सिय्योन क लोग अइसे ही मुल्यवान रहेन, जइसे ओनका वजन सोना क बराबर रहा। किन्तु अब ओनके संग दुस्मन अइसे बर्ताव करत हीं जइसे उ पचे कोमहार क बनाए माटी क पात्र होइँ।
हिआँ तलक कि सियार भी आपन बच्चन क थन देत ह, उ आपन बच्चन क दूध पिअइ देत ह। किन्तु मोर लोग निर्दय होइ ग अहइँ। उ पचे अइसे होइ गएन जइसे मरुभूमि मँ निवासी-सुतुर्मुग।
अइसे लोग जउन सुआदिस्ट भोजन खावा करत रहेन, आजु भूख स गलियन मँ मरत अहइँ। अइसे लोग जउन उत्तिम ओढ़ना पहिरत भए पले बढ़े रहेन, अब कुड़न क ढेरन पइ बिनत फिरत अहइँ।
ओन दिन अइसी मेहररुअन भी जउन बहोत अच्छी हुवा करत रहिन, आपन ही बच्चन क माँस पकाए रहिन। उ सबइ गदेलन आपन महतारी क आहार बनेन। अइसा तब भवत रहा जब मोरे प्रिय लोगन क बिनास भवा रहा।
लोग ओन लोगन पइ चिचिआइके कहत रहेन, “दूर हटा! तू पचे अपवित्तर अहा, दूर हटा, दूर हटा! हमका जिन छुआ!” उ सबइ लोग बिना घर-बार क भटकत रहेन। दूसर देसन क लोग कहा करत रहेन, “हम नाहीं चाहि कि उ पचे हमरे लगे रहेन।”
उ सबइ लोग खुद यहोवा क जरिये ही बिखेर दीन्ह गए रहेन। उ ओनकी कइँती फुन कबहुँ नाहीं लखेन। उ याजकन क आदर नाहीं दिहन। यहूदा क मुखिया लोगन क संग उ दोस्ती स नाहीं रहा।
मदद पावइ क बाट जोहत-जोहत आपन आँखिन काम करब बंद किहन, अउर अब हमार आँखिन थक गइन ह। किन्तु कउनो भी सहायता नाहीं आई। हम प्रतीच्छा करत रहे कि कउनो अइसी जाति आवइ तउ हमका बचाइ लेइ। हम आपन निगरानी बुर्जा स लखत रहि गए। किन्तु कउनो भी हमका बचाएस नाहीं।
उ राजा जउन हमरी नाकन क भीतर हमार प्राण रहा, गडढा मँ फँसाइ लीन्ह गवा रहा, उ राजा अइसा मनई रहा जेका यहोवा खुद चुने रहा। राजा क बारे मँ हम कहे रहे, “ओकरी छत्र-छाया मँ हम जिअत रहब, ओकरी छाया मँ हम जातियन क बीच जिअत रहब।”