Ring’ana eri rigakwanwa igoro ya Misiri, na igoro y’abarwani b’esegi ba Farao Neko, omoruoti o Misiri, abarenge ang’e norooche rw’Eufarati agwo Karikemisi, abwo Nebukadinesaro, omoruoti o Babeli, abuete ase omwaka o kane bw’okogamba kwa Yehoyakimu mosinto o Yosia, omoruoti bw’Abayuda:
Chika chibarasi chigende bosio, ne chigari chigende ne chinguru. Tiga chituoni chi’esegi chigende bosio: Abaetiopia na Abaputi, nabwo ababogoria be chinguba, na Abaludi nabwo abarwaneri amata.”
Inwe abanto ba Misiri more buna abaiseke abekungi, tiira gochia ase Gileadi monyore amaguta akogwenia. Namoisa konyora amariogo amange a bosa asemore, okogwenigwa tikori asemore.
“Kwana aya ase Misiri, moyararie ase Migidoli, ee, yararie ase Memifisi na Tapanesi: Tenena, bwebeke ang’e, ekiagera omoro nosirie ase chinsemo chiao chionsi.
Agatiga emeganda yaino ekagochwa na kogwa, erio bagakwana na gotebania Omonto ase omonto: Imoka, toirane ase abanto baito, ase ense yaito twaiboreretwe, totame korwa ase omoro bw’abagotochanda.
Omoruoti, oyore Omonene bw’Emeganda, nigo agoteba iga: Ekeene, buna inde moyo, oyomo onga buna Tabori ase egati y’ebitunwa binde na onga buna Karimeli, egetunwa kere ang’e nenyancha, ngocha are.
Misiri nigo egochura neriogi ringa buna eri’eng’iti egwekurura. Ababisa ba Misiri nigo bagocha bare ne chinguru. Nigo bagocha bare nebisire buna abagochia kogecha chinko.
Omonene bw’Emeganda, Nyasae bw’Abaisraeli, nigo agoteba iga, “Rora, nkorenta nde egesusuro igoro ase Amoni, enyasae ya Tebesi, na ase Farao na Misiri, na ase chinyasae chi’ense eyio, na ase abaruoti b’aroro, na ase Farao omonyene, na ase abanto bonsi baria bamosemeretie.
Nimbabeke ase amaboko abwo bakorigia gosiria obogima bwabo, na ase okoboko kwa Nebukadinesaro, omoruoti o Babeli, na ase abasomba baye. Korende nyuma y’ayio abanto nabamenye ase ense ya Misiri, buna engaki ya kare. Nabo Omonene atebire.”
“Korende inwe abanto ba Yakobo, abasomba baane, timoiroka. Inwe Abaisraeli, timokwa emioyo. Naama! Nimbatoorie korwa ase ense y’aare. Abanto ba Yakobo nabairane bamenye ase obotoereru na korendwa, na monto onde tari oraboboyie.