Nikake ni avila zao tutar te cheren chuke varesavi katar gala ezgode, niko ni tristosailo pala tute, avilan chudini pe umal, cho zivoto ni mola le niso kana biandilan.
Ta me nakhlem pasa tute ta dikhlem tut melali ande cho rat ta kana sana ando rat phendem chuke: ¡Zivi! Ea, phendem chuke, kana sana sa ando rat: ¡Zivi!
Ta me pale nakhlem pasa tute ta dikhlem pe tute ta sana ando vreme katar o volipe, inzardem mo va ta uchardem cho nangipe ta diem tut mo alav ta jalem chuke sovel, gia phenel o Del o Gazda, ta cherdilan murni.
Gia sana furiadi ando sunakai ta o rup ta che patave sea cherde katar o lino mai lacho, seda ta sukar suvdipe. Jalan katar e arina mai lachi katar o lliu, aullin ta zeitino ta avila furiadi ande iek sukaripe but baro, cherdilan barvali ta i charoisardan.
Ta i mo marrno, kai me diema tut, e mai lachi arina, o zeitino ta o aullin, kai me pravardem tut lenchar, thodan len angla lende te khanden lenge sukar, ta gia cherdanle, gia phenel le o Del o Gazda.
Goleke, me vazdiem mo va pe tute ta cherdem te na avel tut sogo mangea ta diem tut kai e chea katar e filisteura kai murzin pe tute, gola kai si lenge lallao katar cho bilacho drom.
¡Cherdan che thana vazdine katargo likel iek drom ta cherdan thana e kurbanoke pe sa e plase! Ta ni sana sargo kurvichka, soke ni chitilape chuke te pochinen chuke.
Ta tu cherdan ande cho kurvaluko so ni cheren ogola diskinie: Soke ni iek murus ni ikharda tut te chere lea o kurvaluko, a tu pochine, kana chuke saia te pochinen, goleke ni sana sargo ogola.
Gia phenda o Del o Gazda katar o Israel: Pala cho nangipe kai dikhilo ande cho kurvaluko, ta soke dikhilo kai achilan ando lallao angla che murusa kai sea tut, ta angla che gado dela, kai dian len o rat che chaurrengo,
Ta ka dav tut ande lenge va ta ka zatrin che thana vazdine ta ka len tutar che patave, ka len tutar cho sukar sunakai, ta ka muken tut nangi ta puchardi.
Soke ni dian tut golli katar e llivesa katar cho ternipe ta cherdan te joliaivav ande sa gaia ezgoda, goleke, i me ka anav pe cho soro so cherdan, gia phenel le o Del o Gazda, soke ni mislisailan ande sa cho kurvaluko.
Tu san che daki chei, kai chudia pe rrome ta pe chaurren ta san phei katar che phea kai mukle pe rromen ta pe chaurren. Chi dei saia etea ta cho dad amorreo.
Ta chi phei e mai purani si e Samaria, voi ta lake phea kai zivin pe rig sur katar san tu. Ta chi phei e mai terni si e Sodoma ta lake chea, kai zivin karing o sur tutar.
Ni cherdan samo prema so von cheren ta ni cherdan samo prema lengo gadope, ta sargo kana goia ezgoda ni saia but, tu cherdan ios mai bilache ezgode neko von ande cho zivoto.
Gava saia o bilachipe kai cherda chi phei e Sodoma: Falisaili, chalili e marrnetar, cherela sogo mangel, voi ta lake chea, ta ni dia zor gole kai saia dukhado ta gole kai trubula le.
A e Samaria ni cherda ni dopas katar cho bilachipe, soke tu cherdan mai but gadope neko von ta chachardan che phiorren sa e bilachimaia kai tu cherdan.
A tu kai dosardan che phiorren, o lallao kai inllarda cho bilachipe si mai but neko o gadope kai cherde von, von si mai chache neko tu. Goleke trubul te avel lallao i chuke, ta inllar cho lallao, soke chachardan che phiorren.
Goleke me ka cherav te irinpe leke llene kai si phangle, e phangle katar e Sodoma ta katar leke chorra, ta e phanglen katar e Samaria ta katar lenge chorra ta ka cherav te irinpe e phangle katar che phangle maskar lende,
mai anglal te llangliolpe cho bilachipe. Isto gia akana tu inllare o lallao katar e chea katar e Siria ta katar sa e chea katar e filisteura, kai pe suako rig murzin pe tute.
Ta ka de tut golli so cherdan ta ka avel chuke lallao kana ka le tute che pheen, gola kai si mai purane tutar ta e mai terne tutar, kai me ka dav len chuke sargo chorra, a ni ka avel pala o alav kai diem tut,
Te sai de tut golli ta te avel chuke lallao ta nikada ios te na putare cho mui, pala cho lallao, kana me ka prostiv sa so cherdan, gia phenel o Del o Gazda.