“Turu ọnụ-mgbọn Ụlọ-nsọ Osolobuẹ, y'a nọ ebẹhụ zi ozini: Ụnụ ndị Juda ile hụn a gha ọnụ-mgbọnni a banye ụlọ-nsọ d'e fe Osolobuẹ, gọn ni ntịn ihiẹn Osolobuẹ ku.
“Ụnụ hụ e zun ohin, e gbu ịhịan, a na ibe ụnụ nwunyẹ — a zọ ụkụ e ye ọfịa, e kun ẹfan m bụ ntụ kẹ ụnụ rị a tụ, a mụyeni Baalụ nsẹnsi, e sọn mmọn-lẹ-iyi ụnụ marịnlẹni mbụ.
Ụnụ mẹgụ, ụnụ a bịazị d'e wuzo ihun m imẹ ụlọnị rị a za ẹfan m, a sị, ‘Ihiẹn emẹkọ ẹnyi!’ Ụnụ rịdẹ nwan e ro nị ezioku-ezioku ihiẹn emẹkọ ụnụ ebe ụnụ rị e mẹsọnmẹ arụ ndịnị ile ra?
“Jẹnkwọ nị nwan obodo Shilo — obodo m bu ụzọ tumẹ nị wẹ a nọ a kpọku ẹfan m, obodo hụ wẹ te nọ e fe m ofufe; jẹn ni d'a hụn ihiẹn m mẹ ẹ makẹ eje-obibi hụn ndị nke m wụ Izrẹlụ bi ogẹn hụ.
Ụmụẹka kpashimẹ ọkụn, ndị nẹdi wẹ a mụye ọkụn, ikpoho e shi ihiẹn-oriri wẹ gi a rụa mmọn wẹ w'a kpọ ‘Eze-okpoho Elu-igwee.’ Wẹ hụ a tụ manya e yeni mmọn ichẹn-ichẹn, e gi ẹ a kpasu m iwe.
Kanị, egọndẹni wẹ ntịn, achọdẹni wẹ nị wẹ nụ; a gbasọnmẹdẹ wẹ isi-akwanran, mẹsọnmẹ ihiẹn eje-obi wẹ ye wẹ. Hụn nkẹ w'e gi e shi ihun, wẹ hụ a la azụụn.
M k'e mẹ wẹ anụzịlẹ olu ndị rị e nwọn ịghọghọ lẹ anwịnrịn lẹ ndị rị a gba ẹkụkwọ imẹ obodo ile rị alị Juda lẹ ọgbara-ogbe ile rị obodo Jerusalẹm, makẹni alịnị k'a gba okpokoro.