Ad Soaala koees ne Ezipt dĩm a Neko, ne Ezipt tãb-biisi. Dĩma ra bee Karkemis, Efrat kʋɩlga noore, la a wʋmame tɩ Babilon dĩm a Nabikodonozor zaba ne a neba n tõog-ba. Yɩ-la a Zoakim naamẽ, a sẽn deeg naam tɩ yʋʋm naasẽ. A Zoakim yɩɩ Zɩɩda dĩm a Zoziyas biiga.
Bõe la m yaool n neẽ? Tãb-biisa basda raoodo, b tard n lebda poorẽ. B sẽega b gãndaadã, ned kam zoet n tees a sẽn teesẽ, ned ba a ye ka wẽnegd a poorẽ ye, sẽn lebẽ fãa yaa yɛɛsgo. Soaala n gomde.
Wiidi, wudg-y! Bilim-bilm, aya, wɩng-y! Tãb-biis gãndaado, loog-y taoore! Lʋɩ-y taoore Kus la Pʋt dãmba, lʋɩ-y taoor ne y gãndo, y gãnd-bõonese, loog-y yã, Lud rãmba ne y tãbdo!»
Mik bala, da-kãng la Soaala daare, dũni fãa Wẽnda sẽn da gũud la ra-kãnga. Da-kãng la b ra gũuda n na n tug beem ne b bɛɛba. Dẽ la b sʋʋga tar velbo, wa rũm-bãnde, la a yiisd a kom la a ko-yũud ne zɩɩm. Sẽn lebẽ fãa Soaala tara kɛɛbo, dũni fãa Wẽnda kʋʋd n samdame, yaa sẽn lebd nug goabg sẽnẽ, yaa Efrat kʋɩlga noore.
Wilg-y kibara Ezipt rãmba, taas-y kibara Migdol rãmba, taas-y Memfis la Tapanɛs tẽnse. Yeel-y-ba: «Ned kam fãa yals a zĩigẽ!» Zabra zoe n looga ne y yagse.
Ad-y Soaala, dũni fãa Wẽnd, wẽendame: «Bɛ wã na n waame, dẽ yaa bũmb sẽn ya sɩda wa sẽn ya sɩda tɩ Tabor yaa tãnga n leb n ya sɩda tɩ Karmɛl sulgd n geta mogrã.
Tãb-biis niyns sẽn da zabd n deegd ligda da tara fãa, bũmb da ka paoogd-b ye. Mik bãmb fãa na n lɛɛg n zoeeme. Sẽn na n sak-a n yaas ka ye, ra-beeda raare, m sẽn na n yik ne bãmba raare, sẽn na n sak-a n yaas ka ye.
Ezipt tãb-biisa soos n loogame n pa tol n maan bʋʋre, wa waafo, a sẽn yãend tɩ bɛɛba watame n na n tak zabr ne-a, n wat wala ra kɛɛdba, n yuumd b lare la b zende.
Dũni fãa Wẽnde, a Israyɛl Wẽnnaam, yeelame: «Mam na n yika ne a Amon, Tɛɛb wẽn-naandã, n yik ne Ezipt wẽn-naandsã, ne a dĩm dãmba. M na n yika ne Ezipt dĩma la sẽn teega yẽ fãa.
Mam na ninga bãmb fãa neb niyns sẽn dat n kʋ bãmba nugẽ: Babilon dĩma, a Nabikodonozor, nugẽ, la a tãb-biisa nugẽ. La kaoosg pʋgẽ, naab na n le wa zĩnda Ezipt tẽnga wala pĩnda.» Soaalã n wilg rẽnna.
Sã n ya foom, m biig a Zakoob, da zoe rabeem ye. Da bas raood ye, Israyɛl! Tɩ bala, ade, mam na n fãaga foom tẽn-zãorgẽ dãmb nugẽ, f yembda tẽngẽ dãmb nugẽ. A Zakoob na n le wa zĩnda ne laafi, tɩ ned ka be n na n kẽes-a rabeem ye.
Sã n ya foom, m biig a Zakoob, da maan dabeem ye! Soaala n gomde. Tɩ bala, mam bee ne foom. Mam sẽn da sẽeg yãmb tẽns niynsa pʋsẽ wã, tẽn-kãens na n wãame. Sã n yaa foom, m ka na n sɛɛs f rooga ye, m sɩbg-f lame bala wa sẽn da segde, m da ka tõe n bas-f saalle, wa ned sẽn ka tol n beeg ye!