Ne arango gik ma oyarore mane ni ewi gik mangima miluongo ni kerubigo, mi aneno gimoro e wiye machalo kom duong’ molos gi kidi ma nengone tek miluongo ni safir.
Nyasaye nowacho ni ng’at mane orwako lewni mabeyo cha niya, “Dhiyo e kind tiende mawirore manie bwo kerubi, mondo ijow mach gi lweti. Bang’e ike majno e dala Jerusalem duto.” Eka ng’atno nodhi, ka aneno.
Duong’ maler mar Ruoth Nyasaye nosewuok moa e wi kerubi, mi odhi e dhood Hekalu. Eka bor polo nopong’o Hekalu, kendo duong’ maler mar Ruoth Nyasaye ne rieny e laru.
Ruoth Nyasaye ne onyiso jal mane orwako lewni mabeyo cha mondo ojow mach e kind tiende mane nie bwo kerubi, eka ng’atno nodhi mochung’ e bath tielo achiel.
Achiel kuom kerubigo notero lwete e mach mane nie kindgi, mi okwanyo moko, moketo e lwet ng’at mane orwako lewni mabeyono. Ng’atno nokawo majno, mi oa.
Kerubi ka kerubi ne nigi lela wang’e ang’wen. Mokwongo ne chalo gi lela wang’ rwath, to mar ariyo ne chalo gi lela wang’ dhano. Mar adek to ne chalo gi lela wang’ sibuor, kendo mar ang’wen ne chalo gi lela wang’ ongo.
Ne giyaro buombego mi gidum ka arangogi, mi aneno ka tiendego dhi kodgi. Ne gichung’ e dhoranga Hekalu ma yo wuokchieng’, ka duong’ maler mar Nyasach Israel nie wigi malo.