“Ndị nke m a wụrụgụọ atụnrụn tuhuni; ndị-ndu wẹ e duhuhugụọ wẹ, mẹ wẹ wahunmẹmẹ elu ugu rị ichẹn-ichẹn. Wẹ hụ a wahunmẹ elu ugu lẹ òke, zọ ebe wẹ nọ e zu ikẹn.
“Makẹni, elu hụ a sụọ ụnụ ụsụọ, ụnụ hụ a ghọghọ ụnụ hụn rị a kwanarịn ndị nke m ihiẹn wẹ. Makẹni ụnụ hụ a tụhunmẹ kẹ nwa-efin rị a zọkpọ ọka, e yi oro a zụnhunmẹ kẹ okẹn-ẹshin ndị kin akwanran.
Yi ni n'ẹ oro-agha azụụn ile! Ọ rịọmagụọ dodo! Ụlọ-agha a ile a dangụọ! E tikpọchanrịn wẹ mgbọn ẹ! makẹni mmẹ wụ Osolobuẹ rị e mẹgwarị a. Mẹgwarị n'a! Mẹ n'ẹ ihiẹn o mẹ ndị ọzọ!
Gbunarịn nị Babilọnụ ndị a kụn ihiẹn ugbo lẹ ndị a ghọ ihiẹn ugbo. Egun ọpịa-agha eṅẹnrẹn k'a chụdẹ abịamabịa ile. Onyẹ-onyẹ a gbaburu ndị nke ẹ; onyẹ-onyẹ a gbashi alị a.
O ru ogẹn ahụn, o ru ogẹn m k'e gi mẹ ẹ, wẹ k'a chọ njọ hụ m gi ma Izrẹlụ ikpe, ọ rịkọ a; wẹ k'a chọ njọ hụn Juda mẹ, ahụnkọ w'a — makẹni m k'a gbagharị ndị ahụn m k'e dọnmẹ ndụn imẹ wẹ. Mmẹ wụ Osolobuẹ ku ẹ.
“D'a maye ni ndị bi alị Mẹrataim rị Babilọnụ! D'a maye ni ndị bi alị Pẹkọdụ rị Babilọnụ! Chụ nị wẹ! Gbuchanrịn nị wẹ! Mẹchanrịn nị wẹ ihiẹn ile m sị ụnụ mẹ wẹ!
Okẹn ntikpọ kẹ wẹ k'e tikpọ Babilọnụ, igwe nwẹn wẹ te gi dụkpọ ụwa ile, nke Babilọnụ a gụ. Babilọnụ k'e họnrin ihiẹn hụn a tụ ndị alị ichẹn-ichẹn egun.
Osolobuẹ a kpọpụgụọ ụlọ ihiẹn-ọgụn a, o wepụhagụọ hụn o gi a ghọsị ọnụma a — makẹni Osolobuẹ ihiẹn ile rị okpuru ẹ, Onyẹ hụn nwọn ihiẹn ile, nwọn ihiẹn o jẹnkọ d'a rụn imẹ Babilọnụ.
Gha nị alị hụ teni bịa d'a maye ẹ ọgụn. Gbukpọchanrịn nị ebe wẹ e dọnmẹ ihiẹn w'e ri; kpọnkikomẹ ni Babilọnụ kẹ ikpọn-ọka! Tikpọchanrịn n'a! Egbuhọdụkwọlẹ ni onyẹ ọwụlẹ!
Kpọ nị ndị-ụta, ndị ile a gba ụta, nị wẹ kehunmẹ Babilọnụ; anịkwọlẹ ni onyẹ ọwụlẹ la! Mẹgwarị n'a ihiẹn o mẹ; mẹgwarị n'a ihiẹn ile o mẹ, makẹni ọ kpọgụọ Osolobuẹ mgba, Osolobuẹ, Onyẹ-nsọ Izrẹlụ.
Kanị onyẹ a gbapụhanị wẹ ze e ze; Osolobuẹ ihiẹn ile rị okpuru ẹ wụ ẹfan a. O k'e kinni wẹ ọnụ wẹ ru isi ẹ, kẹn'o ye alị wẹ udọn, bu nsọngbu tọnị ndị bi Babilọnụ. “Osolobuẹ sị:
“Lee ẹ! Kẹ ẹwọrọ dọn a gha ọfịa mkpẹnrẹn iyi-Jọdanị a pụha ebe atụnrụn nọ a kpa nni mkpẹnrẹn mirin hụ ghalẹni a tahị, ẹrịra kẹ m k'a dọn maye ndị Babilọnụ idẹnmizi, mẹ wẹ gba alị wẹ tọ. Onyẹ m chọ kẹ m'e gi mẹ ẹ. Onyẹ nọ kẹ mmẹ? Onyẹ k'a jụ m ihiẹn ọwụlẹ? Elee eze k'a s'ẹka che m ọgụn?”