×

WẼNNAAM SEBRE 2014

Ezekiyɛl 16

1
Sẽn-Ka-Saab goma ne maam n yeele:
2
«Ninsaala, wilg Zeruzalɛm nebã b yel-beedã!»
3
Yeel-b yaa: «Ad maam a Zu-soab a Sẽn-Ka-Saab sẽn yet Zeruzalɛm: ‹Fo yẽgrã ne f rogmã zĩig yaa Kana. Fo baaba wã rag n yaa Amoor neda, tɩ f ma wã yaa Hɛt buudu.
4
La fo rogmã daare, b ka wãag fo yũuga, b ka so f koom n na n yiis f rẽgdã, b ka bil foom ne yamsem la b ka vil foom ne pɛɛl ye.
5
Ned ba a yembr ka yãb fo nimbãaneg n na n maan bõn-kãensã ba a yembr fo yĩng n na n kɩt tɩ f põs ye. B rɩka foom n tɩ lob weoogẽ f rogmã daare, bala, b rag n kisga foom.›
6
Mam wa n loogda fo sɛɛgẽ, n yãnd foom tɩ f tẽbd f zɩɩmã pʋga, tɩ m yeel foom: ‹Fo na n vɩɩmda f zɩɩmã pʋga!› » Mam yeta foom: «Fo na n vɩɩmda f zɩɩmã pʋga!
7
Mam kɩtame tɩ f sõorã yɩlem naoor tus piiga, wa moodã sẽn be weoogẽ wã. Fo yẽegame, fo bɩtame n lebgd neer zãnga. Fo bĩisã pusame, tɩ f zoobdã yi n lebg wogdo, la fo yaool n dag n yaa f zaala.
8
Mam wa n loogda fo sɛɛgẽ, la m gesa foom n mik tɩ f wakatã taame, yaa nonglmã wakate. Mam tẽega m fuugã noor n lud fo yãndã, n wẽen ne foom, la m maan kaool ne foom. Woto, fo lebga maam n so. Maam a Zu-soab a Sẽn-Ka-Saab n yeele.»
9
Mam soo foom koom, n pek f yĩngã zɩɩmã, la m ning-f parfẽ.
10
Mam baoo fuug b sẽn kãd n yeelg foom, la m bao neooda sẽn maan ne dofẽ gãong n pid-fu, la m kõ-f lamd gĩs-bãaneg peende, la m pil-f ne peen-neere.
11
Mam nagsa foom ne fan-teedo, n ning f nusã zũyã, la m ning f loorã kĩndfu.
12
Mam ninga f yõorã nug-bĩnga, la m ning-f tʋblondo, n fõgen-f maanf sẽn tar da-sãnde.
13
Woto, b nagsa foom ne sãnem la wanzuri fan-teedo, la b yeelg foom ne lamd gĩs-bãaneg peen-neere, la peen-bʋgsgo, ne peend b sẽn kãde. Zom-bãaneg ne sɩɩd la kaam n dag n yaa fo rɩɩbo. Fo rag n lebgda neer n paasdẽ, n lebg wa rĩm-poaka.
14
Fo yʋʋr yii buud a taabã sʋka, f neermã yĩnga. Bala, fo neermã rag n ka tar to, mam sẽn nags foom ne ziir ningã yĩnga. Maam a Zu-soab a Sẽn-Ka-Saab n yeele.
15
«La fo kɩsa sɩd ne f neermã n maan yoobo, f yʋʋrã sẽn saagã yĩnga. Fo maana yoob ne so-loaad fãa, n bas t'a soog foom.
16
Fo rɩka f fu-neeb kẽere, n maneg f maand kʋʋb zĩisã, n maan yoob beenẽ. Bũmb a woto zɩ n zĩndi, la a kõn tol n zĩnd me ye.
17
Fo rɩka f fan-teedã sẽn maan ne sãnem la wanzuri wã mam sẽn dag n kõ foomã, n maan bõn-naands sẽn wẽnd daopa, n maan yoob ne-ba.
18
Fo rɩka f fut nins b sẽn kãdã n pil wẽn-naandsã. La f rɩk m kaamã ne m wisdã n kõ-ba.
19
Ad bũmb ning sẽn maane: Fo rɩka m dɩɩbã mam sẽn dag n kõ foomã, ne zom-bãanegã la kaamã ne sɩɩdã mam sẽn dag n tar n dɩlgd foomã, n tɩ kõ wẽn-naandsã, tɩ yɩ kũun sẽn tar yũ-noog b yĩnga. Maam a Zu-soab a Sẽn-Ka-Saab n yeele.
20
Fo rɩka f kom-dibli wã ne f kom-pugli wã fo sẽn dag n kõ maamã n maan maoong n kõ wẽn-naandsã tɩ b rɩ! Fo yoobã rag n ka sek-fo?
21
Fo rɩka mam kambã n maan maoong n yõog bugum n kõ wẽn-naandsã.
22
Fo yel-beedã fãa ne f yoobã pʋga, fo ka tẽeg f bi-bɩɩlem wakatã yelle, wakat ning fo sẽn dag n yaa beelle, la f sẽn dag n be f zɩɩmã pʋgẽ n tẽbdã ye.
23
Wẽng ning fo sẽn maanã poore, ad na n yɩɩ toog woo toog fo yĩnga. Maam a Zu-soab a Sẽn-Ka-Saab n yeele.
24
Fo mee ro-bãoonego, la zĩ-zãongls raasã fãa kɩremse.
25
Fo mee f zĩ-zãonglsã sor fãa noore, n kɩt tɩ f neermã lebg yel-beedo, n dɩk f mengã n kõ so-loaad fãa, n kɩt tɩ f yoobã paam pãnga.
26
Fo maana yoob ne Ezɩpt nebã sẽn yaa fo yags sẽn tar raoolem sẽn yaa bɛdã. Fo sẽn kɩt tɩ f yoobã lebg wʋsgã yĩng n kɩt tɩ mam sũurã yiki.
27
La ade, mam zẽka m nug n sɩbg foom n boog f sẽn so wã. Mam basa foom Filistẽ-dãmbã kom-pugli sẽn yaa fo bɛɛbã nugẽ, la yãnd yõka bãmb fo manesem-wẽngã yĩnga.
28
La rẽ sẽn ka sek foomã yĩnga, fo yoo ne Asiiri rãmbã. Fo yoo ne bãmba, tɩ rẽ kell n ka sek foom ye.
29
Fo kɩtame tɩ f yoobã ne Kana nebã lebg wʋsg Kalde rãmbã soolem pʋgẽ. La rẽ me baas n kell n ka sek foom ye.»
30
«Fo sẽn maan bõn-kãensã sẽn yaa pʋg-yood-kãseng tʋʋmdã, fo ka võor ye! Maam a Zu-soab a Sẽn-Ka-Saab n yeele.
31
Fo sẽn wa n me f rotã soayã fãa noyã, la f me f zĩ-zãonglsã raasã fãa pʋsẽ wã, fo ka tol n deeg yaood wa pʋg-yoaadb a taabã ye.
32
Pʋg-yoodr basda a sɩd n maand yoob ne sãamba.
33
B kõta pʋg-yoaadbã fãa kũuni, la sã n yaa ne foom, foom n kõ f rolsen-dãmbã fãa kũuni. Fo kõo bãmb kũun tɩ b yi zĩisã fãa n wa maan yoob ne foom.
34
Fo ka maan wa pʋg-yoaadb a taabã fãa f yoobã pʋg ye. Ned dag n ka baood fo zĩig ye. Sẽn yaa foom n yaood bãmb tɩ ka bãmb n yaood foomã yĩnga, fo maana f yellã lebende.»
35
Woto yĩnga, pʋg-yoodre, kelg Sẽn-Ka-Saab koɛɛga!
36
Zu-soab a Sẽn-Ka-Saab yetame: «Fo sẽn yees f fut n yals f zaal n maan yoob ne f rolsen-dãmbã fãa wã yĩnga, la ne f wẽn-naandsã fãa wã, la fo sẽn maan yel-beed buud fãa n tol n dɩk f kambã n maan maoong n kõ-bã yĩnga,
37
mam na n tigma fo rolsen-dãmbã fãa fo sẽn dag n maand sũ-noog ne wã, la fo sẽn nong-b rãmbã fãa, ne fo sẽn dag n kis-b rãmb fãa wã, n kɩt tɩ b yi zĩig fãa n wa zab ne foom. Mam na n yeesa f futã, n kɩt tɩ b yãnd f yãndã fãa.
38
Mam na n kaoo fo bʋʋd wa b sẽn kaood pʋg-yoaadbã, ne pagb nins sẽn daagd-b zɩɩmã bʋʋdo. La mam na n daaga fo zɩɩm, m sũ-yikrã ne m sũ-kiirã pʋga.
39
Mam na n basa foom bãmb nugẽ. Bãmb na n luba f rotã f sẽn dag n me wã, la b sãam f zĩ-zãonglsã. Bãmb na n yeesa fo futã, la b rees f fãn-teedã n bas foom f zaala, zaal zãng fasɩ.
40
Bãmb na n pirsa neb kʋʋng tɩ b lob foom kuga, la b bees foom ne zabr sʋʋga.
41
Bãmb na n ninga f rotã bugum, n sɩbg foom pagb kʋʋng nifẽ. Mam na n kɩtame tɩ f yoobã sɛ, la fo ka na n leb n yao f rolsen-dãmbã ned ba a yembr ye.
42
Mam na n basame tɩ m sũ-puugrã maan a tʋʋmd ne foom n tãag a tɛka, la mam sũ-kiirã na n zãaga ne foom. Mam sũurã na n sigame n ka leb n yik ne foom ye.
43
Fo sẽn ka tẽeg bũmb nins mam sẽn dag n maan f yĩng f yãadem wakatã yĩnga, la fo sẽn maan bõn-kãens fãa n yik m sũurã yĩnga, beneere, mam na n kɩtame tɩ f yel-manesmã taal lebg n lʋɩ f zugu. Maam a Zu-soab a Sẽn-Ka-Saab n yeele. Dẽ yĩnga, fo ka maan yoob n paas f yel-beed a taabã fãa sɩda?»
44
Ade, yel-bũn-wẽedbã fãa na n wẽeda yel-bũn-kãngã fo wɛɛngẽ n yetẽ: «Ma sẽn yaa bũmb ningã, a bi-pugl me yaa a woto!»
45
Fo yaa f ma bi-pugl halaale, fo yaa pag ning sẽn dag n kisg a sɩdã ne a kambã bi-pugla. Fo sɩd yaa pagb nins sẽn kis b sɩdbã ne b kambã ma-biiga. Yãmb ma wã rag n yaa Hɛt neda, yãmb ba wã rag n yaa Amoor neda.
46
Fo kẽem-bi-puglã sẽn be fo nug-goabgã yaa Samaari ne a tẽn-bãoonegã, tɩ fo yao-bi-puglã sẽn be f nug-rɩtgã yaa Sodom ne a tẽn-bãoonegã.
47
Fo rɩka bãmb manesmã, la sẽn paase, fo maana yel-beed nins bãmb sẽn maanã, tɩ rẽ ka sek foom ye, tɩ fo leb n maan tʋʋm-beed f manesmã fãa pʋg n yɩɩd bãmba.
48
Maam a Zu-soab a Sẽn-Ka-Saab sẽn vɩ wã wẽendame n yetẽ: «Fo yao bi-pugl a Sodom ne a tẽn-bãoonegã ka maan wẽng wa foom ne f tẽn-bãoonegã sẽn maanã ye.
49
Ad kongr ning fo yao-bi-pugl a Sodom sẽn kongã: yẽnda maana tɩtaam, yẽnda rag n dɩt n tɩgdame, yẽnda ne a tẽn-bãoonegã rag n vɩɩ bãan n ka yɛɛsd yelle, la b rag n ka maand baa fɩ n na n paas naong-rãmbã ne nimbãan-dãmbã raood ye.
50
Bãmb zẽka b mens n maan yel-beed mam taoore. Dẽ, mam sẽn yãnd bõn-kãngã mam menes-b lame.
51
La sã n yaa ne Samaari, yẽnda ka maan fo yel-wẽnã pʋɩ-sʋk meng ye. Fo yel-beedã sõor yɩɩ wʋsg n yɩɩd yẽnda rẽndã. La yel-beed nins fãa fo sẽn maanã kɩtame tɩ fo kẽem-bi-puglã ne f yao-bi-puglã sẽn maanã ka baa fɩ ye.
52
Fo sẽn dag n ningd f tão-pogsã taalã, bɩ fo me paam yãnde, yel-wẽn nins fo sẽn maanã yĩnga. Fo sẽn maan yel-wẽn-kãensã wã yĩng kɩtame tɩ fo lebg yel-be-maand n yɩɩd bãmba, la yaa yel-be-bãmb n kɩt tɩ bãmb lebg tɩrs n yɩɩd foom. Bɩ fo me rɩ yãnde, la f paam paoogre, fo sẽn kɩt tɩ f tão-pogsã lebg tɩrsã yĩnga.
53
Mam na n lebs n manega Sodom ne Samaari, ne b tẽn-bãoonegã yelle, la m lebs n maneg fo me yellã bãmb sʋka,
54
sẽn na n yɩlẽ tɩ fo paam yãnd bũmb nins fãa fo sẽn maanã yĩnga, tɩ yɩ belsg bãmb yĩnga.
55
Fo tão-pogsã sẽn yaa Sodom ne a tẽn-bãoonegã, la Samaari ne a tẽn-bãoonegã na n lebga wa b sẽn dag n yaa to-to pĩndã. La foom ne f tẽn-bãoonegã me na n lebga wa y sẽn dag n yaa to-to pĩndã.
56
Fo rag n wɩta f tão-poak a Sodom f tɩtaamã pʋgẽ,
57
sẽn deng wẽng ning fo sẽn maanã pukri, wakat ning Edom tẽn-bãoonegã ne a tẽn-kɩremsã fãa, la Filistẽ-dãmbã tẽn-bãoonegã sẽn wa n paoogd foom, la b yaand foom zĩig zãngã.
58
Fo yãn-tʋʋmã ne f yel-beedã taal na n zĩnda f zugu. Maam a Sẽn-Ka-Saab n yeele.»
59
Bala, maam a Zu-soab a Sẽn-Ka-Saab yetame: «Mam na n maana foom wa fo sẽn maanã. Fo sãama kaoolã n sãbs f wẽenegã.
60
La mam me na n tẽega m kaool ning mam sẽn dag n maan ne foom f bi-bɩɩlem wakatã yelle, n vigl kaool sẽn paad wakat fãa fo yĩnga.
61
Fo sã n wa reeg f tão-pogsã sẽn yaa f kẽem-dãmb ne f yaopã, fo na n tẽega f manesmã yelle, tɩ yãnd yõk-fo. Mam na n dɩka bãmb n kõ foom tɩ b yɩ fo kom-pugli, la ka kaool ning mam sẽn maan ne foomã yĩng ye.
62
Mam na n leb n maana kaool ne foom, la fo na n bãngame tɩ mam yaa Zu-soab a Sẽn-Ka-Saabo,
63
tɩ mam sã n wa kõ foom sugr bũmb nins fãa fo sẽn maanã yĩnga, bɩ f tẽeg tɩ yãnd yõk-fo, tɩ f ka tol n tõe n leb n yaag f noore, yãndã yĩnga. Maam a Zu-soab a Sẽn-Ka-Saab n yeele.»
Mossi MPBU 2014
Moore Bible Bible Society of Burkina Faso, 2014
:
Save Notes