Si ki ta du wa gere ti gu garã nga 30, ti biama diwi, ti rameru bisue, wa mi adu ti ngba gu di nga Kebara, dagba gu zizi yo i aga na yo, angbangbaturũ aza, mi ki bi yuguyuguapai nga ga Mbori
Wa mi Yezekere angere, mo ngére, bakamikami yuge ki niye nodiyo, bakere dubo ki du, na imaima imarago pati he kirikiri, we ki nikĩ ki niikpira kindi, nzerehe adu rogo we yo wa sirigi.
Tipa kpia kpakpura, ami ni ba sa sa adu na kpakpura wa ga boro ku kpakpura yo; ami biama adu na kpakpura wa ga bahu ku pavuru rira ku kumbabe yo, ami biama adu na kpakpura wa kpakpu babagara ku pavuru rira ku garebe yo, ami biama ki du na kpakpura wa ga dingimo ku mburu takora yo.
Akpakpura adu na angbatunga wa gure. Apupora ki du ni zaragazaraga ha ku ari; ami ni ba sa sa adu na apupora ni ba ue, nga gu zadi ga kura ru ni ba sa sa, gu ue ki dadi kpotora.
Tipa kpia agu angbagida re na waĩ si adu, were si adu: ngbanyaha adu wa nzere mbia nga rusoriso; wa du he biama kpiaha adu kina wa sa, bibi kpiaha adu wa ngbagida vuru kura ngbagida yo.
Kina koyo toro akpi nyemu ka ndu ku ho ni, ami ki nindu koyo a, angbagida ki guari wa sa na ami; bambiko toro gu unga anya re adu rogo agu angbagida yo re.
Ho agu ra andu ni re, agi ahe ki nindu re a; ho agu ra aru ni re, agi ahe ki niru re a; ho agu ra aguari ni re auru kpotosende, angbagida ki guari ku pati ra; bambiko toro gu unga anya re adu rogo angbagida yo.
Ho ami andu ni, mi agi woro apupora wa paa dungu aime, wa fugo gu Ko du na tandu apai dú, wa woro gbarakagbaraka pai nga ga paa bakere rimbasa. Ho ami aru ni zaa, ami ki zogo apupora ku sende.
Ku ba rira ari yo ku ngbangbaturũ yo he adu yo wa kina mbatabakindo, ngbanyaha ki du wa gu mbia nga safira; he ki sungu ku ari ri kpia mbatabakindo nadu wa kina kpia boro.
Nzere sirigi ki tona ti gu pako nadu wa kpia dimoko ki ndu ku riko yo, wa kpia we kirikiri pati ko; ku sande ti gu he nadu wa kpia dimoko mi abi he wa kina we, imaima imarago ki du kirikiri pati ko.
Kpia gu imaima imarago re kirikiri adu wa kpia wangu, nga gu ru nikuru mai yo rago na mai. Were kpia gu taarimo nga ga Yekova adu ni yuguyugu he. Ho mi abi he ni, mi ki ti ni kpakpure ku sande, mi ki gi fugo boro ni nigumba pai.