cu riet Kuɔth Nhial ben kä ɣän bo̱o̱th palä ni Yɛdh-ki-el gat Budhi, jɔk kiɛɛr Kɛ-bar muun ji̱ Kɛ̈l-da-ya. Kä cu buɔ̱m Kuɔth Nhial te kɛɛl kɛ ɣä ɛn wani.
Kä min guecä cu jiɔam puɔ̱t kui̱c caam. Kä cuɛ tekɛ pua̱r mi di̱i̱t mi ca go̱l ɛ buay kä yiel mac rɛydɛ gua̱thni diaal. Kä därɛ ɛn mac, tëëkɛ mi jaŋ ce̱tkɛ läŋ in yian.
Kɛn ley da̱ŋ ŋuaan tin tëk, te mɔ kɛ nhiem da̱ŋ ŋuaan. Nhiamdiɛn tekɛ kɛ nhiam mi ce̱tkɛ nhiam ran. Kui̱c cuëëcdiɛn te nhiam mi ce̱tkɛ nhiam luɔny thi̱n. Kä te nhiam mi ce̱tkɛ nhiam tha̱a̱k kui̱c caam. Kɛ nhiam mi ce̱tkɛ nhiam cuɔr jɔkɔ.
Kä där leyni tin tëk tëë kɛ mi jɔc mi pɛt ce̱tkɛ mac miim, mi pɛt ce̱tkɛ rith wäkɛ nhiam kä wäkɛ jɔk rɛy leyni tin tëk ɛn mac buɔyɛ ɛlɔ̱ŋ, kä bä yiel raar rɛy maac.
Kä ta̱a̱ wi̱el wi̱eeli kɛnɛ la̱tdiɛn in ca lätnikɛ ɛ kɛl, kɛn jaŋkɛ ce̱tkɛ kɛ pääm ti di̱t kökdiɛn, kä cäätkɛ kɛn da̱ŋ ŋuaan, kä ce̱tdɛ kɛ mi te wi̱l wi̱l rɛy wi̱l wi̱lä min dɔ̱ŋ.
Mi ci ley rɔ̱ wany, la wanykɛ rɔ̱ bä, kä mi ci ley cuɔ̱ŋ, la cuŋ wi̱el wi̱eeli, kä mi cikɛ jiɛɛn piny, la jiɛy wi̱el wi̱eeli kɛ kɛ kɛɛl, kɛ ɣöö te yiey leyni tin tëk rɛy wi̱el wi̱eeli.
A känɛ jɛ ni guäth in jɔc ce̱tkɛ lɛ̈tdɛ a wä nhial, cua̱ mi ce̱tkɛ läŋ in yian mi riaw nɛn, mi ci thia̱a̱ŋ kɛ mac kui̱nikɛ diaal. Kä a känɛ jɛ ni lɛtädɛ a wä piny, cua̱ mi ce̱tkɛ mac nɛn, kä te buay gëëknikɛ diaal.