Omwei osoruge, okwek lagokab Benjamin, omong’u eng’ Jerusalem, ak oguut iriaget eng’ Tekoa, ak onamji barak kitab kaborunet eng’ Bet-hakerem: amu itu yaitiet eng’ murot ne bo katam, ak ng’emisiet ne o.
Amu kagomwa Jehovah ne bo lugosiek ko u ni kole, Oluul, oeb ketik, ak owasyi ng’ung’unyek Jerusalem: nito ko nganaset ne kibirei; sastaet inegei ne mi kwenunnyi.
Mwaei Jehovah ne bo lugosiek ko u ni kole, Turoti ichek komie che ng’etunotin che bo Israel ko u ketitab sabibuk: ketyi eung’ung’ kogeny kitongok ko u ne butei sabibuk.
Kanyiia anyun neregek che ng’wonen che bo Jehovah; kaang’et aranye: rong’ji neregechoto lagok che mi oret, koboto tuiyetab murenik: amu kimuti manong’otiot ak osotiot, ne kigoosit koboto ne negit kolil.
Tos kiililanso ye kingoyai tuguk che kiwechei? Achicha, ma ililanso agot kitigin, ama walogis togochikwak: ibutos anyun koboto icheget che ibutos: tun kiwirtoi eng’ betut ne anyonjini ichek abire, mwaei Jehovah.
Mwaei Jehovah ko u ni kole, Otononie eng’ ortinwek ak ogeer, ak oteeb ortinwek che bo keny, ole mi oret ne mie, ak obendate noto, si osich kamuung’et eng’ sobonwekwok: ago kile, Magibendote ortinwechoto.
Tilei nee che nyamdut ngeibwa eng’ Sheba, ak tuguk che u mutwek che nyamdut che kiibune emet ne loo? Ma taachaksei kagochinoikwok che bo beelset, amachame tiseiywekwok.
Tinyei kwanget ak ng’otit; koromen, ama tinyei rirenet; morori cheenywa ko u nyanjet, ak lanyei mbartanyisiek; chobot age tugul ko u chito ne wendi luget, kobokyinin, ee cheptab Sion.
Ee cheptab bikyuk, igermenege kuniok, ak iburburege orek: itee, ko u ye kitechin werit ne kigii inegei, kateet ne ng’wan mising’; amu cheech ng’emindet.