×

Ika Bible 2018

Izikẹlụ 18

1
Osolobuẹ gwa m oku, sị m,
2
“Kị ụnụ rị atụnị iluni banyeni alị Izrẹlụ, nị ‘Ndị nẹdi ra vaịnị rịlẹni mma bụ ụmụ wẹ kẹ eze rị e gigihi’?
3
“Osolobuẹ nwọn Ihiẹn ile sị: Ma isi m, ụnụ atụkọzị iluni imẹ Izrẹlụ.
4
Makẹni mmẹ nwọn ndụn ịhịan ile, kẹ nke nẹdi kẹ nke nwa — mmẹ nwọn wẹ ile. Onyẹ hụn mẹ njọ nwọn nwụn.
5
“Omẹni ịhịan wụ onyẹ ezi-omumẹ, e mẹ onyẹ ọwụlẹ k'o furu, e mẹ ihiẹn furuni —
6
ara ri ihiẹn-oriri wẹ gi rụa mmọn kẹ w'e mẹ elu ugu ndị hụ mọbụ fe mmọn ndị hụ ndị Izrẹlụ rị e fe; omẹni ara sọn nwunyẹ ibe ẹ ranhịn mọbụ mẹ mgba okpoho rị a sọ ezi;
7
omẹni ara mẹgbu ịhịan, kanị o wekinni ịhịan ihiẹn wẹ gi gbama ibe ẹka a; omẹni ara zun ohin, kanị o ye ndị ẹgụn rị a gụn ihiẹn-oriri, e ye ndị gba-ọtọ ẹkwa;
8
omẹni ara zinye egho makẹni ọ chọkọ ọmụnịnwa mọbụ nadẹ ọmụnịnwa kaka; omẹni ara bu ẹka che eje-ihiẹn, omẹni ara gbeyeni ịhịan;
9
omẹni ọ hụ e gi Iwu m e bi, e mẹ ihiẹn m ku, a wụ onyẹ m'e gi dọn ẹnya; onyẹ ezi-omumẹ k'ọ wụ; o k'a rịrịrị ndụn. Mmẹ wụ Osolobuẹ Nwọn Ihiẹn Ile ku ẹ.
10
“Omẹni ọ mụ nwa e gi ịhịan e mẹ ihiẹn sụọn'a, e gbu ịhịan mọbụ e mẹ ihiẹn ndị ọzọ nọ ẹnịna,
11
(ọsụọn'a nẹdi ẹ emẹni hụn ọwụlẹ imẹ wẹ); omẹni o ri ihiẹn-oriri wẹ gi rụa mmọn kẹ w'e mẹ elu ugu ndị hụ, e sọn nwunyẹ ibe ẹ a ranhịn;
12
omẹni ọ bịangbu ndị igbẹnnyẹ lẹ ndị elu rị a fụ; omẹni o zun ohin; omẹni ara wekinni ịhịan ihiẹn wẹ gi gbama ibe ẹka a; omẹni o fe mmọn, e mẹ arụ;
13
omẹni o zinye egho makẹni ọ chọkọ ọmụnịnwa mọbụ a nadẹ ọmụnịnwa kaka. Ọ rịkọ ndụn! Makẹni o mẹgụọ arụnị ile, wẹ k'e gburịrị a; ẹdeke ẹ k'a rị a isi.
14
“O mẹ nwan nị hụnnị e mẹ eje-ihiẹn mụ nwa hụn o mẹni ọ hụngụọ njọ ile nẹdi ẹ mẹ; ọsụọn'a n'ọ hụngụọ wẹ, ya nwẹn emẹni ẹrịra:
15
o rini ihiẹn-oriri wẹ gi rụa mmọn kẹ w'e mẹ elu ugu ndị hụ mọbụ fe mmọn ndị hụ ndị Izrẹlụ rị e fe; ara sọn nwunyẹ ibe ẹ ranhịn;
16
ara bịangbu ịhịan, o wekinni ịhịan ihiẹn wẹ gi gbama ibe ẹka a; ara zun ohin, kanị o yebeye ndị ẹgụn rị a gụn ihiẹn-oriri ẹ, e ye ndị gba ọtọ ẹkwa;
17
ara buche ẹka eje-ihiẹn, ara zinye egho makẹni ọ chọkọ ọmụnịnwa, ara nadẹ ọmụnịnwa kaka; ọ hụ e gi Iwu m e bi, e mẹ ihiẹn m ku. O gikọ ufiri njọ nẹdi ẹ nwụn; o k'a rịrịrị ndụn.
18
“O mẹ nke nẹdi ẹ, makẹni ọ bịangbu ịhịan, zun ibe ẹ ohin, mẹ ihiẹn rịlẹni mma imẹ ndị nke ẹ, o k'a nwụnrịrị makẹ njọ a.
19
“Ụnụ hụzị a jụ ‘Kị wụ nị nwa ebukọ njọ nẹdi?’ “Ebe o mẹ ni nwa ahụn hụ e mẹ onyẹ ọwụlẹ k'o furu, e mẹ ihiẹn m chọ; e gi Iwu m e bi, e dọnmẹ wẹ, o k'a rịrịrị ndụn.
20
Onyẹ hụn mẹ njọ nwọn nwụn. Nwa ebukọ njọ nẹdi ẹ, nẹdi ebukọ njọ nwa a. Ezi-omumẹ onyẹ ezi-omumẹ kẹ w'a gụnnị onyẹ ezi-omumẹ, njọ onyẹ-njọ kẹ w'a gụnnị onyẹ-njọ.
21
“Kanị, omẹni onyẹ-njọ e bihutọ ẹka, mẹbehi njọ ile ọ rị e mẹ, mẹmẹ ihiẹn ile m sị wẹ e mẹ, e mẹ onyẹ ọwụlẹ k'o furu, e mẹ ihiẹn furuni, o k'a rịrịrị ndụn; ọ nwụnkọ.
22
Njọ hụ ile o mẹ mbụ, onwọnni hụn m k'a nyanhan mọbụ gi ẹ sọn ẹ. O k'a rị ndụn makẹni ọ rị nwan e mẹ ihiẹn furuni.
23
Ọ sụọdẹ m nwan a sụọ nị onyẹ njọ nwụn anwụn ra? Ẹlẹ o bihutọ ẹka, rị ndụn, kẹ ẹfọ nọ a sụọ m ụsụọ? Ya kẹ Osolobuẹ Nwọn Ihiẹn Ile ku.
24
“Kanị, omẹni onyẹ ezi-omumẹ e bihutọ ẹka, mẹmẹ njọ, mẹmẹ arụ ndị hụ onyẹ-njọ e mẹ, n'ọ rịdẹ nwan ndụn ra? Ezi-omumẹ ile o mẹ, onwọnni hụn m k'a nyanhan, ebe o mẹni o hutọgụọ, mẹmẹ njọ; isi ẹ k'a tọ a.
25
“Kanị ụnụ hụ a sị, ‘Osolobuẹ ara mẹ ihiẹn ọhụnma.’ Ụmụ Izrẹlụ, ụnụ sị m'a ra mẹ ihiẹn ọhụnma? Ẹlẹ ụnụ ghalẹni e mẹ ihiẹn ọhụnma?
26
Onyẹ ezi-omumẹ la ezi-ihiẹn ọ rị e mẹ tọ, mẹmẹ ihiẹn furulẹni, o k'a nwụn; o k'a nwụn makẹni o mẹ ihiẹn furulẹni.
27
Kanị, onyẹ eje-omumẹ mẹbehi eje-ihiẹn ọ rị e mẹ, mẹmẹ ihiẹn furuni lẹ ezi-omumẹ, o k'a zụọrị isi ẹ.
28
Makẹni o rogụọ eje-ihiẹn ile o mẹ, gbakitọ wẹ azụụn, o k'a rịrịrị ndụn; ọ nwụnkọ.
29
Kanị ụmụ Izrẹlụ hụkwọ a sị, ‘Osolobuẹ ara mẹ ihiẹn ọhụnma.’ Ụmụ Izrẹlụ, ụnụ sị m'a ra mẹ ihiẹn ọhụnma? Ẹlẹ ụnụ ghalẹni e mẹ ihiẹn ọhụnma?
30
“Osolobuẹ Nwọn Ihiẹn Ile rị nwan a sị, ‘Ụnụ ndị Izrẹlụ, obibi onyẹ-onyẹ kẹ m'e gi kin ẹ ikpe. Bihutọ nị nwan ẹka! La nị eje-ihiẹn ile ụnụ rị e mẹ tọ, amamgbe njọ ụnụ e mẹ ụnụ uke.
31
Ma nị nwan eje-ihiẹn ile ụnụ rị e mẹ tuhu; nwọnrin ni obi ọhụn lẹ mmọn ọhụn. Kị ụnụ k'a nwụnnị, ụnụ ndị Izrẹlụ?!’
32
Osolobuẹ Nwọn Ihiẹn Ile sị, ‘Ara sụọ m nị ịhịan nwụn. Bihutọ nị nwan ẹka, kẹni ụnụ rị ndụn.’
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes