|
| 1 |
|
| Ngalesosikhathi amathambo amakhosi akoJuda, laweziphathamandla, lamathambo abapristi labaprofethi, lamathambo abakhileyo eJerusalema, azakhutshwa emangcwabeni, kutsho i Nkosi; |
|
| 2 |
|
| azachaywa elangeni lenyangeni, lakuwo wonke amabutho amazulu, abakuthandileyo bakukhonza, abakulandeleyo bakudinga, bakudumisa; kawayikubuthwa angcwatshwe futhi, azakuba njengomquba emhlabathini. |
|
| 3 |
|
| Ukufa kuzakuba ngcono kulempilo kubo bonke abaseleyo balesisizwe esibi, kuzo zonke indawo lapho engibaxotshele khona, kutsho i Nkosi yamabandla. |
|
| 4 |
|
| Uzakuthi kibo: I Nkosi ithi: Abantu bayawa, bangavuki yini? Umuntu uyaphambuka, angabuyi aphenduke yini? |
|
| 5 |
|
| Pho-ke, baphambukeleni lababantu, bahlamuke kokuphela yini? Baqinela enkohlisweni, bayala ukuphenduka. |
|
| 6 |
|
| Ngiqaphele ngezwa, kodwa kabakhulumanga kuhle, kakho loyedwa ophendukayo ebubini bakhe esithi: Ngenzeni? Bonke baphendukela endleleni zabo njengebhiza liseqela empini. |
|
| 7 |
|
| Ingabuzane emazulwini liyazazi izikhathi zalo ezimisiweyo; lejuba lenkonjane lehemu kuyasazi isikhathi sokubuya kwakho; kodwa abantu bami kabazazi izimiso ze Nkosi. |
|
| 8 |
|
| Lingatsho njani ukuthi: Sihlakaniphile, lomlayo we Nkosi ulathi? Kodwa, khangelani, ukubhala okukhohlisayo kwababhali kuwuphendule umlayo waba ngamanga. |
|
| 9 |
|
| Abahlakaniphileyo bayayangeka, bathuthumele babanjwe; khangela, balalile ilizwi le Nkosi; pho, balokuhlakanipha bani? |
|
| 10 |
|
| Ngalokhu-ke omkabo ngizabanika abanye, lamasimu abo ngiwanike abanqobi, ngoba kusukela kwabancinyane kuze kufike kwabakhulu bonke bayizihwaba zenzuzo embi, labaprofethi labapristi bonke bayakhohlisa. |
|
| 11 |
|
| Kabawelaphisisi amanxeba abantu bami, bathi: Konke kulungile. Khona kungalunganga. |
|
| 12 |
|
| Babelenhloni yini lapho besenza amanyala? Hatshi, kababanga lanhloni lakanye, kabayangekanga. Ngalokho-ke bazakuwa phakathi kwabawayo; ngesikhathi sokubaphindisela kwami bazachitheka, kutsho i Nkosi. |
|
| 13 |
|
| Bengithanda ukubabutha, kutsho i Nkosi, kodwa kazikho izithelo evinini, lomkhiwa kawukho; ngitsho lamahlamvu abunile, lalokho engibanike khona kusukile kibo. |
|
| 14 |
|
| Silindelani? Wozani, singene emizini ebiyelweyo, sibhubhele khona. Ngoba i Nkosi uNkulunkulu wethu isimisele ukubhubha, isinikile amanzi abulalayo ukuze siwanathe, ngoba sonile e Nkosi ni. |
|
| 15 |
|
| Salindela ukuthula, kodwa kakuvelanga, sahlalela isikhathi sokwelatshwa, kodwa khangela, kwavela ukwesaba. |
|
| 16 |
|
| Ukuthimula kwamabhiza ezitha kuyezwakala koDani; ekuzwakaleni komsindo wokukhala kwamabhiza amaduna ilizwe lonke liyathuthumela. Ngoba zifikela ukudla ilizwe, lakho konke okukulo, umuzi labahlala kiwo. |
|
| 17 |
|
| Ngoba khangelani, ngiyathumela phakathi kwenu izinyoka, amabululu angelakulunjwa azaliluma, kutsho i Nkosi. |
|
| 18 |
|
| Kangilakududuzeka esizini lwami, inhliziyo yami iyagula phakathi kwami. |
|
| 19 |
|
| Khangelani, lalelani ukukhala kwabantu bami, kuvela kuyo yonke imikhawulo yelizwe, kuthi: I Nkosi kayikho eZiyoni yini? Inkosi yayo kayikho phakathi kwayo yini? Bangicunuleleni ngezithombe zabo ezibaziweyo, langezithombe zezizwe? |
|
| 20 |
|
| Ukuvuna kudlulile, lehlobo liphelile, kodwa thina kasikhululwanga. |
|
| 21 |
|
| Ngokulimala kwabantu bami inhliziyo yami ilimele, ngiyakhala, lokudabuka kungehlele. |
|
| 22 |
|
| Kakulabhalisamu eGileyadi yini? Kakho yini umelaphi khona? Pho, abantu bami kabasili ngani? |
|
|
|
|