Dinzuɣu Yawɛ yɛliya, “Biɛhiŋ kani, saha kanna, ka n ni ti ŋme tɔbuchiriga bahi Raba din nyɛ Ammɔnim’ tiŋ’ la zuɣu. Di ni ti zani dabari, ka buɣim di di tiŋkpansi. Di saha ka Izraɛlnim’ mi ti kari ninvuɣ’ shɛb’ bɛn daa kari ba la.” Yawɛ n-yɛli lala maa.
Hɛshibɔnnima, kuhimiya, dama Ai wurimya. Raba paɣiba, kummiya. Somiya buri; kummiya, ka fiɛbimiya yimaŋ’ fiɛbisi. Dama bɛ ni ti gbahi Milikom min’ o tindaannima ni bɛn jɛmd’ o daba chaŋ.
Ti Duuma Yawɛ ŋun nyɛ Tɔbbihi Naa ŋɔ yɛliya, “N ni chɛ ka dabiɛm gbahi ya luɣilikam, ka yi wurim, ka sokam kpa o kpabu polo, ka so ku lan beni ŋun ni laɣim kuŋkɔɣinzɔriba luɣ’ yini.
Zaŋ chaŋ Ɛdomnim’ polo. Yawɛ ŋun nyɛ Tɔbbihi Naa ŋɔ ni yɛli shɛm m-bɔŋɔ: “Ɛdomnim’ lan ka yɛm yɔɣo? Yɛnnim’ la bi lan tiri niriba yɛm saɣisigu? Bɛ yɛm maa naami?
Amaa man’ ŋuna, n pun naai Iso zuliya zaa, ka yihi ba bɛ sɔɣisili shee, ka bɛ ku tooi lan sɔɣi. O bihi min’ o dɔɣiriba ni o ʒiʒiinitaba bahi yoli ka so lan kani.
Yawɛ yɛliya, “Hal di yi ti kpa ni n darigi ninvuɣ’ shɛb’ bɛn bi simdi tibidarigibo tibili, man’ di darigi bɛ tibili? N ku chɛ yi tibili darigibu. Di simdi ni yi nya tibidarigibo.”
Dama Yawɛ yɛliya “M poya, Bɔzira ni leei dabeenzɔbo mini ansarisimalibo tiŋa, ka zani dabari ni niriba ni yɛn turi shɛli, ka di fɔntinsi ti lu n-dahim doya sahakam.”
Yi ni kpɛhiri niriba dabiɛm shɛli ŋɔ mini karimbaani din be yi suhuri ni n-yɔhim yinim’ bɛn be tampima lɔna ni zoli kpaakpaanyom ni ŋɔ ha. Hal yi ni kul be katiŋ’ kaman tɔrili tiɛɣu ni be katiŋ’ shɛm la zaa yoli, n ni yihi ya nimaani siɣisi tiŋ’ na.” Yawɛ n-yɛli lala maa.
Kaman Sɔdom mini Gomɔra ni fɔntin’ shɛŋa din baɣi li ni daa wurim shɛm la, lala ka di gba ni wurim; ka so ti ku lan be nimaani, ka so mi ti ku lan ʒini nimaani. Yawɛ n-yɛli lala maa.
N ni ti kari Ɛdomnim’ bɛ yiya maa ni bahi kaman gbuɣinli n-tɔhi yi Jɔɔdɛn nyɔŋ ni na nti liri biŋkɔbiri bɛ mɔri ŋubbu shee la, ka zaŋ n ni pii so leei di zuɣulana. Dama ŋuni n-lee be ka mani? Ŋuni n-lee ni tooi tahi ma ʒiishee? Ka na’ ŋuni n-lee ni tooi mo ma?
Dinzuɣu wummiya n ni lo nia shɛli zaŋ chaŋ Ɛdomnim’ polo mini n ni yɛn niŋ Tɛmannim’ shɛm. Biɛhiŋ kani, bɛ ni dari bɛ bihi chaŋ, ka bɛ yɛla gbahi bɛ niriba dabiɛm.
Nyamiya, o ni ti du zuɣusaa m-pobilina kaman tɔrili la nti yirig’ o kpiŋkpama to Bɔziranima. Dindali maa Ɛdom tɔbbihi suhuri ni ti bemi kaman paɣ’ ŋun wolisiri ni o dɔɣi suhu ni be shɛm la.
Zaŋ chaŋ Damaskusnim’ polo. Hamatinim’ mini Aripadnim’ birimmi, dama bɛ wumla lahiba’ biɛɣu. Dabiɛm kpe ba pam, ka bɛ kɔŋ ʒiya kaman teeku kom din ku tooi fo n-doya la.
Deemiya bɛ suɣa mini bɛ biŋkɔbbaligu ni bɛ pateesanima ni bɛ nɛma zaa. Taɣimiya bɛ laakuma chaŋ ti leei yi dini. Ka bɛ ŋme kuŋ yɛli, “Yɛlibiɛɣu gili ti luɣilikam zaa.
Bɛ laakuma mini bɛ niɣi ni ti leei yi ni ŋme tɔbu di shɛba. N ni ti wurim buɣijɛmdiba bɛn pindi zuɣukpina ŋɔ kpɛhi yɔɣu, ka chɛ ka yɛlibiɛɣu yi luɣilikam na ti lu bɛ zuɣu.
N ni chɛ ka pɔhim yi zuɣusaa yaɣa anahi ŋɔ na ti ʒe Ɛlamnima, ka n chɛ ka pɔhim maa ʒe ba bahi luɣilikam, ka Ɛlam kuŋkɔɣinzɔriba ti zo n-kuli zuliya kam ni.
N ni chɛ ka dabiɛm gbahi Ɛlamnim’ bɛ dimnim’ bɛn bɔri ni bɛ ku ba sani. N ni yiɣisi n suhu pam bahi bɛ zuɣu n-chɛ ka yɛlibiɛɣu lu bɛ zuɣu. N ni chɛ ka tɔbu lu bɛ zuɣu hal ka n ti kpihim bɛ birili.” Yawɛ n-yɛli lala maa.