|
| 1 |
|
| Se-tí-ka chē-ūi ê sî jī-cha̍p-it hè, tī Iâ-lō͘-sat-léng choh-ông cha̍p-it nî. I ê lāu-bú kiò-chòe Hap-bō͘-tha, sī Li̍p-ná -lâng Iâ-lī-bí ê cha-bó͘-kiáⁿ. |
|
| 2 |
|
| I chòe Siōng Chú khòaⁿ-chòe pháiⁿ ê sū, chiàu Iok-ngá-kèng ê só͘-chòe khì chòe. |
|
| 3 |
|
| Iâ-lō͘-sat-léng kap Iû-tāi hoat-seng chiah-ê sū, sī in-ūi Siōng Chú hoat siū-khì, tùi I ê bīn-chêng kā in kóaⁿ--chhut-khì. Se-tí-ka pōe-poān Pa-pí-lûn -ông. |
|
| 4 |
|
| Se-tí-ka thóng-tī tē-káu nî, cha̍p-ge̍h chhoe-cha̍p, Pa-pí-lûn -ông Nî-pò͘-kah-nî-sat chhōa i ê tāi-kun lâi kong-kek Iâ-lō͘-sat-léng, tī siâⁿ ê tùi-bīn chat-iâⁿ, koh tī sì-ûi choh thô͘-tui kong-siâⁿ. |
|
| 5 |
|
| Siâⁿ siū ûi-khùn, it-ti̍t kàu Se-tí-ka -ông tē-cha̍p-it nî. |
|
| 6 |
|
| Sì-ge̍h chhoe-káu, siâⁿ-lāi ki-hng chin giâm-tiōng, chū-bîn lóng bô mi̍h thang chia̍h, |
|
| 7 |
|
| siâⁿ siū kong-phòa; só͘-ū ê peng-sū thàu-mî tùi ông-kiong hoe-hn̂g hù-kūn, nn̄g ê siâⁿ-chhiûⁿ tiong-kan ê mn̂g hit-tiâu lō͘ tô-cháu. Pa-pí-lûn kun-tūi iáu tī sì-ûi kong-siâⁿ ê sî, in ǹg A-la-pa ê hong-hiòng tô-cháu. |
|
| 8 |
|
| Pa-pí-lûn ê kun-peng tui-jip Se-tí-ka -ông, tī Iâ-lī-ko ê pêng-goân jip-tio̍h i; i ê choân-kun lóng khì-sak i sì-sòaⁿ. |
|
| 9 |
|
| Pa-pí-lûn ê kun-peng lia̍h-tio̍h Se-tí-ka, kā i lia̍h-khì Hap-má tōe-khu ê Lī-pí-la ê Pa-pí-lûn -ông hia, tī hia siū sím-phòaⁿ. |
|
| 10 |
|
| Pa-pí-lûn -ông thâi-sí Se-tí-ka ê kiáⁿ, hō͘ i chhin-ba̍k khòaⁿ--tio̍h, koh tī Lī-pí-la thâi Iû-tāi só͘-ū ê kùi-cho̍k. |
|
| 11 |
|
| Koh ó͘ i nn̄g lúi ba̍k-chiu, ēng tâng-liān kā i liān--teh, tòa i khì Pa-pí-lûn, kā i koaiⁿ tī kaⁿ--ni̍h, ti̍t-kàu i sí hit-ji̍t. |
|
| 12 |
|
| Pa-pí-lûn -ông Nî-pò͘-kah-nî-sat tē-cha̍p-káu nî, gō͘-ge̍h chhoe-chhit, Pa-pí-lûn -ông ê jîn-sîn sī-ōe-tiúⁿ Nî-pò͘-sat-la-tàn chìn-ji̍p Iâ-lō͘-sat-léng, |
|
| 13 |
|
| ēng hé sio Siōng Chú ê sèng-tiān, ông-kiong, kap Iâ-lō͘-sat-léng só͘-ū ê chhù, í-ki̍p só͘-ū kùi-cho̍k ê chhù. |
|
| 14 |
|
| Tè sī-ōe-tiúⁿ ê Pa-pí-lûn kun-peng chiong Iâ-lō͘-sat-léng sì-ûi ê siâⁿ-chhiûⁿ lóng thiah-húi. |
|
| 15 |
|
| Hit-sî, sī-ōe-tiúⁿ Nî-pò͘-sat-la-tàn chiong bîn-kan sòng-hiong-lâng, lâu tī siâⁿ-lāi só͘ chhun ê jîn-bîn, kap tâu-hâng Pa-pí-lûn -ông ê lâng, í-ki̍p só͘ chhun ê sai-hū lóng lia̍h--khì. |
|
| 16 |
|
| M̄-kú sī-ōe-tiúⁿ Nî-pò͘-sat-la-tàn ū lâu chi̍t-kóa siōng sòng-hiong--ê, hō͘ in tī phû-tô-hn̂g kap chhân-hn̂g chèng-choh. |
|
| 17 |
|
| Pa-pí-lûn -lâng chiong Siōng Chú tiān-lāi ê tâng-thiāu, phûn-chō, kap tâng-hái lóng phah-phòa, chiong hiah-ê tâng ūn-khì Pa-pí-lûn. |
|
| 18 |
|
| In mā chiong tiáⁿ, thuh-á, teng-sim ê chián-to, óaⁿ-pôaⁿ-á, khǹg hiuⁿ ê phiat-á, kap sèng-tiān só͘-ū tâng ê khì-khū lóng poaⁿ--khì; |
|
| 19 |
|
| poe, khǹg hé-thòaⁿ ê phûn, pôaⁿ, tiáⁿ, teng-tâi, khǹg hiuⁿ ê phiat-á, au-á, só͘-ū kim-khì ê kim, gûn-khì ê gûn, sī-ōe-tiúⁿ lóng the̍h--khì. |
|
| 20 |
|
| Koh chiong Só͘-lô-bûn -ông ūi Siōng Chú ê tiān só͘ chō nn̄g ki thiāu, chi̍t ê tâng-hái, kap chō-ē cha̍p-jī chiah tâng-gû tòa--khì; chiah-ê khì-khū ê tâng chōe kah bōe-chhìn--tit. |
|
| 21 |
|
| Chit nn̄g ki thiāu siâng-khoán, múi chi̍t ki koân poeh kong-chhioh, chiu-ûi gō͘ kong-chhioh saⁿ-cha̍p kong-hun, kāu chhit-cha̍p-gō͘ kong-lî, tiong-ng khang-khak; thiāu ê téng-bīn ū tâng ê thiāu-táu; thiāu-táu koân chi̍t kong-chhioh saⁿ-cha̍p kong-hun; thiāu-táu ê chiu-ûi ū tâng chòe ê bāng-á kap sia̍h-liû. |
|
| 22 |
|
|
|
| 23 |
|
| Sì-bīn ū sia̍h-liû káu-cha̍p-la̍k lia̍p; bāng-á ê chiu-ûi sia̍h-liû chóng-kiōng chi̍t-pah lia̍p. |
|
| 24 |
|
| Sī-ōe-tiúⁿ Nî-pò͘-sat-la-tàn lia̍h tōa-chè-si Se-lâi-ngá, hù-chè-si Se-hoan-ngá, kap saⁿ ê sèng-tiān mn̂g-kháu ê siú-ōe; |
|
| 25 |
|
| koh tùi siâⁿ-lāi lia̍h chi̍t ê koán-peng ê koaⁿ-oân, ông ê chhit ê chhin-sìn, kap teng-bō͘ peng-sū ê hù-chí-hui-koaⁿ, í-ki̍p tī siâⁿ-lāi tú--tio̍h ê la̍k-cha̍p ê kok-bîn. |
|
| 26 |
|
| Sī-ōe-tiúⁿ chiong chiah-ê lâng tòa-khì tī Lī-pí-la ê Pa-pí-lûn -ông hia. |
|
| 27 |
|
| Pa-pí-lûn -ông tī Hap-má tōe-khu ê Lī-pí-la lóng kā in thâi-sí. Án-ni, Iû-tāi ê jîn-bîn siū-lia̍h lī-khui in pún-tōe. |
|
| 28 |
|
| Ē-bīn sī Nî-pò͘-kah-nî-sat só͘ lia̍h ê jîn-sò͘: Tī i thóng-tī tē-chhit nî, lia̍h Iû-tāi -lâng saⁿ-chheng khòng jī-cha̍p-saⁿ lâng; |
|
| 29 |
|
| Tē-cha̍p-poeh nî, tùi Iâ-lō͘-sat-léng lia̍h poeh-pah saⁿ-cha̍p-jī lâng; |
|
| 30 |
|
| Tē-jī-cha̍p-saⁿ nî, sī-ōe-tiúⁿ Nî-pò͘-sat-la-tàn lia̍h Iû-tāi -lâng chhit-pah sì-cha̍p-gō͘ lâng; chóng-kiōng ū sì-chheng la̍k-pah lâng. |
|
| 31 |
|
| Pa-pí-lûn -ông Í-bī Bí-lô-ta̍t tī i chē-ūi hit-nî, chiū-sī Iû-tāi -ông Iok-ngá-kun siū-lia̍h liáu-āu tē-saⁿ-cha̍p-chhit nî, cha̍p-jī-ge̍h jī-cha̍p-gō͘ ji̍t, te̍k-sià Iû-tāi -ông Iok-ngá-kun, pàng i chhut-kaⁿ, |
|
| 32 |
|
| koh ēng hó-ōe an-ùi i, hō͘ i pí siū-lia̍h tī Pa-pí-lûn kî-tha kok-ka ê ông ū khah-koân ê tōe-ūi. |
|
| 33 |
|
| Iok-ngá-kun thǹg-khì kaⁿ-lāi só͘ chhēng ê saⁿ, chi̍t-sì-lâng kap Pa-pí-lûn -ông chòe-hé chia̍h. |
|
| 34 |
|
| Iok-ngá-kun oa̍h--teh ê sî, Pa-pí-lûn -ông siúⁿ-sù i só͘ su-iàu ê seng-oa̍h hùi-iōng, ti̍t-kàu i sí hit-ji̍t. |
|
|
|
|