Zaio sawchapawzy cha, Ngôh suapa hawhta a sôhpazy ama châ; Tahmâ deikua cha alei beih hawhta pachâpa châ ei ta, Beihvituhpa ku ta taopa hawhta pachâpa ama châ ha bâ!
Changiezy hmahta ama tawzy sâhpi pie ei ta, Pazysana châh ama pahno; Ei phopi sawchanô deikua cha nôchhiepa lâta pua ha ta, Râhchawhpa liata pavawpizy a lyu bâ.
A Nâzaraizy dâhaw hlâta pathaih via ei ta, Sâhpiti hlâta ama ngyuh via; Ama sapatie rubi lôsôhpa hlâta a noh thyu via ta, Ama pizie cha saphai lôsôhpa hawhta â ngiapa ama châ.
Tahmâ deikua cha ama hmia chôchoh hlâta vyh via ha ta, Khiliahzy liata ama hmia siah thei awpa châ khao vei; Ama vo ama ruzy liata a bai ta, Tho raohpa hawhta a raoh haw.
Tahmâ cha mochaopazy hawhta pathâpazi ei ta, Khiliah liata ama viavi; Thisaih kiahpa ta thata pua ei ta, Ama chysia dâhdei chhao chyhsa ta hria ngâh khao veih ei.
Chyhsazy ta, “Sie syulyu ha teh u! Pathaih leipa nama châ! Sie syulyu ha teh u! Sie syulyu ha teh u! Miah hria khah u!” tah ei ta; Phopizy ta, “Eima hry liata pahrâ khao aw veih ei” Ama tah hapa vâta, Arâpaipa nata viavipazy lâta amâ lie haw.
Chariahpazy ta eima hnie chathô ei ta, Chavâta eima khiliah liata chhao charei thei khao ma pi; Eima chhâna a hniapa ta eima nohzy reipati hapa châ ta, Eima chhâna a vaw tlô haw.
Eima hnapasu liata husona Abeipa sathawthupa cha, Ama khaohtlôzy liata patu ha ei ta; “A nohdi ry liata phopizy hry liata eima pahrâ aw,” Eima tah tyhpa chyhsa cha ama patu haw.
Hy Edômâ sawchanô y, thaphapa ta a ly la, Uzi râh liata a pahrâpa y, thaphapa ta a ly mah y; Châhrasala na hnohta chhao nyu vaw tlô aw ta, Pari aw chi ta, nâmasasyh ta thluahruapa ta nâ tao aw.
Hy Zaio sawchanô y, Na paraona vâta hriena cha a ki ha ta, Abeipa ta seichâna râh liata cha paysa khao aw vei; Hy Edômâ sawchanô y, Nâ deikua cha na paraona vâta Abeipa ta cha hrie aw ta, Na moleinazy a palâhâh khai aw.