Ng’alekab Moab: Mwaei Jehovah ne bo lugosiek, Kamuktaindetab Israel, ko u ni kole: Bwa eng’ Nebo! Amu kagoek karatia; kagitewer Kiriataim, kageluul: kagitewer Misgab, kagebut.
Kigotebe Moab kalyet koboch ming’inagtennyi, kigotepto kimnatennyi ko u divaik che mi ak misigikyik, che tom kerong’ eng’ teret age koba teret age: ak tomo keluul: ta kotinyei anyun amu noto anyinyindanyi, ak tom kowalak ng’uunennyi.
Ogeer anyun-o, bwanei betusiek, mwaei Jehovah, che ayokyini inendet bik che rong’u, ak koranda inendet; ak korong’ kogesgei eng’ terenikyik, ak kotui sotonikwak.
Orirji inendet okwek tugul che omi ole negite inendet, ak okwek tugul che ongen kainennyi; omwa ole, Katepto ano si koil siarit ne kim, kirokto ne kararan!
Arirjinin eng’ rirek che siirei che bo Jaser, ee ketitab sabibuk ne bo Sibma: kagolandae nyanjet temeniguk, kiit nyanjetab Jaser: kagonam luuloindet logoeguk che bo kemei, ak ole kitue sabibuk.
Ak kageisto kagasetab ge ak boiboiyet, eng’ mbaret ne rurei kot ak eng’ emetab Moab; ak kaagochi kogesgei divaik eng’ ole kituisie: mami ne tiechei eng’ waagatab kagasetab ge; maegu waagandanato waagatab kagasetab ge.
Cheei anyun muguleldanyu agobo Moab ko u ndurerusiek, ak kocheei muguleldanyu ko u ndurerusiek agobo bikab Kir-heres: kagobetyo anyun chang’indab tuguk che kiga konyor.
Kitepto ano si koyie! Iteitoi ano ichek! Katepto ano si kotukta batai Moab eng’ kalilanet! Egu anyun Moab ne kirorechin ak koek ne kwong’e ichek tugul che mi tabanwekyik.
Kageluul Keriot, ak kageche irimoikyik, ak koigei mugulelwekab bik che nyigonen che bo Moab, eng’ betunoto, muguleldab kwondo ne tinyei ng’wanindo ye machei kosigis.
Ibutyin keringet, ne mwee kaiyweisiet; ak konam mestet ne togosune keringet: ak aipchini inendet, noto ko Moab, kenyit ne aityini inendet biret, mwaei Jehovah.
Tonondos che mweei ama tinyei kimnatet eng’ uruetab Hesbon: amu kamong’une mat Hesbon, ak kamong’une liblibenetab mat, Sihon, ak kagobeel luitab Moab, ak metowekwak barak che bo ichek che boldos.