×

Ziazia Kekeapai 1978

Yezekere 10

1
Mi ki ngereke, ki bi he nakuru ari ba ri akeruba du wa safira, nawira kina mbatabakindo ku ba riyo yo.
2
Gbia ki ya fu gu kumba naukadi roko tutu giri nzibi, “Mo rími ku dagba agu angbagida nake bakirikiri ku tii akeruba yo; mo hisi bero na gu kingiri we du dagba akeruba yo, ki gbandaka ha ku ri bakporo.” Ko ki rimi ku dimo yo ku bara bangire.
3
Were akeruba arundu ku kumbabe bambu ku sudiyo, ho gu boro re arimi ni ku dimoyo; dubo ki hisi gu vurukporo nadu ku vuruhe yo.
4
Gu taarimo nga ga Yekova ki ndu ku ari yo ti akeruba sa barima nga ga bambu; bambu ahi be dubo, vurukporo ki hi be gu imaima taarimo nga ga Yekova.
5
Woro apupo akeruba ki nida kina ku vurukporo zegi yo, wa fugo Mbori du na tandu apai du ho ko nafura ni.
6
Ho ko arugu gu kumba ni naukadi roko tutu giri nzibi, niya, “Mo dí we dagba agu angbagida nake bakirikiri, dagba akeruba yo,” ko ki rimi koyo ki da ru pati gu ngbagida.
7
Keruba sa ki taĩ beko dagba akeruba yo sa we nga gu nadu dagba akeruba yo, ki di bete he, ki moi he ku be gu kumba naukadi roko tutu giri nzibi, ko ki di he ki kuru ku zegi yo.
8
Be akeruba adu wa ga boro tii apupoyo yo.
9
Mi ki ngereke ki bi angbagida biama pati akeruba, gu sa pati gu keruba sa; ngbanya angbagida ki du wa taataa mbia nga rusoriso.
10
Tipa ngbanyaha, gu biama ngbanyaha adu kina sa, wa ka ngbagida du kina vuru gu yo.
11
Ho si nandu ni, si nandu ku ngba gaha banduge zanga sa tihe wa si nandu, ono bara ho sa ngbagida kpakpuhe ku ho ni, akura ha napeka ha zanga sa tihe wa si nandu.
12
Boroho adu na abangirihe ti ni kirikiri, si adu ku giihe yo, na ti behe, na ti apupoho, na ti angbagida ha a, nga agu angbagida nadu be agu yo biama.
13
Tipa agu angbagida re, i ayambu rimoho ku ture yo nga bakirikiri angbagida.
14
Si ki du ni ba sa sa na akpakpuhe ni ba biama: gu bambata kpakpuhe adu wa kpakpu keruba, gu ue he ki du wa kpakpu boro, gu biata ha ki du wa kpakpu bahu, gu biama ha ki du wa ri dingimo.
15
Akeruba ki gu ku ari yo. Agere nga gu unga anya mi abi pangba di Kebara.
16
Ho akeruba andu ni, angbagida ki nindu pati yo; ho akeruba anizara apupoyo ni ka gu ri kpotosende no, angbagida aguari nga pati yo te.
17
Ho i aniru ni zaa, angbagida ki ru zaa a, ho i anigu ni ku ari yo, si ki nindu wa sa na yo ku ari yo; bambiko toro gu unga anya adu re rogo ho yo.
18
Si du gu taarimo nga ga Yekova ki kuru ti barima ngbadimo bambu, ki ru ku ri akeruba.
19
Akeruba ki zara pupoyo ki gu ri kpotosende ku bangire wa i andu, na agu angbagida re pati yo; i ki rundu ti gu ngbadimo du ku uroyo du ti ga Yekova bambu; gu taarimo nga ga Mbori nga ga aYisaraere ko ki du ri yo.
20
Agi yo re nangia gu unga anya mi abi tii ndu Mbori yo nga ga aYisaraere ko pangba di Kebara; mi ki ini he ya i angia akeruba.
21
I ni ba sa sa adu na kpakpuyo ni ba biama, na apupoyo ni ba biama a, tii apupoyo yo gu he wiri be boro ki du.
22
Tipa ngbanya akpakpuyo, ngbanyaha adu wa kina agu akpakpuse mi abi pangba di Kebara yo. I ni ba sa sa andu nzunzu kina ku mbata yo.
Zande Bible 1978
La Sainte Bible en Zande Alliance Biblique Universelle, 1978
:
Save Notes