só͘ ū--ê.” |
|
| 15 |
|
| Lín ê ióng-sū sī-án-chóaⁿ poa̍h-tó? In-ūi Siōng Chú kā in chhia-tó, hō͘ in khiā bōe tiâu. |
|
| 16 |
|
| In chiàn-pāi sì-sòaⁿ, tāi-ke saⁿ thún-ta̍h, hō͘-siōng kóng, “Khí--lâi! Lán tò-lâi-khì lán ê pún-cho̍k, tńg-lâi-khì lán ê kò͘-hiong, siám-pī khi-ap-chiá ê to-kiàm.” |
|
| 17 |
|
| In tī hia hoah kóng, “ Ai-ki̍p -ông Hoat-ló kan-ta ōe-hiáu kóng tōa-siaⁿ-ōe; i í-keng sit-khì i ê ki-hōe.” |
|
| 18 |
|
| Tōa-kun-ông, Siōng Chú — Bān-kun ê Thóng-sòe án-ni kóng, “Góa kí góa ê sìⁿ-miā li̍p-sè, Nî-pò͘-kah-nî-sat lâi ê sî, i ōe chhin-chhiūⁿ chhiau-oa̍t chèng-soaⁿ ê Tha-po̍k-soaⁿ, chhin-chhiūⁿ tī hái-piⁿ ê Ka-bi̍t-soaⁿ. |
|
| 19 |
|
| Ai-ki̍p -lâng ah, tio̍h kā siū-lia̍h beh ēng ê mi̍h-kiāⁿ khoán hó-sè, in-ūi Bēng-húi-su ōe siū sio-húi, pha-hng, bô lâng khiā-khí. |
|
| 20 |
|
| “ Ai-ki̍p sī pûi koh súi ê gû-bú, m̄-kú tùi pak-hng lâi ê gû-bông í-keng kàu lah! In í-keng lâi lah! |
|
| 21 |
|
| Ai-ki̍p chhiàⁿ--lâi ê peng, chhin-chhiūⁿ tiâu-lāi pûi ê gû-á, in lóng thiat-thè tô-cháu, m̄-káⁿ kè-sio̍k kau-chiàn; in-ūi in hoān-lān ê ji̍t lâi lah, siū hêng-hoa̍t ê sî í-keng kàu lah. |
|
| 22 |
|
| “ Ai-ki̍p tô-cháu, chhin-chhiūⁿ chôa teh sô hoat-chhut siaⁿ; te̍k-jîn beh kui-tīn chòe-hé lâi, chhin-chhiūⁿ chhò-chhiū-á ê lâng gia̍h pó͘-thâu kā i chhò-tiāu. |
|
| 23 |
|
| Siōng Chú kóng: I ê chhiū-nâ sui-jiân chin ām, te̍k-jîn mā ōe kā chhò-liáu-liáu; in-ūi te̍k-jîn pí chháu-meh khah chōe, bōe-sǹg--tit. |
|
| 24 |
|
| Ai-ki̍p ê jîn-bîn beh siū bú-jio̍k kiàn-siàu, in ōe hō͘ pak-hng ê lâng cheng-ho̍k.” |
|
| 25 |
|
| Siōng Chú — Bān-kun ê Thóng-sòe, Í-sek-lia̍t ê Siōng-tè án-ni kóng, “Lí khòaⁿ, góa beh hêng-hoa̍t Tí-pí-su ê sîn-bêng A-bûn, hêng-hoa̍t Ai-ki̍p, í-ki̍p i ê sîn-bêng kap kun-ông; góa mā beh hêng-hoa̍t Hoat-ló kap só͘-ū óa-khò i ê lâng. |
|
| 26 |
|
| Góa beh chiong in kau tī ài-beh thâi in ê lâng ê chhiú, chiū-sī Pa-pí-lûn -ông Nî-pò͘-kah-nî-sat kap i ê jîn-sîn ê chhiú. M̄-kú, Ai-ki̍p chiong-lâi ōe koh ū lâng khiā-khí, kap chá-chêng kâng-khoán.” Siōng Chú án-ni soan-pò͘. |
|
| 27 |
|
| “Góa ê po̍k-jîn Ngá-kok, m̄-bián kiaⁿ! Í-sek-lia̍t, m̄-bián sit-chì! Góa beh tùi chin hn̄g ê só͘-chāi kái-kiù lí, tùi lí siū-lia̍h ê tōe kái-kiù lí ê hō͘-tāi; Ngá-kok ê hō͘-tāi ōe tò-lâi ka-kī ê hiong-thó͘ an-ku-lo̍k-gia̍p, bô lâng ōe koh hō͘ in kiaⁿ-hiâⁿ. |
|
| 28 |
|
| Góa ê po̍k-jîn Ngá-kok m̄-bián kiaⁿ, in-ūi góa kap lí tông-chāi. Góa kóaⁿ lí khì hiah-ê kok-ka, góa beh kā in oân-choân húi-bia̍t. Lí leh, góa bōe kā lí oân-choân siau-bia̍t, m̄-kú bōe-tàng bô hêng-hoa̍t lí; góa beh chiàu kong-gī koán-kàu lí.” Siōng Chú án-ni soan-pò͘. |
|
|
|
|