×

Ñanderuete Ñe’ẽ Porã 2015

8

1
Upe ára upévape, he’i Ñanderuete, oguenohẽmbáta hikuái ityvykuéragui (isepultúragui) umi Juda retã ruvicha kangue, imburuvichakuéra, pa’ikuéra, iproféta ha Jerusalengua kanguekuerakue,
2
omyasãi hag̃ua kuarahy, jasy ha jasytata ára pegua renondépe, umívape ha’ekuéra voi omomba’eguasu ha oikova’ekue hembiguái ramo, oiko hapykuéri, omba’eporandu ichupekuéra, oñesũ henondepekuéra, noñeñotỹmo’ãi ha ndojejatymo’ãi yvy guýpe, oikóta ku mymba repotícha (ytýicha) yvy apére.
3
Ha umi hembymíva ko’ã ñemoñare ñañágui, mamo Che amosarambi hague rupi, omanoseiterei’arã oikove rãngue, he’i Yvága Atykuéra Jára.
4
Ha eréta avei ichupekuéra: Péicha he’i pende Ruete: Oĩ ramo peteĩ ho’áva, nopu’ãmo’ãi piko. Ha pe ojavýva hape, ndojevymo’ãi piko.
5
Mba’érehepa Jerusalengua tapia oñemoĩ cherehe. Ha’ekuéra ojapyhy pe japu rape, ha ndojevyséi.
6
Ajapysaka ahendu porã hag̃ua, ndaipóri katu peteĩnte jepe oñe’ẽva hekoite peguáva ha avave noñembyasýi ojapo vai haguére, he’i uvei: Mba’éiko ajapóra’e. Maymáva oñani hapekuéra rehe, ku kavaju oñani háicha ñorãirõme.
7
Pe tujuju oikuaa porã hi’ára ojevy hag̃ua, pe pykuipe, pe guyratĩ ha pe mbyju’i oha’ãrõ joa hi’ára ou jevy hag̃ua; che retãyguakuéra katu ndoikuaái Ijára rembiapoukapy (ou jevy hag̃ua ijapohare rendápe).
8
Mba’éicha piko pejekuaa: Orearandu ha Ñanderuete rembiapoukapy oĩ orendive. Añetehápe pende kuatia haihára omoambue che rembiapoukapykuéra.
9
Ko’ã iñarandúva oñemotĩmba, oñemondyipa ha ho’ava’erã iñuhãme, omboykégui pende Ruete ñe’ẽ; ha mba’eichagua arandúpa oĩ gueteri ipype.
10
Upévare ame’ẽta hembirekokuéra ambue kuimba’ekuérape ha ijyvy ame’ẽta tetã ambuépe, umi michĩvéva guive umi tuichavéva peve omondaseitereígui; proféta guive pa’i peve oporombotavyse joánte hikuái.
11
Ha’ekuéra oipohãno vai vai che retã rajykuéra ai, ku ndaha’éi ramoguáicha mba’evai, ha he’i hikuái: Py’aguapy, py’aguapy, ndaipóri ramojepe py’aguapy.
12
Henonderãme otĩva’erã omomba’eguasu haguére ambue járape, ko’ág̃a katu notĩri hikuái michĩmínte jepe ha notĩkuaavéigui ahaviráta ichupekuéra ho’a hag̃ua ambuekuéra ndive, he’i pende Ruete.
13
Pende Ruete he’i: Aháta aikytĩ hag̃ua che retãyguápe. Parral rakã rehe ni hígo rakã rehe ndajohúi hi’a, hoguekuéra ipirupa, upévare amondóta hendápe oikytĩ hag̃ua hakã ha yvyra hi’a’ỹva.
14
Ha Judayguakuéra he’íta mba’érehe piko jaguapy rei ko’ápe. Ñañembyatypa ha jaike umi táva oñemombaretévape ñamano hag̃ua upépe; Ñanderuete, Ñandejára voi oipota ñamanomba, Ha’e ñanemboy’u iróvagui, ñañemohembiapo vai haguére Ñanderuete ndive g̃uarã.
15
Ñaha’ãrõ py’aguapy ha og̃uahẽma ñorãirõ, ñaha’ãrõ ñepytyvõ ha og̃uahẽma ñemondyiguasu.
16
Dan guive oñehendúma henda kavajukuéra pyambu; ha umi henda kavaju ayvúgui oryryipa pe yvy, ha ou hikuái omonandi pe yvy ha opaite mba’e oĩva guive ipype, oguerahapa hag̃ua ojohúva guive.
17
Ñanderuete he’iuka: Cháke, Che amboúta pendeári, mboieta, ha ndaiporimo’ãi paje ipu’akáva hesekuéra, pendesu’u ramo.
18
Añembyasyetégui, chepy’a kangypa.
19
Tetã mombyrýgui oñehendu che retãygua pyahẽ ha he’i hikuái: Noĩvéi piko Ñanderuete Siónpe. Noĩvéi piko ipype hetã ruvicha. Mba’upéiko ha’ekuéra chembopochy ijára gua’u ra’ãnga ha ambue tetã jarakuéra rupi.
20
Ohasáma ñemono’õha ára, opáma arahaku, ha ne’ĩra ou ñaneguenohẽ hag̃ua ko jejopy vaígui, ñandesalva hag̃ua.
21
Ajepy’apyete che retã rehe, ahasa asy, añembyasyete ha añemondyiete.
22
Ndaipóripa pohã Galaádpe, ndaiporivéimapa upépe pohãnohára. Ha mba’érehepa ndaipóri pohã che retãme g̃uarã.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015
:
Guardar notas