×

Ika Bible 2018

Izikẹlụ 12

1
Osolobuẹ gwa m oku, sị m,
2
“Nwa-ịhịan, ebọn isi-ikẹn k'ị rị. Wẹ nwọn ẹnya bụ w'a ra legha ụzọ; wẹ nwọn ntịn, kanị w'a ra nụ ihiẹn, makẹni ebọn isi-ikẹn kẹ wẹ wụ.
3
“Nwa-ịhịan, kịkwama nwan ihiẹn i che ẹkpa nọkẹ onyẹ wẹ wepụkọ alị a, y'a nọ idẹnya wẹ buru ẹ pụ ebe eki rị elu; y'a gha ebe ị rị pụ lekẹ onyẹ wẹ wepụkọ alị a, shikọ ebe ọzọ. Ikẹnkwọ a ghọta we — ọsụọkwọn'a nị ebọn isi-ikẹn kẹ wẹ wụ.
4
“Ya wụ, i k'a nọ idẹnya wẹ bupụha ibu i ezi, ebe eki rị elu, nọkẹ onyẹ wẹ wepụkọ alị a; o ru ẹnyasị, y'a nọ idẹnya wẹ pụ nọkẹ onyẹ wẹ wepụkọ alị shikọ alị ọzọ.
5
Nọ idẹnya wẹ gupu mgbọn, y'a gha ebẹhụ bupụ ibu i.
6
Ọhịhị gbama y'a nọ idẹnya wẹ bu ibu hụ che uvun, pụ. Ị pụkọnị y'e kpumẹ ihun i, makẹ ị gha e legha alị ị. M rị e gi i a ghọsị ndị Izrẹlụ ihiẹn.”
7
Ya m nọ mẹ ihiẹn ọ gwa m: ebe eki rị elu, m nọ bupụha ẹkpa m lekẹ onyẹ wẹ wepụkọ alị a; o ru ẹnyasị, m nọ gi ẹka m gupu mgbọn. Ọhịhị a gbama m nọ nọ idẹnya wẹ bu ibu m che uvun, pụ.
8
Ogẹn eki gi fọn, Osolobuẹ nọ sị m,
9
“Nwa-ịhịan, ebọn nnupụ-isi Izrẹlụ a jụmagụọ ị kẹ ‘K'ị rị e mẹ?’ Ẹlẹ ya?
10
“Sị wẹ, ‘Osolobuẹ nwọn ihiẹn ile sị: M gi ihiẹnni e ku oku eze rị Jerusalẹm lẹ ndị Izrẹlụ ile rị ebahụn.’
11
Sị wẹ, ‘Osolobuẹ rị e gi m a ghọsị ụnụ ihiẹn jẹnkọ d'e mẹni.’ “Ihiẹnni m mẹ kẹ wẹ jẹnkọ d'e mẹ wẹ. Wẹ k'a kpụn wẹ shi alị ọzọ; wẹ k'a nwụnrụn wẹ.
12
“Eze wẹ hụn rị imẹ igunrun wẹ jẹnkọ d'e bu ihiẹn ẹ che uvun ebe ọhịhị rị a gba, pụ. Wẹ k'e gupu mgbọn n'ọ gha ebẹhụ pụ. O k'e kpumẹ ihun, makẹ ọ gha e legha alị hụ.
13
M jẹnkọ d'e gi ọga m shin'ẹ ọnyan, ọ dan ọnyan m, a nwụn w'a. M k'e wẹhẹ ẹ Babilọnụ, alị ndị Kal'di — kanị o leghakọ alị hụ; o k'a nwụntọ ebẹhụ.
14
“M k'e feyịya ndị ile ya lẹ wẹ wị ye ẹbamịn ile ufere e fe — kẹ ndị e yen'ẹ ẹka kẹ ndị-agha a, e sepụha m ọpịa-agha, chụ wẹ.
15
“Wẹ sikọ d'a marịn nị m wụ Osolobuẹ — ogẹn m'e gi kpọn wẹ ye imẹ ndị alị ichẹn-ichẹn, feyịya wẹ ye alị ichẹn-ichẹn.
16
Kanị, o nwọnghọ ndị m k'a nị wanahịn ọpịa-agha lẹ ẹgụn lẹ eje-emu, kẹni wẹ nọ alị ndị wẹ shikọ gi ọnụ wẹ ku obibi ile rụnị wẹ bi. Ogẹn hụ, a marịn wẹ nị mmẹ wụ Osolobuẹ.”
17
Osolobuẹ gwazị m oku, sị,
18
“Nwa-ịhịan, ị gha e ri ihiẹn-oriri, mama piripiri; ị gha a ra mirin, e gi uhue lẹ ịma-piripiri a ra a.
19
Y'a sị ndị alị, ‘Lee ni ihiẹn Osolobuẹ nwọn ihiẹn ile ku banyeni ndị bi Jerusalẹm lẹ alị Izrẹlụ ile: wẹ k'a rị e hue uhue wẹ gha e ri ihiẹn-oriri wẹ; wẹ k'a gha a tụ egun wẹ gha a ra mirin, makẹni alị Izrẹlụ sikọ d'a gba okpokoro yeni eje-obibi ndị rịn'a bi.
20
Wẹ k'e tikpọchanrịn obodo ile rịn'a ịhịan bi, alị hụ ile a gba okpokoro. Ogẹn hụ kẹ ụnụ k'a marịn nị mmẹ wụ Osolobuẹ!’ ”
21
Osolobuẹ nọzị sị m,
22
“Nwa-ịhịan, kị ụnụ a tụdẹni iluni imẹ alị Izrẹlụ, nị ‘Ogẹn hụ a gha, onwọnni ọhụn wẹ hụn a bụnnị’?
23
Gwa wẹ nị Osolobuẹ nwọn ihiẹn ile sị, ‘M k'a kụsị iluni, a tụbehi w'ẹ imẹ alị Izrẹlụ.’ Sị wẹ, ‘Ogẹn e rugụọ hụn ihiẹn ile wẹ hụn imẹ ọhụn e gi mẹ.
24
“ ‘Ahụnkọzị wẹ ọhụn ntụ imẹ igunrun ndị Izrẹlụ, agbakọzị wẹ ẹfa n'ọ sụọ ịhịan.
25
Mmẹ wụ Osolobuẹ k'e ku, ọ bụn; o biekọzị. Ebọn nnupụ-isini, m k'e ku ẹ, mẹ ẹ ogẹn nke ụnụ. Ya kẹ Osolobuẹ nwọn ihiẹn ile ku.’ ”
26
Osolobuẹ gwà m oku, sị m,
27
“Nwa-ịhịan, ndị Izrẹlụ rị a sị, ‘Ihiẹnni ọ rị a hụn ẹlẹ ihiẹn tannị kaka, ọ rịhụ e bu amụma ihiẹn k'e mẹ ihun-ihun.’
28
“Sị wẹ nwan: Lee ni ihiẹn Osolobuẹ nwọn ihiẹn ile ku: ‘Onwọnzini oku m hụn k'e bie d'a bụn; ihiẹn ọwụlẹ m ku k'e mẹ. Ya kẹ Osolobuẹ nwọn ihiẹn ile ku.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes