“Nwa-ịhịan, bu amụma ihiẹn m jẹnkọ d'e mẹ ndị amụma hụ rị e bu amụma ndị hụ imẹ Izrẹlụ. Gwa wẹ ile rị e ku ihiẹn rị wẹ obi, a sị nị wẹ rị e bu amụma, sị wẹ: Gọn ni ntịn ihiẹn Osolobuẹ ku!
“Makẹni e gigụọ wẹ wẹ ile duhuhu ndị nke m, a sị wẹ, ‘Nsọngbu arịa,’ bụ nsọngbu jun ejun; ịhịan hụ a tụn ẹhụ-ụlọ zelẹni, ndị amụmanị hụ e gi ihiẹn-ọchan e te ẹ n'ọ la ẹnya!
“Osolobuẹ Nwọn Ihiẹn Ile sị nwan: M k'e gi ọnụma zihẹ okẹn ẹbi, m k'e gi olulu zihẹ mirin-ozuzue; m k'e gi olulu zihẹ ẹkwan-igwere hisọnmẹ ogbe. M k'e gi wẹ tikpọ a, tikpọchanrịn a.
Sị wẹ: Osolobuẹ nwọn ihiẹn ile sị: Nsọngbu rị e che ikpoho rị e ye onyẹ uku lẹ onyẹ nta ọgụn e yi ẹka, a kwaye wẹ ẹkwa ichẹn-ichẹn wẹ gi e kpumẹ isi lẹ ihun kẹni wẹ nwụn ịhịan. Ụnụ ro ni ụnụ werigụ obi ịhịan nke ụnụ a họdụnị ụnụ?
Ụnụ rị e gi ufiri ọka-bali junhụ ọb'ẹka w'e kpọnye ụnụ lẹ mpekele brẹdi e budan m ẹnya ndị nke m. Ụnụ hụ e gi ntụ ụnụ rị a tụ ndị nke m hụn gi ntụ e dọn e gbu ndị furu ni wẹ rị ndụn, a latọ ndị furu ni wẹ nwụn.
“Osolobuẹ Nwọn Ihiẹn Ile sị nwan, ‘Eje-ẹnya kẹ m gi e lee ọgụn ndị hụ ụnụ rị e kẹnmẹye ndị nke m ẹka, e gi wẹ a nwụn ndụn wẹ lekẹ nnụnụ. M jẹnkọ d'e tibepụ ọgụn ndị hụ ụnụ yi ẹka, a tọpụ m ndụn ndị ụnụ gi wẹ kwọndọn nọkẹ nnụnụ.
“ ‘Ụnụ hụ e gi ntụ ụnụ e mẹ ndụn a gụ ndị ezi-omumẹ bụ ẹlẹ mmẹ ku ihiẹn ndị hụ ndụn gi a gụ wẹ, a gba ndị eje-omumẹ umẹ, e mẹ wẹ ahapụlẹ eje-obibi wẹ, hụn te furu w'a hapụ kẹni wẹ rị ndụn.