Kwademẹ ni ẹshin lẹ ụgbọ-anyịnyan agha! Nyinrin ni ẹshin-agha ụnụ! Werisọnmẹ ni ọnọdị agha! Kpuru ni okpu-agha! Sụọnchanpụ nị obo ụnụ! Yiri ni ẹwuru-igwe!
“Kanị ihiẹn m rị a hụn wụ ọnwan: ‘Egun sikọ d'a tụgbu wẹ! A gbama wẹ ọsọ! Wẹ k'e mẹri wẹ, a gba wẹ ụkụ-akpalẹ-alị — elekọdẹ wẹ ẹnya azụụn! Egun sikọ e jun ụzọ ile!’ Ya kẹ Osolobuẹ ku.
“Kanị onyẹ-ọsọ as'ẹka gbanahịn ọnwan; odogun-agha as'ẹka wanahịn ọnwan! Imẹ alị rị ẹbamịn-ugu, mkpẹnrẹn Iyi Yufretisi kẹ wẹ k'a nọ a kpọgburu a dan, a dangungwọn. Ya kẹ Osolobuẹ ku.
Ijiptu rị a fụli kẹ Iyi Naịlị, kẹ Iyi dọn e jun pụ ọnụ. Ijiptu hụ a sị, ‘M k'e jun pụ ọnụ, rukpumẹ ụwa ile; m k'e tikpọ obodo ichẹn-ichẹn lẹ ndị bi imẹ wẹ.’
“Ẹshin-agha, zụnban nị ọgbọ-agha! Ndị ụgbọ-anyịnyan, nyin ni ọnwụn-ọnwụn! Ndị odogun-agha, wẹ shi ihun — ndị Kushi lẹ Putu rịn'a hụn e bu akpaịn lẹ ndị Ludu hụn a gba ụta!
Mmẹ, Eze hụn ẹfan a wụ Osolobuẹ ihiẹn ile ri okpuru ẹ, rị e ku ẹ nị: Nebukadineza k'a bịarịrị d'e mẹ ụnụ ihiẹn, mmanị m nwụnhụn anwụnhụn! O k'a ka ibe ẹ nọkẹ ugu Tabọ; O k'a ka ibe ẹ nọkẹ Ugu Kamẹlụ hụn kachanrịn elu e jẹn mkpẹnrẹn ohimin.
M k'e we wẹ che ẹka ndị chọkọ wẹ ogbugbu, ẹka Nebukadineza eze Babilọnụ lẹ ndị isi-agha a. “Kanị, o mẹgụ, ịhịan jẹnkọ d'e bizi alị Ijiptu k'o dọn rị mbụ. Mmẹ wụ Osolobuẹ ku ẹ.
“Mmẹ wụ Osolobuẹ rị a sị yụ wụ odibo m Jekọpụ atụlẹ egun. Ọsụọn'a m tikpọchanrịn ndị alị ichẹn-ichẹn m feyịya ụnụ ye, etikpọchanrịnkọ m ụnụ. M k'e ye i hụ afụnfụn nị ụnụ marịn ihiẹn, kanị afụnfụn furuni sụọ; agbachanrịnkọ m ụnụ nkịtịn.”