Lee nwan ihiẹn m k'e mẹ Amọnụ: Ogẹn lala hụn m'e gi yi oro agha, agha a bịa Raba wụ isi-alị ndị Amọnụ; wẹ k'e tikpọ Raba, o họnrin elumelu ẹjan; wẹ k'a dụn ụmụ-alị ile nọkunmẹn'ẹ ọkụn, Izrẹlụ a napụ ndị narịn a ihiẹn ẹ ihiẹn wẹ narịn a. “Mmẹ wụ Osolobuẹ ku ẹ.
Alị Hẹsh'bọnụ, gomẹ, nị e tikpọ wẹ alị Aị ndị Amọnụ! Ụmụ alị Raba, kwanma nị ụya! Yiri ni ẹkwa-achọ wẹ gi a kwan ụya; a gbahunmẹ ni, e yi kẹ ụnụ e mẹ imẹ obodo ụnụ. Makẹni wẹ jẹnkọ d'e weridẹ mmọn ụnụ wụ Molẹkị shi alị ọzọ, ya lẹ ndị a ghọn'a lẹ ndị ọzọ a rụnn'a ọrụn.
“Kị ị rị e gini ọdanmgbugbu ndị rị alị ị a nyan isi? Nị ihiẹn e junkẹ ọdanmgbugbu i, e hu kẹ mirin? Kịnị k'ị rị a nyannị isi — nwagbọọ kpahuni, hụn gi ihiẹn bu ọda o nwọn e dọn ẹnya, a sị, ‘Onyẹ k'a maye m ọgụn?’
“M sikọ nwan d'e wẹhẹn'i ihiẹn-egun; o sikọ d'e fihunmẹ i azụụn ile. Mmẹ, Onyẹ hụn nwọn ihiẹn ile, Osolobuẹ ihiẹn ile rị okpuru ẹ, ku ẹ. Ihiẹn egun hụ sikọ d'a chụpụ ụnụ ile onwọnni onyẹ k'e wegbama ndị gbayịyanị.
Kanị, mmẹ nwẹn jẹnkọ d'a gba ebọn Isọ wụ Ẹdọm ẹka, m k'e kpu ebe ile ọ warị oghe, ọ sakọzị ẹka zueri. M k'e tikpọ kẹ mmụ a kẹ ndị ebọn ẹ kẹ ndị nọkunmẹn'ẹ, ọ rịkọzị a.
Mmẹ wụ Osolobuẹ rị nwan e kun enwẹn m, e ku ẹ nị m k'e tikpọchanrịn Bozra wụ isi-alị Ẹdọm, o họnrin ihiẹn-ifẹnrẹn lẹ ebe nwọnlẹni ihiẹn rịn'a lẹ ihiẹn wẹ gi a bụ ọnụ; ụmụ-alị ile nọkunmẹn'ẹ k'a tọ mkpọkọ-mkpọkọ. Mmẹ wụ Osolobuẹ ku ẹ.”
Mmẹ wụ Jerimaya a nụgụọ ozi gha ẹka Osolobuẹ bịa: o zijẹngụọ onyẹ-ozi alị ichẹn-ichẹn d'a sị wẹ, “Kịgbama nị d'a lụsọn Ẹdọm agha! Lihi ni d'a lụ a agha ahụn!”
Egun i wẹ rị a tụ lẹ ihiẹn i rị e ro nị ya k'ị wụ e dufiegụọ ị, onyẹ nwẹn bi ẹgbata ọmụma eje-ihiẹn ghalẹni e ru ẹhụ, onyẹ nwẹn bi ebe kachanrịn elu e jẹn elu òke! Ọsụọn'a ị tụn ụlọ ị ye imẹ elu kẹ ugọn, m jẹnkọ d'a gha ebẹhụ nutu i. Mmẹ wụ Osolobuẹ ku ẹ.
“Lee ẹ! Kẹ ẹwọrọ dọn a gha ọfịa mkpẹnrẹn Iyi-Jọdanị a pụha ebe atụnrụn nọ a kpa nni mkpẹnrẹn mirin hụ ghalẹni a tahị: ẹrịra kẹ m k'a maye Ẹdọm idẹnmuzi, mẹ wẹ gba alị wẹ tọ. Onyẹ m chọ kẹ m e gi mẹ ẹ. Onyẹ nọ kẹ mmẹ? Onyẹ k'a jụ m ihiẹn ọwụlẹ? Elee eze k'a s'ẹka che m ọgụn?”
Lee ẹ, wẹ k'e fekwasị alị Bozra rị Ẹdọm kẹ ugọn dọn e feshi elu, a shịapụ nku e fetu d'e buru ihiẹn. Ogẹn ahụn, obi k'a nọ ndị odogun-agha Ẹdọm kẹ obi okpoho imẹ rị e mẹ.
Wẹ k'a narịn wẹ anyịnyan-mkpukpuke wẹ lẹ anụ wẹ ndị ọzọ. M k'e fe ndịnị ye azụụn ile, ndịnị bi atụ hụn a kọ ntutu azụụnnị lẹ azụụnnị. M k'e zihẹni wẹ nsọngbu azụụn ile. Mmẹ wụ Osolobuẹ ku ẹ.
M k'e mẹ ndị-iṅẹnrẹn alị Ẹlam mẹri ẹ, mẹ ndị chọkọ wẹ ogbugbu gbu wẹ; m k'e gi olulu sọn wẹ, tikpọ wẹ eje-ntikpọ. M k'e gi ọpịa-agha chụ wẹ d'e ru n'a gụchanrịn wẹ. Mmẹ wụ Osolobuẹ ku ẹ.