Molimi zuliya kam ni. Samiya tuuta, ka mol’ di yɛla. Miriya ka yi sɔɣi di shɛli. Yɛlimiya, “Bɛ tuhi deei Babilɔn Bɛl di vi. Di niŋ Mariduk alahiziba. Bɛ dih’ o binnana vi, ka di gar’ o buɣa la.
Dama zuliya shɛli yi nuzaa polo na ti lir’ o. Bɛ ni ti chɛ ka o tiŋgbani maa leei dabari, ka so ku lan be nimaani. Ninsalinim’ mini biŋkɔbiri zaa ni ti yi nimaani zo.
Bɛ ni ti bɔhi baŋ Ziɔn soli, ka zaŋ bɛ zuɣuri kpa nimaani polo, ka bɛ mini Yawɛ ti laɣim lo alikauli din kul ni ʒiɛya sahakam ka ku yiɣisi, ka bɛ ku lan tam di yɛla.
N niriba maa ŋmanila piɛ’ shɛb’ bɛn bɔrigi, bɛn guli ba taɣi ba kpɛhi yɔɣu ŋ-ŋmaligiri ba gindi zoya zuɣu mini daboya zuɣu, ka bɛ tam bɛ biɛhigu shee yɛla.
Ŋunkam daa nya ba ŋubiri ba mi, ka bɛ dimnim’ yɛli, “Ti ka taali, dama bɛ zaɣisila Yawɛ ŋun nyɛ ŋun guli ba ni yɛlimaŋli la, bɛ yaannim’ ni daa mali tahima Yawɛ so san’ la.”
Dama n yɛn chɛmi ka zuliya shɛb’ bɛn mali kpiɔŋ yi nuzaa polo tiŋgbɔŋ ni kana ti liri Babilɔn. Bɛ ni ti pie tab’ zani liri li n-ŋme n-deei li. Bɛ piɛma tɔbu ŋmanila tɔbbi’ yɛndaan’ so ŋun na ʒi n-to n-ziŋ.”
yi ma ni ti di vi pam, ka ŋun daa dɔɣi ya ti nya filiŋ. Nyama, o ni ti be zuliya kam nyaaŋa. O ni ti bemi kaman tiŋgban’ nɛli din kuui ka kom ka di ni la.
Yawɛ suhuyiɣisili maa zuɣu, so ti ku lan be nimaani, amaa di ni ti kpalimla dabari. Ŋunkam ti gari Babilɔn di ni gar’ o, ka niŋ o alahiziba di ni wurim shɛm maa zuɣu.
Bumiya tɔbu zambu bahi bɛ zuɣu luɣilikam. Bɛ gbaɣisi tɔbu; bini din taɣi ba luya. Bɛ daai di goma luhi. Dama Yawɛ m-bɔhi ba biɛri maa. Bɔhimiya ba biɛri. Niŋmiya ba kaman bɛ gba ni daa niŋ shɛm.
Di lan chɛliya ka so biri bimbira bee ka so kpuɣi atam di kpuɣibu saha Babilɔn. Bɛ zaa ni ti labi bɛmaŋmaŋ’ niriba sani tɔb’ shɛli din yɛn di ba maa zuɣu. Ka bɛ zaa ti zo n-kuli bɛmaŋmaŋ’ tiŋgbɔŋ ni.
Izraɛlnim’ ŋmanila gbuɣima ni kari doli piɛ’ shɛba n-wurim ba bahi. Tuuli, Asiria naa n-daa liri ba, ka pumpɔŋɔ Babilɔn Naa Nɛbukadnɛza mi bahi naai ba.
Di saha yi ti paai ni di dabisa maa ni, bɛ ni ti bɔ Izraɛlnim’ taali kɔŋ, ka Judanim’ daalahichi ti kpihim. Dama n ni chɛ ninvuɣ’ shɛb’ bɛn kpalim ka nyɛ n ni tiligi shɛb’ la taali. Yawɛ n-yɛli lala maa.
“Chamiya Mirataim tiŋgbɔŋ ni. Chamiya ti liri ba, ka liri Pɛkɔdnima n-ku bɛ zaa. Niŋmiya n ni zali ya ni yi niŋ shɛlikam zaa. Man’ Yawɛ n-yɛli lala maa.”
Yawɛ yoog’ o bidibbina ni be luɣ’ shɛli n-yih’ o suhuyiɣisili bidibbina, dama ti Duuma Yawɛ ŋun nyɛ Tɔbbihi Naa ŋɔ mali tuma ni o tum Babilɔn tiŋgbɔŋ ni.
Yimiya luɣilikam na ti liri ba. Yɔhimiya bɛ kambɔna. Laɣimmiya ba duhi kaman bɛ ni kpaai kawana duhi shɛm la n ku bɛ zaa. Di chɛliya ka binshɛli lan kpalim nimaani.
Laɣimmiya peentɔriba zaa bɛn gbibi tɔbiri, ka bɛ chaŋ ti liri Babilɔnnima. Teemiya gili Babilɔn zaa. Miriya ka yi chɛ ka so zo n-tiligi. Yomiy’ o o tuma ni simdi shɛm. Niŋmiy’ o kaman o ni daa kul niŋ ya shɛm, dama o daa niŋ karimbaani n-ta Yawɛ ŋun nyɛ Izraɛl’ Naawuni ŋɔ daɣiri.
Yawɛ ŋun nyɛ Tɔbbihi Naa ŋɔ ni yɛli shɛm m-bɔŋɔ: “Bɛ nahim Izraɛlnim’ mini Judanima. Ka bɛn daa gbahi ba maa zaa kul gbib’ ba kirikiri, ka zaɣisi ni bɛ ku chɛ ka bɛ chaŋ.
Ŋun yɛn fa ba bahi maa nyɛla kpiɔŋlana. O yuli m-booni Yawɛ ŋun nyɛ Tɔbbihi Naa. Biɛhiŋ kani, o ni lihi bɛ yɛlli maa zuɣu din ni chɛ ka o ti dunianim’ vuhim, amaa o ku ti Babilɔnnim’ bɛn’ vuhim.
Tɔbu lu di yuri mini chɛchɛbunsi ni tinzun’ tɔbbihi bɛn be sunsuuni zaa zuɣu ni di chɛ ka bɛ leei paɣiba. Tɔbu lu bɛ daazichi zuɣu ni di chɛ ka bɛ ŋme n-di li.
Bɛ gbibila tɔbiri mini kpana. Bɛ nyɛla ninkuunsinima, ka bi zɔri nambɔɣu. Bɛ vuri ŋmanila teeku kɔgbana vubu. Bɛ barila yuri m-pie taba kaman tɔbbihi ni chani tɔbu ni shɛm la n-kanna ni bɛ ti liri yinim’ Babilɔnnima.
Gbuɣinli ni yiri Jɔɔdɛn nyɔŋ ni na ti liriti biŋkɔbiri bɛ mɔri ŋubbu shee shɛm la, lala ka n yɛn libigi ba n-kari ba yihi tiŋ’ maa ni, ka zaŋ n ni pii so leei di naa. Dama ŋuni n-lee be ka mani? Ŋuni n-lee ni tooi tahi ma ʒiishee? Ka na’ ŋuni n-lee ni tooi mo ma?
Dinzuɣu wummiya Yawɛ ni lo nia shɛŋa zaŋ chaŋ Babilɔn polo ni o ni yɛn niŋ Babilɔnnim’ shɛm. Yɛlimaŋli, bɛ ni ti dari bɛ bihi chaŋ, ka bɛ yɛla ti gbaai bɛ tiŋ’ maa nim’ dabiɛm.