n'aw te lonanw tɔɲɔ, ni falatɔw, ani firiyamusow, n'aw te mɔgɔ jalakibaliw faga yɔrɔ nin na, n'aw ye batofɛn wɛrɛw ye k'u to yen, min be bɔnɛ se aw ma,
« ‹Mun! Aw be soɲali kɛ, ka mɔgɔw faga, ka kakalaya kɛ, ka kɛ seere galontigɛlaw ye. Aw be * Baali sɔn, aw te batofɛn minw lɔn, aw be taga u minɛ siya wɛrɛw fɛ.
Deenw be lɔgɔ ɲini, faaw be tasuma mana, musow be mugu nɔɔni ka ŋɔmi yiran k'o di joo ma min be wele ko Sankolo kɔnɔ masamuso, ani ka jii bɔn ka batofɛn wɛrɛw sɔn janko ka ne dusu dimi.
O kama, ne Matigi, Masaba ko: Ne bena dimi. N ka dimi fariya bena sin yɔrɔ nin ma, ani mɔgɔw, ni begɛnw, ni yiriw, ani sɛnɛfɛnw ma. A bena kɛ i ko tasuma min te faga.»
Nga ne ye min ɲini u fɛ, o ye nin ye: N ko: ‹Aw ka mɛnni kɛ ne fɛ, o la, ne bena kɛ aw ka Ala ye, aw bena kɛ ne ka mɔgɔw ye. Ne ye sira min don aw seen kɔrɔ, aw k'o taama ka ɲa, aw bena hɛrɛ sɔrɔ.›
«Aw kunsigi minw b'a yira ko aw ye ne taw ye, aw ka olu tigɛ ka fili, ka dusukasidɔnkili la kuluw kan. Bari ne Masaba te * filankuru fɛ min be ne dusu dimi.
U ye sɔnnikɛyɔrɔ lalaga Bɛninɔn kɔkɛnɛ na, min tɔgɔ ko Tafɛti, waasa k'u dencɛw n'u denmusow kɛ sɔnnifɛnw ye k'u jɛni o yɔrɔ la. Ne m'o sira di, ne ma miiri o la ka ye.
«O la, loonw be na, ne Masaba le ko ten, mɔgɔ si ten'a fɔ tugu Tafɛti ni Bɛninɔmu kɔkɛnɛ, U ben'a wele ko Mɔgɔfaga kɔkɛnɛ. Tafɛti bena kɛ sudonyɔrɔ ye yɔrɔtanya kama.