Ni lonanjigiso tun be ne tɔgɔ la kongokolon kɔnɔ, ne be se ka bɔ n ka mɔgɔw cɛma ka taga yɔrɔ min na, o tun be diya ne ye! Bari, u bɛɛ kɛra kakalaw ye, janfamɔgɔw lo.
«U nɛnden kɛra i ko kala, a tigi bolo. U ka setigiya nin jamana kɔnɔ ma sɔrɔ tilenniya la, bari u be kojuguw kɛ ka la kojugu kan, u ma ne lɔn. Ne Masaba le ko ten.
Ne bena kasi ka kule kuluw kosɔn, ne bena dusukasidɔnkili la kongo kosɔn. Bari u jɛnina, mɔgɔ si te tɛmɛ yen tugu. Begɛn kasikan te mɛnna yen tugu, kɔnɔw, ni kongosogow bolila, u bɛɛ tununa.
Jɔn ye lɔnnikɛla ye n'a be nin faamu? Masaba kumana min fɛ, o tigi ka nin fɔ. Mun na jamana kɛra tomo ye, ka jɛni fɔɔ k'a kɛ lakolon ye ni mɔgɔ te tɛmɛna yen tugu?
Nga ni min b'a fɛ ka wanso, o ka wanso bari a ye hakili sɔrɔ ka se ka ne Masaba lɔn, ne min be ɲumanya, ni tilenninyakow kɛ diɲɛ na. Tiɲɛ na, o le ka di ne ye.» Masaba le ko ten.
Ezipitikaw, ni Zuda mara mɔgɔw, ni edɔmuw, ni amoniw, ni mowabuw, ani minw bɛɛ siginin be kongokolon kɔnɔ n'u be to k'u bonbosi gɛrɛfɛla li. Bari o siya nunu bɛɛ, ani Isirayɛlidenw si dusu ma yɛlɛma.»