Râhchawhpa liata khichhai riebu ei hnei mawh sala, Ei phopi he siesaipa ta, Âmo tawhta ei pua syulyu ha awpa tlai! Ama zydua ta apheipazy châ ei ta, Haiphiahpa ypakhypa ama châ.
“Ama paleih libaw hawhta pako ei ta, Biedopa hlâta haipa bie râh liata tlao a laiseih via. Moleina tawhta molei viana lâ tôh lymâ ei ta, Kei na pahno veih ei,” Abeipa ta a tah.
“Chyhsa to ama vaih tawhta a vaih ei sala, Ama unawhpa chhao ngâ khah ei sy. Unawh to dôvei a hmâhpa sai châ ei ta, Vaihzy chhao kyh rei a thaipa sai ama châ.
Chyhsa to ama vaih dôvei ei ta, Biedopa a reihpa y veih ei. Ama paleih cha haipa bie rei nawpa ta pachu ei ta, Moleina taopa ta âmosasyh ta ama rie amâ pathei tyh.
Chavâta Pheisaihzy Abeipa ta hetana heta a tah: “Ei phopi cha pathaisa aw ei na ta, Ei pasia aw ei. Cha hawhta tao thlâh ha leipa ta cha, Ei phopi châta khâpa hropa ma ei tao aw tly?
Ama paleih cha thina châtai châ ta, Dôveipa ta bie a reih tyh. Chyhsa ta a pakah ta a vaih hnohta adyhna bie reih ta, A palôh liata deikua cha ano a byh nawpa a pachâ tyh.
Tlâhpizy châta chapa ta sâh aw na ta, Râhchawhpa sibiepa suzy châta mâchhie ei sa aw. Ahy hmahta chapia khoh khao lei awpa ta kâ khai ha ta, Viahchao a aohpa pyu chhao theipa châ khao vei. Avâ pavawzy pai ei ta, Râhsazy ama sie haw.
“Zerusale cha raona â pachopa khihpi ta tao aw na ta, Savaizy tlaihna su ta ei tao aw. Zudâh khihpizy cha roryhrapa ta tao aw na ta, Khihsawzy y khao aw veih ei,” Abeipa ta a tah.
He hmo pahno thai awpa ta a so kawpa chyhsa cha ahy ma a châ tly? Phuah pachhuah awpa ta, ahy hnohta ma Abeipa pakah ta bie â chho tly? Khâpa vâta ma râh he rao khai ha ta, ahy hmahta chapia chahreih lei awpa râhchawhpa hawhta a y ha tly?
Âmo nata âmo pathlatuhpazy chhao ta ama pahno beih leipa phopizy hry liata papaipatla aw ei na ta, ei pahleipadia khai hlâlei ei cha zaozi ta âmo ei chadaisa aw ei.”
Pheisaihzy Abeipa ta hetana heta a tah: “Tahmâ a phapa ta pachâ teh u; Mâchhie a sapa chanôzy a vy awpa ta aw u la, Chaphôh a tu thaipa chanôzy chhao paawsa u la,
Zaio tawhta hetana heta chana pyu a vaw pua: ‘Eima rao khai ha na! Eima nozazie rimâ cha! Eima ozy rao khai ha tlôh ta, Eima râh eima puasai awpa a byuh ha hih!’”
Hy chanôzy saih u, Abeipa bie thei u la, Nama nah liata a pakah bie a ngia mawh sy. Nama sawchanôzy chaphôh pachu u la, Chanô to ta ama vaihzy athih hla pachu mawh ei sy.
Eima opyzy liata thina a vaw ngia ha ta, Eima abei ozy liata chhao â ngia haw. Khiliah liata hawtizy chhawh pathlahpa ta y ei ta, Tlyliah liata satliazy chhawh pathlahpa ta ama y.
Chavâta reih teh u, Abeipa ta hetana heta a tah: “Chyhsa rizy lyurâhpa liata ie hawhta amâ thy aw; Sâh hria khai tawhta sapiahzy hawhta pao aw ei ta, Ahy ta hmah pakhy khao aw veih ei.”
Abeipa ta hetana heta a tah: “Chyhsa sopa ta a sona a palaikhei khah sy; Chyhsa thatlôpa chhao a thatlôna a palaikhei leipa sala, Chyhsa hneirôhpa ta a hneirôna a palaikhei khah sy.
Chyhsa ta â palaikhei awpa khiahta cha, He deita he a palaikhei mawh sy: Kei Abeipa he nôphapa châ na ta, Adona nata siana alei chô liata a taotuhpa ei châzie, Novâhpa ta eina pahnona a palaikhei mawh sy. Cha hmozy cha ei lyna châ tlôh ta,” Abeipa ta a tah.
Izi mo, Zudâh mo, Edômâ mo, Amawna pathlazy, Môabâ mo nata râhchawhpa liata a pahrâpa, ama baih hmi a ngyupazy ei hrie nawpa noh a vaw tlô hai. He phopi zydua he chopawtaileipa châ ei ta, Izarei pathla zydua chhao pathipalôh chopawtaileipa ama châ,” Abeipa ta a tah.