×

Ika Bible 2018

Izikẹlụ 17

1
Osolobuẹ gwà m oku, sị m,
2
“Nwa ịhịan, tanị ndị Izrẹlụ ilu; gi ẹ jụ wẹ ajụjụ.
3
Sị wẹ, ‘Lee ni ihiẹn Osolobuẹ Nwọn Ihiẹn Ile ku: O nwọn ẹregede ugọn ohu, hụn nwọn okẹn-nku. Ugbele ẹ sue ọda-ọda, tụ ẹkịrịka magbu enwẹn ẹ mma. Ọ bịa Lẹbanọnụ, kpagiri ọnụnụ okẹn-osisi sida rịn'a;
4
ẹghẹẹ, ọ kpagiri mkpọnụnụ a. O bu ẹ shi alị ndị-afịa; ọ gbọma a ye obodo wẹ ohu.
5
“ ‘O weri mkpụrụ ohu rị alị wẹ; ọ kụn a ye ugbo; ọ kụn a ye ugbo rị mkpẹnrẹn mirin, nọkẹ akasị-mirin.
6
O pu, o họnrin vaịnị rị a kụnị, jẹnkẹlẹni elu. Ẹka a hụ a kụshi okẹn-ugọn hụ sụọ, mkpọgụn a hụkwọ alị okpuru ẹ. O họnrin vaịnị ka ẹhụ, ọ hụ a kụ, ọ hụ a wa ẹka.
7
“ ‘Ya kẹ ẹregede ugọn ọzọ nwọnzi okẹn-nku nọ bịa, ugbele jun ẹ ẹhụ. Vaịnị nwẹn nọ nwan gba akwanran shi ebe ugọn hụn-ẹbọnị rị, a kụshi ebe ọ rị, kẹni o ye ẹ mirin — hụn nke o gi nọdị ebe wẹ kụnye ẹ.
8
Kanị ezigbo alị kẹ wẹ te gbọye ẹ, alị mirin rị ọhụnma-ọhụnma, n'ọ hụn ụzọ wasọnmẹ ẹka, a mị mkpụrụ, họnrin vaịnị a la ẹnya.’
9
“Nwa-ịhịan, sị wẹ nị Osolobuẹ nwọn ihiẹn ile sị, ‘N'ọ ghan'a? Ugọn kụnn'a e huegbukọ a, ghọkwọnchanrịn mkpụrụ a kẹn'ọ kpọ nkụn? Ẹka lẹ ihiẹn ile pụha nke ọhụn e shinwụn. Achọkọdẹ wẹ onyẹ nwọn akwanran mọbụ ndị bu ọda nị wẹ huepụ a.
10
Ọsụọn'a n'ọ gbọrịọlẹ, n'ọ rị mma? Ufere ọwụwa-ẹnyanwụn fe ẹ hụ, ẹlẹ o shinwụn, shinwụnchanrịn, nwụntọ ebe wẹ gbọye ẹ.’ ”
11
Ya Osolobuẹ nọ sị m,
12
“Sị nwan ebọnni e nupụ isi: ‘Ụnụ amarịn ihiẹn iluni wụ?’ “Sị wẹ, ‘Eze Babilọnụ jẹn Jerusalẹm, weri eze wẹ lẹ ịhaịmẹ ẹ, we wẹ lashi Babilọnụ.
13
Ọ nọ weri onyẹ ebọn eze, tumẹ ẹ eze; o mẹ ẹ kwe ẹ nkwa, ye ẹ Ẹfan m kun. Ọ nọ kpụnrụn ndị wụ ndị imẹ alị hụ lashi Babilọnụ,
14
kẹni alị-eze ahụn rịchanrịn alụlụa, makẹ ọ gha e nyọnpụha isi; kẹni wẹ hụn ụzọ a rị okpuru ẹ kẹ wẹ dọn kwe ẹ nkwa.
15
Kanị eze Jerusalẹm nwẹn nọ nupụn'a isi, han ụkọ jẹn Ijiptu d'a rịọ wẹ zihẹnn'ẹ ẹshin lẹ ndị-agha bu ọda. Nị mbụọ a pu ẹ? Nị onyẹ mẹ ihiẹn nọ ẹrịra hụn isi? N'o tikpọ nkwa o kwe hụn isi pụha?
16
“ ‘Mmẹ wụ Osolobuẹ nwọn ihiẹn ile sị: Ma isi m, imẹ Babilọnụ ebe eze ahụn buche ẹ ukpo bi k'o k'a nọ nwụn, eze hụ o kunni Ẹfan m kwe nkwa n'o k'a rị okpuru ẹ, kungụ a latọ nkwa a.
17
Onwọnni ẹka Fẹro lẹ ndị-agha a bugbu enwẹn wẹ ọda k'e yen'ẹ ogẹn agha hụ e gi bidọn, ogẹn ndị Babilọnụ e gi rụnyegụ mkpọnyin wẹ gi a lụ ndị tụn mgbọn agha, ogẹn w'e gi kehunmẹ wẹ nị wẹ gbu ndị bu ọda imẹ ẹ.
18
O lelịagụọ Ẹfan m o kun, tikpọ nkwa hụn o gi Ẹfan m kwe wẹ. Makẹni o biyegụnị wẹ ẹka mẹ ihiẹn ndịnị ile o mẹ, ọ wanahịnkọ.
19
“ ‘Lee nwan ihiẹn Mmẹ wụ Osolobuẹ Nwọn Ihiẹn Ile ku: Ma isi m, mmẹ k'o kun, Ẹfan m k'o gi kwe nkwa hụn o tikpọ; m k'e mẹ ẹ gi isi ẹ buru ẹ.
20
M k'a tụ ọga m kpu ẹ, nwụn a. M k'e wẹhẹ ẹ Babilọnụ, nọ ebahụn ma a ikpe, makẹni o ku ọzọ, mẹ m ọzọ.
21
“ ‘Ọpịa-agha kẹ wẹ k'e gi gbuchanrịndẹ ndị odogun-agha a ile gbapụkọnị; wẹ k'e fe ndị ile hụn isi wanahịn ye azụụn ile, ogẹn hụ, ụnụ a marịn nị mmẹ wụ Osolobuẹ ku ẹ.
22
“ ‘Lee ihiẹn Osolobuẹ Nwọn Ihiẹn Ile ku: Mmẹ lẹ enwẹn m k'e weri ọnụnụ okẹn-osisi sida hụ gbọma; mkpọnụnụ a kẹ m k'a kpagiri, a gbọ m'a ye ebe jẹn elu, elu ugu jẹngbu enwẹn ẹ elu.
23
Mkpọnụnụ ugu Izrẹlụ kẹ m k'a gbọye ẹ; o k'a wa ẹka, mị mkpụrụ; o k'e họnrin okẹn-osisi sida a la ẹnya. Ụdị nnụnụ ile k'a kụ ẹkụ ye elu ẹ; wẹ ile e fe imẹ elu k'e biri igungun agalaba a.
24
Osisi ile rị ọfịa k'e gi ẹ marịn nị mmẹ wụ Osolobuẹ e welụa okẹn-osisi alị, e mẹ hụn mẹ ẹkẹrẹ e sueshi elu; m'e mẹ osisi ndụn a kpọ nkụn, e mẹ osisi ọkpọ-nkụn e du. Mmẹ wụ Osolobuẹ e kuọl'a; m k'e m'ẹ.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes