Roho ne oting’a malo, motera e dho Hekalu man yo wuok chieng’. Ne aneno ji piero ariyo gabich e bath dhorangach kanyo. Ji ariyo kuomgi ne Jaazania wuod Azur kod Pelatia wuod Benaya, ma jotelo mag oganda.
Kuom mano, gima an Ruoth Nyasaye awachonu e ma: Ayie ni dalani biro bedo agulu muwachono, to ang’o ma nobed ring’o? Donge mana ringre joma unegogo? Un to abiro riembou oko e dala!
Ooyo, dalani ok nobed agulu mupondoe, kendo un ok nubed ring’o manie iye. Abiro kumou kamoro amora ma untie e pinyu, eka unung’e ni an e Ruoth Nyasaye.
Kane pod akoro wach kamano, ne apo ka Pelatia wuod Benaya ogore piny motho mana gi kanyono. Ne apodho piny auma, mi akok ni, “Yaye Ruoth Nyasaye! Bende inyalo nego jo-Israel modong’ adier!”
To koro in Ezekiel, nyis jou moter e tuech ni an Ruoth Nyasaye, awacho ni kata obedo ni ne akeyogi e pinje mamoko mondo gidag e kind ogendini man maboyo, to kindeni ayie mondo gilama e pinje ma gintiego.
To anakum joma oketo chunygi kuom timbegi makuero, kendo kuom lamo nyiseche manono, mana maromre gi gik ma gisetimo. An Ruoth Nyasaye ema awacho kamano.”