Kɛ kui̱ I-jëp. Mɛmɛ ɛ ruac kɛ kui̱ rɛ̈m kua̱r I-jëp ni Pɛro Nɛko min te kiir Yu-pɛ-ree-tidh kä Kar-kɛ-mic mëë cu kuäär Bɛ̈-bi-lɔn ni Nɛ-bu-kad-nɛ-dhar ɛ joc kɛ ŋuaan runi Yɛ-ɣo-ya-kim gat Yo-ci-yaa kuäär Juda wëë i̱,
Kä cua̱ kɛ nɛn, cikɛ dual kä cikɛ rɔ̱ riet jɔk. Ci ji̱ kööriɛn diaal rɔ bar jɔk cukɛ rɔ̱ bar nikɛ pɛ̈th, /ken kɛ jɔkdiɛn lɛ liɛc, kɛ ɣöö te ni lia̱a̱ pekni diaal!
Cu I-jëp rɔ jiɛc ce̱tkɛ Kir, ce̱tkɛ kir mi ci muak. Kä cuɛ wee i̱, ‘Ɣän bä rɔ jiɛc kä bä wi̱c muɔ̱ɔ̱n thiäŋ, ɣän bä wi̱i̱ däk kɛnɛ ji̱kiɛn tin cieŋ thi̱n.’
Wiaa nhiam, lö ji̱ jiöŋkööri, kä carɛ rɔ̱ lö ji̱ thurbiɛɛli, kä a rɛm köör wä thi̱n, wutni Kuc kɛnɛ ji̱ Put tin ka̱pkɛ köötni, wutni Lu-dim tin ŋa̱ckɛ yor bääri.
Kä bi cäŋ ɛmɔ cua̱ cäŋ Kuɔth Nhial ni Kuoth in la Ruey Ɣɔaa. Cäŋ cuɔ̱tdɛ, mëë coolɛ ni rɔ kä ji̱ tɛ̈rɛ, kä bi thɛp kɛ cam amäni mi cɛ ria̱ŋ kɛ riɛmdiɛn. Kä bi kɛ cua̱ muc kä Kuoth Nhial ni Kuoth in la Ruey Ɣɔaa peek kuec caam wec in thieek kɛ kir Yu-pɛ-ree-tidh.
Cuɛ nɛy diaal ti ŋuan jak kä tëth. Kä cukɛ ruac kamnikiɛn wä kɛ i̱, ‘Jiɛ̈cɛ rɔ̱ kä luɔcnɛ jɔk kä nɛɛkɔn pa̱ny. Kɛnɛ mun ëë diëthkɛ kɔn thi̱n, banɛ rɔ̱ nɔ̱a̱n kɛ ji̱ tɛ̈ran.’
Kä cäŋ ɛ ni rɛm tin cɛ kɔk ce̱tkɛ nikɛ kɔ̱a̱l mi ci buuth rɛydɛ, cikɛ rɔ̱ ri̱t kä cikɛ rɔ̱ bar ni kɛɛl, ci /ken dee met cuɔ̱ŋ. Kɛ ɣöö ci cäŋ rikädiɛn ben kä kɛ, kɛnɛ gua̱a̱th tɔ̱ŋädiɛn.
“/Cu dual lö ja̱ŋdä ni Je-kɔb, kä cu bath lö I-thɛ-rɛl. Ɣän bä ji̱ luäk ni guäth mi nɔ̱a̱n, amäni kuayku ni muun in caakɛ pɛ̈c thi̱n. Kä bi Je-kɔb luny jɔk kɛ mal kä bɛ ti̱i̱l. Kä thilɛ mi bi jɛ jak kä dual.