“Muaj ib haivneeg uas nyob rau sab qaumteb yuav tuaj tua lub nroog Npanpiloos kom ua suabpuam tas. Tej neeg thiab tej tsiaj txhu yuav khiav tas tsis nyob hauv lawm.”
“Kuv haivneeg zoo ib yam li pab yaj uas tus yug yaj cia lawv mus yuam kev rau saum tej roob. Lawv mus ib lub roob rau ib lub roob ib yam li pab yaj uas nrhiav tsis tau kev rov los tsev.
Kuv yuav tshoov tej haivneeg nyob sab qaumteb uas muaj zog heev ua ib pab tuaj tawmtsam lub nroog Npanpiloos; lawv yuav tuaj tsheej kev tuaj tua thiab txeeb tau lub tebchaws Npanpiloos. Lawv yog cov uas tua hneevnti ncaj heev, lawv tua tsis sav li.
Tus TSWV hais tias, “Cov Npanpiloos, nej huab kuv haivneeg. Nej zoo siab thiab txaus siab ib yam li tus xyuas nyuj dhia tom tshav zaub lossis ib yam li tus txiv nees xob uas hee laws,
“Cov neeg uas tua hneevnti yuav tuaj sawv ua tsheej phiaj vij tua lub nroog Npanpiloos. Cia li tua nej tej xub hneevnti rau hauv Npanpiloos, rau qhov nws tau ua txhaum rau kuv uas yog tus TSWV lawm.
Cia li qw thiab dhia mus vij lub nroog! Nimno Npanpiloos twb los thawj lawm. Luag twb rhuav nws tej ntsa yeej pob tas lawm. Kuv tabtom ua pauj cov Npanpiloos. Yog li ntawd, nej cia li ua pauj cov Npanpiloos thiab ua rau lawv ib yam li lawv tau ua rau lwm haivneeg lawm.
Tsis txhob cog thiab sau qoob hauv lub tebchaws ntawd li. Lwm haivneeg uas nyob hauv lub tebchaws ntawd yuav ntshai tej tubrog uas tuaj tua lub nroog Npanpiloos, lawv yuav cia li rov qab mus tsev.”
Tus TSWV hais tias, “Cia li mus tua lub tebchaws Melathayees thiab cov neeg Pekaus. Tua thiab rhuav kom lawv puastsuaj tas. Cia li ua txhua yam raws li kuv samhwm rau nej. Kuv yog tus TSWV uas hais li ntawd.
Cia li puav tua txhua phab tuaj thiab tsoo lub txhab rau khoom kom tawg; sau tej khoom uas lawv huab tau los teeb ua tej pawg ib yam li tej pawg nplej; cia li rhuav lub tebchaws kom puastsuaj tsis txhob tseg ib yam dabtsi li.
Cov neeg uas khiav hauv tebchaws Npanpiloos rov los rau hauv lub nroog Yeluxalees, lawv hais tias tus TSWV uas yog peb tus Vajtswv tau ua pauj rau cov Npanpiloos, vim tej uas lawv tau ua tsis zoo rau nws lub Tuamtsev.)
“Cia li hais kom cov neeg uas txawj tua hneevnti nqa lawv tej hneevnti thiab xubvos mus tawmtsam lub nroog Npanpiloos. Cia li mus vij lub nroog thiab tsis pub ib tug twg khiav dim li. Ua pauj rau nws raws li tej uas nws tau ua lawm, thiab ua phem rau nws raws li nws tau ua rau lwm tus lawm, rau qhov nws tau khavtheeb tawmtsam kuv uas yog cov Yixalayees tus TSWV uas Dawbhuv.
Yog li ntawd, nws tej tub hluas yuav raug tua tuag tas rau ntawm tej kev hauv nroog, thiab tagnrho nws cov tubrog yuav raug tua tuag tas rau hnub ntawd. Kuv yog tus TSWV uas hais li ntawd.
Tiamsis tus uas yuav tso lawv dim muaj zog heev, nws lub npe hu ua tus TSWV uas muaj hwjchim loj kawg nkaus. Nws yuav los txiav lawv rooj plaub thiab coj kev thajyeeb los rau lub ntiajteb no, tiamsis cov Npanpiloos yuav raug kev ntxhov siab.”
Cia li rhuav nws tej nees thiab tsheb nees kom puastsuaj! Cia kev tuag los raug tej tubrog uas nws ntiav tuaj pab, ua rau lawv qaug zog! Cia li rhuav nws tej txhab nyiaj thiab huab nws tej nyiaj mus.
Cia nws lub tebchaws qhuav nkig nkuav thiab ua kom nws tej dej tu nqhuab tas. Npanpiloos yog lub tebchaws uas muaj mlom ntau thiaj ua rau sawvdaws qaug siab rau tej mlom ntawd.
“Yog li ntawd, tej tsiaj nruab nrag, hma thiab tej noog tsis huv yuav los nyob hauv Npanpiloos. Txij no mus yav tom ntej yuav tsis muaj neeg mus nyob hauv li lawm.
Tej kev puastsuaj uas los raug lub nroog Npanpiloos zoo ib yam li tej uas los raug lub nroog Xaudoos, Kaumaulas thiab tej zos uas nyob ibncig ntawd. Yuav tsis muaj neeg los nyob qhov ntawd li lawm. Kuv yog tus TSWV uas hais li ntawd.
Tus Vajntxwv uas kav tebchaws Npanpiloos hnov txog tej xwm no, ua rau nws ob txhais npab tsaug tas tsis muaj zog li lawm. Kev ntxhov siab ua rau nws mob ib yam li tus pojniam uas mob plab yug menyuam.
Yog li ntawd, nej cia li mloog tej uas kuv npaj siab yuav ua rau lub nroog Npanpiloos thiab nws cov pejxeem. Luag yuav coj lawv tej menyuam mus, yuav ua rau txhua tus ntshai heev.