Kä mëë took Dhid-ki-yaa kuäär tëë kɛ run ti jiɛn da̱ŋ rɛw wi̱cdɛ kɛl, kä cuɛ ruëc kä Jɛ-ru-tha-lɛm kɛ run wäl kɛl, kä cɔal kɛ man i̱ Ɣä-mu-tɛ̈l nya Yir-mɛ-yaa kä Lib-na.
Kä kɛ cäŋ kä wäl kä pay wäl kɛ bäŋuan runi ruecädɛ cu Nɛ-bu-kad-nɛ-dhar Jɛ-ru-tha-lɛm mak kɛ rɛmdɛ kɛɛliw, kä cuɛ jɛ go̱l. Kä cukɛ jɛ ta̱th päny mi göl kɛ jɛ.
Kä cua päny wec to̱l. Cu kuäär kɛnɛ rɛm kɛɛliw rɔ̱ bar, cu kɛ wä raar rɛy wec kɛ wäär, kɛ duɔ̱p in te kam pa̱nyni da̱ŋ rɛw gekä kakä kua̱r, kä ci ji̱ Kɛ̈l-da-ya wec go̱l. Kä cukɛ wä kɛ kui̱ lo̱o̱lä Jɔr-dɛn.
Kɛ cäŋ kä wäl kä pay dhieec (min la wäl bäŋuan runi ruecä Nɛ-bu-kad-nɛ-dhar kuäär Bɛ̈-bi-lɔn), cu Nɛ-bu-dhar-dan raan läätdä kua̱r Bɛ̈-bi-lɔn, mi la bo̱o̱th yiëëni ben kä Jɛ-ru-tha-lɛm.
Cu Nɛ-bu-dhar-dan bo̱o̱th yiëëni tha̱a̱ŋ nath ti can kɛ duɔth nɛɛni tëë ci duɔth rɛy wec, kɛnɛ duɔth nɛɛni diaal tëë ci wä kä kuäär Bɛ̈-bi-lɔn amäni la̱a̱t diaal kɛɛl, naŋ ala pɛ̈ɛ̈c.
Cu mäni kɔ̱ɔ̱li maac, kɛnɛ took tin tɔatni. Kä cuɛ thääk kɛnɛ dha̱a̱ri, kɛ cuuŋni lɛmbärni kɛnɛ thän kɛ kui̱ wa̱l in kurkur, kɛ took kɛ kui̱ mucni naŋ. Cuɛ tin diaal tin la da̱a̱p kɛnɛ tin la ciɛk in bo̱r ka̱n bä.
Kä cuɛ yiëëth in do̱l tääthni dhaar puɔɔkä, kɛnɛ wääthni da̱ŋ rɛw, kɛ thääk cikä min bo̱r da̱ŋ wäl rɛw tëë te piny ɔ, kɛ cuɔ̱ɔ̱ŋ tëë ci Thɔ-lo-mon kɛ lät ni luak Kuɔth Nhial a ti /ca luäŋ kɛ thëm.
Kä te wi̱cdɛ kɛ kum yieethä min do̱l. Kä bär kumä ɛ jua̱th tetni da̱ŋ dhieec. Kä ca kɛt ce̱tkɛ jɔk jua̱a̱th, kä ca win kɛɛliw kɛ yiëëth in do̱l. Kä cua jɛn ta̱a̱ wääthä min dɔ̱ŋ ɛnɔ bä, ca kɛt ce̱tkɛ jɔk jua̱a̱th.
Kä cuɛ raan kɔaar kua̱r min la naath a bo̱o̱th ko̱o̱r, kɛnɛ ji̱ yien kua̱r da̱ŋ bärɔw ti te rɛy wec, kɛ bulkamiin bo̱o̱thä rɛ̈m min la naath a car, kɛ nɛy ti jiɛn bäkɛl ti kɔ̱ŋ ti ca jek rɛy wec naŋ ala pɛ̈ɛ̈c bä.
Kä cu mɛmɛ a pek nɛɛni tëë ci Nɛ-bu-kad-nɛ-dhar kɛ naŋ ala pɛ̈ɛ̈c. Kɛ ruɔ̱n kä bärɔw cuɛ nɛy ti bathdɔɔri dɔ̱ŋ diɔ̱k wi̱cdɛ jiɛn da̱ŋ rɛw wi̱cdɛ diɔ̱k naŋ kä ji̱ Juudh.
Kɛ ruɔ̱n kä jiɛn da̱ŋ rɛw wi̱cdɛ diɔ̱k ruecä Nɛ-bu-kad-nɛ-dhar, cu Nɛ-bu-dhar-dan in la bo̱o̱th yiëëni nɛy ti kur da̱ŋ bärɔw wi̱cdɛ jiɛn da̱ŋ ŋuaan wi̱cdɛ dhieec naŋ ala pɛ̈ɛ̈c. Kɛn nɛy diaal cu kɛ a nɛy ti bathdɔɔri ŋuaan wi̱cdɛ kur bäkɛl.