M nọ mẹ i du, lekẹ ihiẹn rị imẹ ugbo. Ị nọ himẹ, sue, wụrụ ihiẹn-mma pụ ichẹn hụn mma a zu oke. Ị nọ kpụ ẹran; ntutu i nọ suepụ. Kanị, ị gbahụkwọ ọtọ, onwọnni ihiẹn i yi ẹhụ.
“ ‘Kẹ m ghafekọzị ebe ị rị, m nọ hụn nị y'e rugụọ nwagbọọ. M nọ setịnpụ ẹwuru m yi, kpumẹ i, kpumẹ ọtọ ị; m nọ kwe i nkwa, gi ẹ kwọngbama mmẹ lẹ yụ. Ịya kẹ mmẹ wụ Osolobuẹ Nwọn Ihiẹn Ile ku. Ẹrịra k'ị dọnmẹ họnrin nke m.
Y'e werizi ihiẹn-oriri m ye i, ezigbo ọka wẹ gweriẹn lẹ ofugbọn-olivu lẹ mirin-ẹnwụn hụn m ye i e ri, kwayesọnmẹni wẹ ese n'o kuntụ wẹ. Mmẹ Osolobuẹ Nwọn Ihiẹn ile rị e ku.
Hụn ahụn ile ị rị e bi obibi rụnị, a gba ịgbaraja, y'a nyanhandẹni ogẹn hụ i gi rị nwata; ogẹn hụ i gi gba ọtọ, gba ẹhụ oghe, dinẹ imẹ ẹdeke i, e se ụkụ lẹ ẹka.
Ya haịn m gi nwan setịnpụ ẹka mẹ i ihiẹn, tikpọ alị ị, belụa ihiẹn i, we i che ẹka ndị iwe i e we, ndị alị Filistia hụn eje-obibi ịgbaraja ị e mẹdẹ ifẹnrẹn.
“ ‘Osolobuẹ nwọn ihiẹn Ile sị ị lee nwan nị ihiẹn ndịnị i mẹ, agụngụn ịgbaraja ifẹnrẹn rịlẹni ẹnya ị rị a gụn, a mụmarịngụọ ị, nke wụnị y'ara sazị ẹka kwọndọn enwẹn i,
ị hụ a rụn ụlọ-mmọn ị e ye isi-ụzọ ile, e tumẹsọnmẹ ebe wẹ nọ a rụa mmọn e ye ebe ile alị n'e zu. Ịgbaraja nke i jọgbudẹ enwẹn ẹ nị y'a nadẹni egho lekẹ ịgbaraja!
Osolobuẹ Nwọn Ihiẹn Ile sị: Makẹni y'e kwọndọnzini enwẹn i lẹ ufiri ọtọ ị ndị yụ lẹ wẹ rị a sụọ hụn ebe ị rị a ghẹrẹ lẹ ufiri mmọn ị ndị hụ e ze m ize lẹ ẹdeke mmụ ị i gbuni wẹ,
m k'e wegbama nwan ndị hụ ile yụ lẹ wẹ wị a sụọ, ndị ahụn ihiẹn i te a sụọ, kẹ ndị ihiẹn w'a sụọ ị kẹ ndị e ze i ize. M k'a gha azụụn ile wegbama wẹ d'a maye i, a nọ m idẹnya wẹ gba ị ọtọ, a hụn wẹ ọtọ ị.
E we m'i ye ndị yụ lẹ wẹ gba a sụọ, e tikpọ wẹ ụlọ-mmọn ị lẹ ebe ile ị nọ a rụa mmọn; a gbụnarịn wẹ i ẹkwa ị, kpọnrin ihiẹn-mma ị ndị ahụn ma mma, hatu yụ lẹ ọtọ.
“ ‘Makẹni y'a nyanhannị ihiẹn m mẹni i kẹ i rị nwata, kama, ị nọ gi eje-ihiẹn ndịnị wẹ kpasu m iwe, mmẹ nwẹn k'e mẹ i gi isi buru wẹ ile. Y'a gbagụọnị eje-ịgbaraja cheni arụ ile i mẹ? Ya kẹ mmẹ wụ Osolobuẹ Nwọn Ihiẹn Ile ku.
“ ‘Lee njọ nwẹnẹ i okpoho wụ Sodọm mẹ: Ya lẹ mmụ a ikpoho a pache apache, e rikarị enwẹn wẹ, e bi kẹ sị nsọngbu arịa — kanị eyenini wẹ ndị igbẹnnyẹ lẹ ndị elu rị a fụ ẹka.
Yụ nwẹn nkẹ, buru nwan ifẹnrẹn i, ebe o mẹni y'e gigụọ njọ ị ile hụn ka nke wẹ njọ kuyeni mmunẹ i. Uwẹ ka ị nwan mma. Ifẹnrẹn ya mẹ i nwan; buru ịfa ị, makẹni y'e mẹgụọ mmunẹ i nọ nwan kẹ ndị ezi-omumẹ.
Ị k'a nyanhan obibi i, ifẹnrẹn e mẹ i ogẹn i sikọ d'e nwọnhẹnzi mmunẹ i, kẹ ndị dịann'ị kẹ ndị ị dịan. M k'e we wẹ ye i, a wụrụ wẹ mmụ ị, kanị ẹlẹ ufiri nkwerigbama mmẹ lẹ yụ.
M k'e mẹ ẹ, kẹni m gbarịgụ isi i imẹ eje-ihiẹn ile i mẹ, y'a nyanhan ihiẹn i mẹ, ifẹnrẹn e mẹ i, y'a shịapụkọzị ọnụ yeni ifẹnrẹn. Ya kẹ Osolobuẹ Nwọn Ihiẹn Ile ku.’ ”