Torup ekitoe ngolo toliwor emusabib lo ekilikili lo eliarit. Kiniapasi ngaten keng kidiama ni ayei egole. Kilijakin ngaten na alokwap nalup. Toburuchiasi emusabib ngolo ngaten ka ngakui.
“ ‘Ayei nabo egole eche lotiapolon. Apolok ngabeben keng noi talalak ngakopir. Toreia emusabib ngolo ngaten na alokwap logole ngolo, toreia tani ngakui keng logole ngolo, iitanit atamar kainak egole ngolo ngakipi nakaalak na idwangito na ayakasi mana na arupunitor ngesi.
“Kingit ngitunga lukechanak lugu keyenete eger a akisikwaanet kangina. Tolimok kesi atamar abuni ekapolon a Babilonia toriko ekapolon a Yerusalem ka ngikatukok keng toloto Babilonia.
Nakaneni abu ekapolon a Yuda tonger ngesi, tomea ngitunga keng Misiri akilipun ngangolei ka ngasigerea nakaalak. Ekoe, idwangi a? Ebuchar dir itwaan ni esubi ngakiro na ikote nugu a? Nyichwangakini ngesi achamunet sodi tobuchar nyirira!
Tani ekapolon a Misiri ka ngasigerea keng nakajwok, nyingarakinete ngesi akitijwore ngitunga a Babilonia na iriamete kesi toduko ngawasea ka akibok ngalup taareta ngitunga lukaalak.
“Ekongi ayong Ekapolon lo arai Ekapolon Akuj na ayari abala, erirae ayong ngesi ani asechea achamunet nakolong ekongi ngesi a ekiro kang atamar erichakini.