×

Bukuit Ne Tilil 2020

ESEKIEL 1

1
Kiyatak kipsengwet eng’ kenyitab sosom, eng’ arawet ne bo ang’wan, eng’ betutab mut ne bo arawanato, ye kiami koboto luulenik eng’ ye negite ainetab Kebar, ak kiageer ng’ang’utikab Kamuktaindet.
2
Eng’ betut ne bo mut ne bo arawet, ne ki kenyitab mut koboch ngeluul laitoriat Jeoiakin,
3
konyonji ng’olyotab Jehovah Esekiel tisiindet, weritab Busi, eng’ emetab Kaldeik, eng’ ye negite ainetab Kebar; ak kimi eutab Jehovah baragunnyi eng’ oloto.
4
Ak kiageer, ak ogeero, kimong’une murot ne bo katam usonet ne o, boldet ne o, koboto mat ne barbaregei, ak kiyiem kaluunet maata, ak kimong’une kwenunnyi kit ne u itondab taet, komong’une kwenutab mat.
5
Ak kimong’une kwenunnyi kergeindo ne bo tuguk ang’wan che soptos. Ki u ni itondanywa; kitinyei itondo ne u ne bo chi.
6
Ak kitinyei age tugul togochik ang’wan, ak kitinyei age tugul eng’ ichek kebebaik ang’wan.
7
Ak ki chuulotin kelyekwak; ak ki u keldebesaikab kelyekwak siokab moita: ak kiilyeldos ko u itondab sugunwet ne sitat.
8
Ak kitinyei eunek che u che bo chito eng’ kebebaikwak orit eng’ komoswekwak ang’wan; ak kitinyei icheget ang’wanu togochikwak ak kebebaikwak ko u ni;
9
kiga namgei kebebaikwak; kima kogusegong’ ye kibendi; kiwendi age tugul kogeerei tai.
10
Kergeindab togochikwak, ko ki u togetab chito; ak kitinyei ichek ko ang’wan toget ne u ne bo ng’etundo eng’ komostab tai; ak kitinyei ichek ko ang’wan toget ne u ne bo eito eng’ komostab katam; kitinyei ichek ko ang’wan kogeny toget ne u ne bo kipsichit.
11
Ki besiotin togochikwak ak kebebaikwak eng’ ole bo barak; kiga namgei kebebaik aeng’ eng’ age tugul, ak kotuch kebebaik aeng’ borwekwak.
12
Kiwa tai age tugul: kiba ichek ole kamach tamirmiriet; kima kogusegong’ ye kibendi.
13
Kergeindab tuguchoto soptos ko ki u itondanywa ng’etetiot, ko u toogunetab kegenganik: kiwendate maata kwenutab tuguchoto soptos: ak kiikweng’sei mising’ maata, ak kimong’une kalyelet maata.
14
Ak kiruaei tuguchoto soptos ak koweechegei ko u kakweng’etab kalyelet.
15
Kingota ageere anyun tuguchoto soptos, ogeero, kitonone ng’ony cheptiret agenge eng’ ye negite tuguchoto soptos, kotinyei age tugul eng’ togochichoto ang’wan cheptirennyi.
16
Ki u itondab cheptirochoto koboto boisienywa, itondab berulo: ak kitinyei ichek tugul ko ang’wan kergeindo agenge: ak ki u itondanywa ak boisienywa cheptiret ne mi kwenutab cheptiret age.
17
Ye kibendi kobunei komoswekwak ang’wan: kima kogusegong’ ye kibendi.
18
Ki tororen karik che tiektoe cheptirochoto ak kiimuisei; ak ki nyiitotin konyek komoswek tugul eng’ karikwak che tiektoe, che kitinyei ichek tugul ko ang’wan.
19
Ak ye kingoba tuguchoto soptos, koba cheptirochoto agichek ko boiyotyin: ak kingeganab tuguchoto soptos eng’ ng’ony, keganapta cheptirochoto agichek.
20
Kiba ui tugul ole kamach tamirmiriet; kiwendi tamirmiriet oloto agine: ak kigiganapta cheptirochoto tuguchoto; amu kimi tamirmirietab kioto sobei, cheptirok.
21
Kingoba chun, koba chu agichek; ak kingotononso chun, kotononso chu agichek; ak kingeganab chun eng’ ng’ony, keganapta cheptirok agichek: amu kimi tamirmirietab kioto sobei cheptirok.
22
Ak kimi baragutab metitab kioto sobei kergeindab sengwetiet, ne u beek che kagau che imuisei, ne kigiitoe baragutab metowekwak.
23
Ak ki chuulotin kebebaikwak eng’ kureretab sengwetiet ko katokyigei age age: kitinyei age tugul kebebaik aeng’ che tuchei komosi, ak kitinyei age tugul kebebaik aeng’ che tuchei komosin, che tuchei borwekwak.
24
Ak kingobendi, agas kirgirenetab kebebaikwak ko u cheetab beek che chang’, ko u twegunetab Inendet ne bo Kamuktaet, ko u cheet ne imuuti, ne kergei ak cheetab luget: kingotononso kochoor kebebaikwak kobwa ng’ony.
25
Ak kibiit cheet eng’ baragutab sengwetiet ne kimi baragutab metowekwak: kingotononso, kochoor kebebaikwak kobwa ng’ony.
26
Ak kimi baragutab sengwetiet, ne kimi baragutab metowekwak, kergeindo ne bo ng’echeretab laitornatet, ne u itondanyi koita ne kiguure sapire: ak kimi baragutab kergeindo ne bo ng’echeranato bo laitornatet, kergeindo ne bo itondab chito eng’ baragunnyi.
27
Ak kiageer kit ne u itondab taet, ko u itonda ne bo mat eng’ ole bo orit eng’ komoswek tugul, kong’eete itondab suennyi ak kwo barak; ak kong’eete itondab suennyi ak kwo ng’ony, ko kiageer itondo ne bo mat, ak kigayiem inendet kakweng’et.
28
Ko u ole teptoi itondab chemng’isiriet eng’ bolik eng’ betutab ropta, ko ki u noto itondab kakweng’et eng’ komoswek tugul. Ki nito itondab kergeindo ne bo lilindab Jehovah. Ak kingageer, abut kot kotiiny toget ng’ony, ak kiagas kutitab inendet ne king’alali.
Kalenjin Bible 2020
God's word open for all Bible Society of Kenya, 2020
:
Save Notes