Kiageer anyun, ak ogeero, kitook eng’ sengwetiet, ne kimi baragutab kerubik, kit ne ki u koitab sapire, ne u itondab kergeindab ng’echeretab laitornatet.
Ak kimwachi chito ne kiilaachi ngorietab katanit, kolenji, Chut kwenutab cheptirok che wirwirendos eng’ kureretab kerubik, ak inyiit euneguk tuwai ng’etetiot ne mi kwenutab kerubik, ak iseerji nganaset. Ak kiwa inendet orit ageere.
Ak ye kingong’at inendet chito ne kiilaachi ngorietab katanit, kolenji, Inemu mat eng’ kwenutab cheptirok che wirwirendos eng’ kwenutab kerubik, kwo orit anyun ak kotonone ye negit cheptiret.
Ak kiito kerubindet eunnyi eng’ kwenutab kerubik kotokyi mat ne kimi kwenutab kerubik, ak konem, ak konde eunekab inendet ne kiilaachi ngorietab katanit, ne kinam maata ak komanda.
Ak kiageer, ogeero, cheptirok ang’wan che kimi ole negite kerubik, ki negite cheptiret age kerubindet age, ak ki negite cheptiret age kerubindet age: ak ki u itondab cheptirochoto, itondab koita ne kiguure berulo.
Ak ki nyiitotin konyek komoswek tugul che bo borwekwak tugul, ak batoikwak, ak eunekwak, ak kebebaikwak, ak cheptirok, cheptirochoto che kitinyei kerubichoto ang’wanu.
Ak kitinyei age tugul togochik ang’wan: toget ne bo tai ko ki togetab kerubindet, ak toget ne bo aeng’ ko ki togetab chito, ak ne bo somok ko ki togetab ng’etundo, ak ne bo ang’wan ko ki togetab kipsichit.
Ak kitirirenso kerubik, ak kotogosta eng’ ng’ony ageere, ye kibendi, ak kimi cheptirok koboto ichek; ak kitononso eng’ kurget ne bo ormarichetab kong’asis ne bo gotab Jehovah; ak kimi baragunywa lilindab Kamuktaindetab Israel.