हे बेन्यामीनीहरू हो, सुरक्षाको निम्ति यरूशलेमबाट निस्केर भाग! तकोमा तुरही बजाओ र बेथ-हक्केरेममा आगो सल्काई धुवाँको सङ्केत दिने व्यवस्था गर! उत्तरबाट विपत्ति र विनाश आउन लागेका छन्।
तिनीहरूले यसो भन्नेछन्, “यरूशलेममाथि हमला गर्न तयार होओ! सबै तयारी गर! मध्यदिनमा हामीले त्यसमाथि आक्रमण गर्नेछौं। तर ढीलो भइसक्यो! दिन ढलिसक्यो। घाम डुब्न लागेको छ।
जसरी इनारमा ताजा पानी निस्किरहन्छ, त्यसरी नै यरूशलेमले आफ्ना दुष्ट्याइँ निकालि रहन्छ। त्यहाँ हिंसा र विनाश भएको सुनिन्छ, म त्यहाँ रोग-बिमार र चोटैचोट मात्र देख्छु।
हे यरूशलेमका मानिसहरू हो, यी कष्टहरू तिमीहरूका निम्ति चेतावनी होस्। नत्रता म तिमीहरूलाई त्याग्नेछु, तिमीहरूका सहरलाई उजाड पार्नेछु र त्यो निर्जन हुनेछ।”
मैले जवाफ दिएँ, “मेरो कुरा कसले सुन्ला र? क-कसलाई भनूँ र चेतावनी दिऊँ? तिनीहरूले ढिट भई आफ्ना कान बन्द गरेका छन्। तपाईंको वचन तिनीहरूको निम्ति ठोकर हुन्छ र त्यसमा तिनीहरूले कुनै आनन्द पाउँदैनन्।
परमप्रभु, तपाईंको तिनीहरूमाथि जुन क्रोध छ, त्यो मभित्र पनि बल्दछ। अब म त्यो थामेर राख्न सक्दिनँ।” तब परमप्रभुले मलाई भन्नुभयो, “त्यो मेरो क्रोध बाटामा भएका केटा-केटीहरू र युवाहरू भेला भएका ठाउँमा खन्याइदे। लोग्ने-स्वास्नीहरू सबै लगिनेछन्, बुढापाकाहरू पनि छोडिनेछैनन्।
तिनीहरूले मेरा प्रजालाई अलि-अलि मात्र कोतरेजस्तो गरी पट्टी बाँधिदिन्छन्। तिनीहरू भन्छन्, ‘शान्ति, शान्ति, सबै ठीकै छ,’ तर खास सुख-शान्ति कहीं पनि छैन।
यी घिनलाग्दा काम गरेकोमा तिनीहरूले लाज मान्नुपर्दैनथ्यो? तर तिनीहरूले लाज ठ्याम्मै मानेनन्। लाज भनेको के कुरा हो, तिनीहरूले जानेनन्। यसकारण अरू नाश हुनेहरूसँगै तिनीहरू पनि नाश हुनेछन्। मैले तिनीहरूलाई दण्ड दिएको समयमा तिनीहरू नष्ट हुनेछन्। म परमप्रभु बोलेको छु।”
परमप्रभु आफ्ना प्रजालाई भन्नुहुन्छ, “चौबाटोमा उभिएर हेर। पुराना बाटोहरू र सर्वोत्तम बाटो खोज र त्यस बाटोमा हिंड अनि तिमीहरूको जीवन शान्तिसित बित्नेछ।” तर तिनीहरूले भने, “अँहँ, हामी त्यसो गर्दैनौं।”
ए पृथ्वी, सुन! यिनीहरूका सबै जुक्तिहरूको फलस्वरूप म यस जातिमाथि विनाश ल्याउँदै छु किनभने यिनीहरूले मेरा वचन इन्कार गरेका छन् र मेरा व्यवस्था पालन गरेका छैनन्।
तिनीहरूले आफ्ना धनु र तरवार हातमा लिएका छन् र तिनीहरू निष्ठुर र निर्दयी छन्। तिनीहरू घोडामा चढेर आउँदा तिनीहरूको आवाज समुद्रको गर्जनझैँ हुन्छ। यरूशलेमसित लडाइँ गर्न तिनीहरू आइरहेका छन्।”
यरूशलेमका मानिसहरू भन्छन्, “हामीले यस कुराको खबर पायौं र हाम्रा हात लल्याकलुलुक भएका छन्। सुत्केरी व्यथा लागेकी स्त्रीझैँ हामी वेदना र कष्टमा परेका छौं।