Kiganaba anyun Kabuuset ne Tiliil, ak komutwaa anyo ormariichetap kong'asiis ne po kootap Kamuktaindet ne Toroor, ne tokyingei kong'asiis: ak ogeero, kimi kurgeetap ormariichet piik tiptemu ak muut; ak ki ageer eng' kwenunnywa Jaasania weeriitap Ashur, kobooto Pelatiah weeriitap Benaiah, pounigap piik.
Ak ki nyoonjo Kabuusetap Kamuktaindet ne Toroor, ak koleenjo, Mwa ile, Mwaei Kamuktaindet ne Toroor kole ki omwa ko uu ni, ee kootap Israel; amu angen tuguuk che obwaati.
Mwaei anyun Kiptaiyat Kamuktaindet ne Toroor kole: Panyeek piikwok che kigebar che ki onde kwenutap nganaseet, ak nganasani ko tereet: ago kimutwok omang'une kwenunnyi.
ak onai ole aa Kamuktaindet ne Toroor: amu ma obendate ng'atuutikyuk, ama oyai kirwoogutikyuk, ago ki osup kirwoogutigap pororyosyek che mi komoswekwok.
Ak kime Pelatiah weeriitap Benaiah ye ki amaoteni, ki abut anyun kot kotiiny togeennyu ng'wony, ak ariir eng' kutit ne oo, ale, ee, Kiptaiyat Kamuktaindet ne Toroor! Tos igeesu che ki ng'et che po Israel?
Ee weeriitap chii, tupchosyeguk, che tupchosyeguk, piigap oreng'ung', kobooto koot komugul che po Israel, icheek tugul, chooto ko che ki komwachi piik che menyei Jerusalem, koleenji, oba ole loo eng' Kamuktaindet ne Toroor; ki kigoonech emoni kobunjech:
mwaa anyun ile, Mwaei Kiptaiyat Kamuktaindet ne Toroor kole: Nganda ki ayestochi icheek ole loo eng' pororyosyek, ak ki aseer icheek koyom emotinwek, kota aegu kora eng' icheek komosta ne tiliil eng' ne matya eng' emotinwek che ki koba.
Mwaa anyun ile, Mwaei Kiptaiyat Kamuktaindet ne Toroor kole: Ayumok omang'une pororyosyek, ak ayumok omang'une emotinwek ole ki oyestoochi, ak agoonok emetap Israel.
Ak agoochi icheek muguleldo agenge, ak ande icheek sabeet ne leel; ak aiste muguleldap koita eng' poorwekwak, ak agoochi icheek muguleldo ne po panyeek:
Ago eng' icheeget che pendoti kosubi tuguukwak che samisen, ak tuguukwak che kiwechei, aipchini ortinwekwak metowekwak, mwaei Kiptaiyat Kamuktaindet ne Toroor.
Ak kiganaba Kabuuset ne Tiliil, ak komutwaa eng' ng'ang'utyet eng' Kabuusetap Kamuktaindet, anyo Kaldea, agoi ait ole mi icheek che ki kiluul. Ki togosta anyun eng' ole ki ami ng'ang'utyonooto kiga ageer.