×

Ñanderuete Ñe’ẽ Porã 2015

7

1
Ñanderuete ñe’ẽ ou Jeremíaspe, ha he’i:
2
Eñembo’y pende Ruete rogaguasu rokẽme, ha emyasãi upépe ko ñe’ẽ kóva, ha péicha eréta: Pehendúke pende Ruete ñe’ẽ, Judayguáva guive, ha peikéva guive ko okẽ rupi peñemomirĩ pejeitývo pende Ruete renondépe.
3
Péicha he’i pende Ruete, Yvága Atykuéra Jára, Israel Jára: Pemyatyrõ porã pende rape ha pene rembiapo, ha Che pomohenda jevýta ko yvy kóvape.
4
Aníke pejeroviátei umi ñe’ẽ japu rehe, he’i ramo jepe hikuái: Ñanderuete róga, Ñanderuete róga, kóa ningo Ñanderuete rogaguasu.
5
Pemyatyrõ ramo hekoitépe pende rape ha pene rembiapo; ha peiko ramo añetehápe justícia poguýpe,
6
ha ndapejopyvéi ramo tetã ambueyguápe, ni ityre’ỹvape, ni imenave’ỹvape, ha napeñohẽvéi ramo ko yvy kóvape heko potĩva ruguy, ha ndapeikói ramo ambue jarakuéra rapykuéri oguerúva mba’evaínte peẽme g̃uarã,
7
upéicharõ Che pomoingo jevýta ko yvy kóvape, Che ame’ẽmava’ekue pende rukuérape opaite árape g̃uarã.
8
Peẽ ningo pejerovia umi ñe’ẽ añete’ỹva ha výro reíva rehe.
9
Peiko peporomonda, peporojuka, pemongy’a pene menda reko, peme’ẽ rei pene ñe’ẽ, ha hi’ári pemyatatĩ Baálpe mba’e ryakuã porã, ha peiko ambue jarakuéra peikuaa’ỹva rapykuéri.
10
Ha upéi peju ha peñembo’y che rógape, ogueraháva che réra, ha peje: Ore roiko porã nde poguýpe, ha upéi pejapovepeína pene rembiapo vaieta.
11
Oiko nga’u piko che rogaguasu, pende resa renondépe, mondaha raity ramo. Ko óga kóva oiporu ramojepe che réra porãite, peẽ pejapo ichugui mondaha raity.
12
Tapeho Silópe, Che aiko haguépe ñepyrũrã, upépe oñemomba’eguasuva’ekue che réra, ha pehecháta mba’épa ajapóra’e hese che retã Israel ñañangue rehe.
13
Ha ko’ág̃a, peẽ pejapopeína ko’ã tembiapo ivaíva, he’i pende Ruete, Che poavisa porã ramojepe ko’ẽ ko’ẽ rehe napehenduséi, ha pohenói ramojepe peẽ napepenái cherehe.
14
Upévare ajapo haguéicha Silo rehe, Che aiko haguépe, ajapóta katuete avei ko che rogaguasu rehe, ame’ẽva’ekue peẽme ha pende rukuérape, peẽ katu pejeroviánte ko ogaguasu rehe pemomba’eguasu rãngue che réra.
15
Upévare Che pomosẽta che resa renondégui amosẽ haguéicha yma pende ryvy Efrain ñemoñarenguérape.
16
Ha nde, Jeremías, anítei reñembo’e ko tetã kóva rehe, ha aníke nerasẽtei hese, ha aníke remba’ejerurétei chéve hesekuéra, Che norohendumo’ãi.
17
Nderehechái piko mba’épa ojapo hikuái Juda tavakuérape ha Jerusalen callekueraha rupi.
18
Ita’ýra ombyaty jepe’a, ituvakuéra omyendy pe tata, kuñakuéra katu ombojehe’a harína, y ha levadúra, ojapo hag̃ua pan ijyvága jára kuñáme g̃uarã ha oguenohẽ víno ijára gua’úpe g̃uarã chembopochy hag̃ua.
19
Chembopochy piko hikuái, he’i pende Ruete: Térãpa ha’ekuéra voi oñembopochýta og̃uahẽ vove pe ára oñemotĩ hag̃ua.
20
Upévare péicha he’i pende Ruete, pe Jaraitéva: Peikuaa porãke, Che añohẽta che py’aro ha che pochy ko yvy kóva ári, hetãyguakuéra, hymba, ijyvyra’a ha ikoga’akuéra ári ha ndoguemo’ãi che pochy rendy.
21
Péicha he’íkuri Yvága Atykuéra Jára, Israel Jára: Pemoĩ pene kuave’ẽmby ha kuave’ẽmby ojehapypáva ojo’ári, pe’u hag̃ua ho’okue.
22
Ko’ã mba’e Che nda’eiva’ekue pende rukuérape, ha mba’eveichagua tymba kuave’ẽmby ndajapoukaiva’ekue, aguenohẽvo ichupekuéra Egípto retãgui.
23
Che ha’e uvei ichupekuéra cheñe’ẽrendu hag̃ua. Pejapo che ñe’ẽ ha Che aikóta pende Jaratee ramo, ha peẽ peikóta che retã ramo; ha peguata porãta ramo che rapére, Che ha’e haguéicha peẽme, opaite mba’e osẽ porãmbáta peẽme.
24
Ha’ekuéra katu nohendúi ha ndojapói che ñe’ẽ, oikónte ipy’a hatã ha iñañáva ohekombo’e háicha ichupekuéra, ha oho hikuái tapykue gotýo oho rãngue henonderã gotýo.
25
Pende rukuéra osẽha ára guive Egípto retãgui ko ára kóva peve ambou’aína peẽme chekane’õ’ỹre che rembiguaikuéra, che profetakuéra.
26
Peẽ katu nacherendúi ha ndapejapysakái peñembopy’a hatãve uvei ha pene rembiapo ivaive pende rukuéra rembiapógui.
27
Ha nde, Jeremías, erepaitéta ichupekuéra ko’ã ñe’ẽ ko’ãva, naneñe’ẽrendumo’ãi ramojepe, ha nopenamo’ãi ramojepe nderehe eavisa porã katu ichupekuéra.
28
Ereva’erã ichupekuéra: Kóa ha’ehína pe tetã ohenduse’ỹva Ijára, Ituvateépe, ha ndoipotaiva’ekue oñemboheko ichupekuéra ha pe añetegua okañy ichuguikuéra.
29
Nde, Jerusalen rajy, eikytĩ ne akã rague iporãva, ha emombo, ejahe’o cérro perõre; Ñanderuete omboyke ha oity ko tetãme ombopochy haguére ichupe.
30
Juda ñemoñarenguéra ojapo mba’evai che resa renondépe, he’i pende Ruete; ha’ekuéra omoĩ ijára gua’u che rogaguasúpe, oñehenoiháme che réra porãite, ha péicha omongy’apa che róga aikohápe.
31
Ha’ekuéra omopu’ã ikuave’ẽmby renda Tófetpe, opytáva Hinom ra’y cerrokuéra pa’ũme, upépe ohapy tata rendýpe ita’ýra ha itajyrakuérape ambue járape g̃uarã, umi mba’e umía Che nda’eiva’ekue ichupekuéra ojapo hag̃ua ni ndoikeiva’ekue che py’apýpe.
32
Upévare he’i pende Ruete, og̃uahẽva’erã pe ára ndoje’eveimava’erã Tófet, ni Hinom ra’y cerrokuéra pa’ũ, oje’éta uvei cerrokuéra pa’ũ jejukaguasu reheguáva, upépe oñeñotỹva’erã te’õnguekuéra, ndaiporimo’ãvéigui ambue hendag̃ua.
33
Ha ko’ã tetãygua retekue oikóta umi guyra yvate ovevéva rembi’urã ha mymba saite rembi’urã ramo; ha ndaiporimo’ãi avave omondýiva ichupekuéra.
34
Che voi aipe’áta Juda tavakuéragui ha Jerusalen ryepýgui vy’a ha tory rehegua ñe’ẽpu, ha pe menarã ha hembirekorã ñe’ẽ rory opava’erã avei, ko yvy itaperétagui.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015
:
Guardar notas