mondo odhi ochung’ e dhoranga Hekalu mar Ruoth Nyasaye, ogo milome niya, “Winjuru wach Ruoth Nyasaye, un jo-Juda duto madonjo e dhorangani, ka biro lame.
To un usiko kuwacho niya, ‘Ma Hekalu mar Ruoth Nyasaye! Hekalu mar Ruoth Nyasaye! Hekalu mar Ruoth Nyasaye!’ Wach muwachono, en miriambo, omiyo kik ugen kuome.
To kusetimo gik ma kamago to eka ubiro e nyima e Hekalu ma nyinga nitieni, kendo uwacho niya, ‘Wasekwo.’ To uparo ni unyalo kwo adier, ka utimo timbe makuero kamano?
Nyithindo modo yien, eka wuonegi moko mach, to mon dwalo mogo mondo olosgo kek obed misango ni nyasaye ma dhako ma iluongo ni Ruodh Polo. Bende gitimo ni nyiseche mamoko misengni miolo piny, mondo gichwanyago.
Emomiyo an Ruoth Nyasaye, abiro olo mirimba mager ka eri. Abiro ologi kuom ji kendo kuom jamni, to bende abiro ole kuom yien gi cham. Mirimba biro chalo gi mach mager, ma ng’ato ok nyal nego.”
Gisegero kendo-mar-misango miluongo ni Tofeth e holo Benhinom mondo giwang’ie yawuotgi gi nyigi ka misango. To ne ok achikogi mondo gitim kamano, bende wach ma kamano ne ok aparo kata matin!
Mano omiyo ndalo biro chopo ma ok noluongie kanyo ni Tofeth kata ni holo Benhirom, to noluonge ni holo Nek, nikech giniyik joma otho e Tofeth, mi pong’ du ma onge kama odong’.
Anatiek mor gi ilo duto e miech Juda, kendo e wang’ yore man Jerusalem, ma kata mana dwond miaha gi chwore ok nowinji, nikech noyud ka piny oselokore thim.